8 पर आब तुहुरिन्हे यी सक्कु बातहे छोरदेहे परी, जसिके कि क्रोध, रीस, बिह्रे मुना और दोसुर जहनके बारेमे खराब बात बत्वैना। 9 एकदोसुर जहनसे झूँट ना बोलो, काकरेकी तुहुरे अपन पुरान पापी स्वभावहे और सक्कु खराब कामहे छोरदेले बतो। 10 और आब तुहुरे लावा मनै बनगिल बतो। तुहुरिन्हे बनुइया परमेश्वर तुहुरिन्हे धेउरसे धेउर अपन नन्हेँ बनाइतताँ, ताकि तुहुरिन्हे अपन बारेमे पूरा ज्ञान देहे सेकिँत।