1 पुरान समयमे अगमवक्तनके माध्यमसे बहुतचो और कैयोमेरसे परमेश्वर हमार बाबा-पुर्खनसे बोल्लाँ। 2 पर यी ओरैना-ओरैना दिनमे परमेश्वर अपन छावक माध्यमसे हम्रिहिन्से बोलल बताँ। परमेश्वर अपन छावक माध्यमसे संसारके सृष्टि करलाँ और ऊ अपन छावाहे सक्कु चिजके उत्तराधिकारी नियुक्त करलाँ। 3 येशूए परमेश्वरके महिमक प्रतिबिम्ब और परमेश्वरेके स्वभावके वास्तविक प्रतिरूप हुइताँ, और पूरा विश्वहे अपन शक्तिशाली वचनसे सम्हरथाँ। जब ऊ मनैनके पापहे माफी करे सेकजाए कहिके अपन काम ओरवैलाँ। तबजाके ऊ महिमित परमेश्वरके दाहिन पाँजर उच्च आदरके ठाउँमे बैठ्गिलाँ।

4 तबेकमारे परमेश्वर अपन छावाहे स्वर्गदूतनसे फेन बरवार नाउँ देलाँ, जिहिसे हम्रे जाने सेक्थी कि परमेश्वरके छावा स्वर्गदूतनसे भारी हुइँत।

5 कौनो फेन स्वर्गदूतहे परमेश्वर असिके नै कलाँ,

"तैँ मोरिक छावा हुइते*,

आज मै घोषणा करतुँ कि तैँ मोरिक छावा हुइते।"

ओकर पाछे ऊ अपन कौनो फेन स्वर्गदूतहे असिके नै कलाँ,

"मै ओकर बाबा हुइम, और ऊ मोरिक छावा होजाई।"

6 और परमेश्वर बरका छावाहे संसारमे पठैनासे आघे ऊ फेनदोस्रे कहतताँ,

"मोरिक सारा स्वर्गदूतनके उहिएहे आराधना करिँत।"

7 स्वर्गदूतनके बारेमे परमेश्वर कहतताँ,

"मोरिक इच्छा अनुसार मै स्वर्गदूतनहे बयाल,

अथवा आगिक मोँजा हस बनाई सेक्थुँ, स्वर्गदूतनके मोरिक सेवा करुइयन किल हुइँत।"

8 पर अपन छावक बारेमे भर परमेश्वर कथाँ,

"हे परमेश्वर, तोरिक राज सदासर्वदक लग पलिरही,

और तैँ न्यायसे राज कर्बे।

9 ठिक काम करना तुहिहे मन परत, और खराब कामहे तैँ घृणा कर्थे।

तबेकमारे मै, तुहुरिन्के परमेश्वर तुहुरिन्हे तुहुरिन्के संघरियनमेसे रोजल बतुँ। मै तुहुरिन्हे बरे आनन्दसे अलग कर्ले बतुँ।"

10 परमेश्वर अपन छावक बारेमे असिके फेन कले बताँ,

"हे प्रभु, सुरुवातमे तैँ संसारहे सृष्टि कर्ले,

और आकाशमे रहल सक्कु चिज तैँ बनैले।

11 ओइने ते नाश होजिहीँ, पर तैँ सदासर्वदा जित्ती पलिरबे।

ओइने बिनाकामक होजिहीँ,

12 चदरीहस ओइन्हे तैँ बित्यैथे,

लुग्गा बद्ले हस ओइने बदलजिहीँ।

पर तैँ कब्बु नै बदल्थे।

और तैँ हरदम जित्ती पलिरबे।"

13 परमेश्वर कबु कौनो स्वर्गदूतहे असिके नै कलाँ,

"तुँ मोरिक दाहिन हाँथेओहोँर सम्मानके ठाउँमे बैठो,

जबसम मै तोहाँर दुश्मनहुँक्रिहिनहे

पूरा रुपमे तोहाँर अधिनमे ना नानदिऊँ।"

14 स्वर्गदूतनके उद्देश्य का हुइतिन ते? ओइने ते परमेश्वरके सेवा करुइयन किल हुइँत। परमेश्वर ओइन्हे मुक्ति भेटुइया मनैनके रेखदेख करक लग पठैथाँ।