1 विश्वास करना कलक आशा कर्लक बातमे निर्धक्क हुइना और नै देखल बातमे पक्का भरोसा करना हो। 2 हमार पुर्खन अस्तेहेँ विश्वास करल रहिँत। यक्रेहे कारण किल परमेश्वर ओइन्से खुशी हुइलाँ कहिके देखैलाँ।

3 विश्वाससे हम्रे बुझ्थी कि संसार परमेश्वरके वचनसे सृष्टि हुइल। और हमार देखे सेक्ना चिज बनाइक लग परमेश्वर नै देखैना चिज प्रयोग करलाँ।

4 विश्वासेसे आदमके छावा हाबिल परमेश्वरहे अपन दादू कयिनसे धेउर ग्रहणयोग्य बलि चह्राइल। और वहे बलिसे परमेश्वर हाबिलहे धर्मी मनैयक रुपमे स्वीकार करलाँ। काकरेकी हाबिलके चह्रैलक बलिसे परमेश्वर खुशी हुइलाँ। और हाबिल मुगिलेसे फेन परमेश्वरहे विश्वास कर्नक बारेमे अभिन फेन ऊ हम्रिहिन्हे सिखाइत।

5 हनोक नाउँ रहल मनैयक विश्वाससे परमेश्वर उहिहे जित्ती स्वर्गमे उठालैगिलिस। और ऊ नै मुअल, तबेकमारे केऊ फेन ओकर मुअल शरीरहे नै भेटैलिस। स्वर्गमे उठाके लैजिनासे आघे हनोक परमेश्वरहे खुशी बनाइल कहिके पवित्र शास्त्रमे लिखल बा। 6 हुँकारमे विश्वास करके किल हम्रे परमेश्वरहे खुशी बनाई सेक्थी। काकरेकी जे परमेश्वरमे आइत, ऊ परमेश्वरहे विश्वास करे परत कि परमेश्वर बताँ। और सच्चाइसे हुँकार खोजी करुइयनहे ऊ ईनाम दिहीँ।

7 विश्वासेसे नोआ नाउँ रहल मनैया कबु नै देख्लक सैलाबके बारेमे परमेश्वरसे चेतावनी भेटाके हुँकार आज्ञा पालन करके अपन परिवारहे बँचाइक लग पानी जहाज बनाइल। और परमेश्वरहे नोअक विश्वास करनासे आघे, औरे विश्वास नै करुइया मनै दोषी ठहरगिलाँ और ओइने डुबके मुगिलाँ। और नोअक विश्वासके कारण परमेश्वर उहिहे धर्मी घोषणा करलाँ।

8 विश्वाससे अब्राहाम कना मनैया परमेश्वरके बलैलक समयमे आज्ञा पालन करल। और अब्राहाम उ ठाउँमे गैल, जहाँ परमेश्वर उहिहे जाई कले रहिस। जोन ठाउँहे परमेश्वर उत्तराधिकारके रुपमे उहिहे पाछे देना रहिस। और केहोँर जैना हो कहिके बिना पता रले ऊ अपन देशहे छोरके नेगल। 9 परमेश्वरके वाचा कर्लक ठाउँमे अब्राहाम परदेशी हस तम्बू टाँगके बैठल। अब्राहामके संग ओक्रेहे छावा इसहाक और ओकर नतिया याकूब फेन परमेश्वरसे वहे वाचा भेटैलाँ, और ओस्तेहेँके तम्बू टाँगके बैठ्लाँ। 10 काकरेकी ऊ एकथो सदादिन पलिरना जग बनल शहरमे रहक लग आसरा हेरतेहे, जोन शहरहे बनुइया और निर्माण करुइया परमेश्वरे हुइताँ।

11 विश्वासेसे अब्राहामके जन्नी सारा फेन अपन उमेर ढल्कलमे लरका पैना शक्ति भेटाइल। काकरेकी वाचा करुइयाहे ऊ विश्वासयोग्य मानल रहे। 12 अब्राहाम बुह्राइल रलेसे फेन ओकर छावा इसहाक जल्मलिस। यी गुणात्मक रुपमे बह्रल आकाशके तोरैयाँ हस और समुन्दरके बालु हस ओकर बहुत्ते लरकापरका हुइलिस।

13 परमेश्वरहे विश्वास करुइया यी सक्कु मनै परमेश्वरके वाचा कर्लक चिज बिना भेटैले मुगिलाँ। पर ओइने परमेश्वरके भविष्यमे करना काम बुझके खुशी हुइलाँ। और ओइने यी फेन बुझ्लाँ कि हम्रे यी धर्तीमे परदेशी और प्रवासी हुइती। 14 असिन बात बतुइया मनै यी फरछ्वारेसे देखैथाँ कि ओइने अपन लग एकथो देश खोजतताँ, जोन देश ओइन्के हुइहिन। 15 ओइने जोन देशमेसे निकरके गैल रहिँत, उ देशके बारेमे ओइने सोँच्बे नै करलाँ। नै ते ओइन्हे घुमके जैना मौका मिल्बे नै कर्तिन। 16 पर ओइने आकुर मजा देश, अथवा एकथो स्वर्गीय देशके चाहना करथाँ। तबेकमारे ओइन्के परमेश्वर हुइतुँ कहिके परमेश्वर गर्व करिँत। काकरेकी ओइन्के लग परमेश्वर एकथो शहर तयार पारदेले बताँ।

17 विश्वासेसे अपन परीक्षा हुइबेर अब्राहाम अपन छावा इसहाकहे बलि चह्राइक लग तयार रहे। और परमेश्वर अब्राहामेहे एकथो छावा देना वाचा कर्ले रहिँत। इसहाक अब्राहामके लग एकथो विशेष छावा रहिस। तभुन फेन अपन एक्केथो छावक बलि चह्रैना ऊ तयार होगिल। 18 परमेश्वर उहिहे पैलेहेँ कले रहिँत, "मोरिक वाचा करल अनुसार इसहाकेसे तोरिक वंश आघे बह्री।" 19 काकरेकी जसिके अब्राहाम यी मानलेहल कि परमेश्वर सामर्थी बताँ, और ऊ इसहाकहे मुअलमेसे फेनदोस्रे जिवादिहीँ। अस्तेहेँके ऊ इसहाकहे मुअलमेसे फेनदोस्रे जित्ती भेटाइल।

20 विश्वासेसे इसहाक अपन दुईथो छावा याकूब और एसावहे वाचा कर्लक आशिषके बारेमे आशीर्वाद देहल।

21 जब याकूब मुए लागल रहे तब विश्वासेसे ऊ योसेफके सक्कु छावनहे आशीर्वाद देहल। और अपन लट्ठीक सहारा लेके परमेश्वरके आराधना करल।

22 विश्वाससे योसेफ अपने मुएबेर निर्धक्क होके इजरायलीन मिश्र देश छोरके जैहीँ कहिके कले रहे। और मिश्र देश छोरके जाई लग्हीँ ते ऊ ओइन्हे अपन हड्डी फेन संगे लैजिहो कहिके कले रहे।

23 जब मिश्र देशके रज्वा इजरायलीनके छावनहे जल्मत्तिकिल मुवादेना आदेश देहल। तब विश्वासेसे मोशा जल्मल ते ओकर दाईबाबा उहिहे तीन महिनासम नुकैले रलिस। और ओइने अपन लर्ककमे खास बात देख्के ओइने रज्वक आदेश नै मानलमे फेन नै डरैलाँ।

24 मिश्र देशके फारो रज्वक छाई मोशाहे पल्लिस। मोशा भारी होके सेकल ते विश्वासेसे ऊ नै चाहल कि मनै उहिहे राजकुमारीक छावा कहिँत। 25 एक घचिक लग पापके सुख भोग्नासे बेन परमेश्वरके मनैनके संग दुःख भोग्ना मोशा रोजल। 26 मिश्र देशके धनसम्पत्तिसे ख्रीष्टके लग निन्दित हुइना ऊ किम्ती सम्पति मानल। काकरेकी ओकर नजर भविष्यमे मिल्ना ईनाममे लागल पलिरहिस। 27 रज्वक क्रोधसे नै डराके विश्वासेके कारण ऊ मिश्र देश छोरल। काकरेकी ऊ बुझगिल रहे, और जिहिहे हम्रे देखे नै सेक्थी। ऊ परमेश्वरहे देखल हस करके मोशा कतै पाछे नै घुमल। 28 विश्वासेके कारणसे मोशा इजरायल देशके मनैनहे अपन-अपन दवारीक चौखटमे बलिक खुन छिटके निस्तार-तिहुवार मन्ना आज्ञा देहल। ताकि परमेश्वरके पठैलक बरका छावा मुवैना मृत्युदूत इजरायलीनके बरका छावनहे ना मुवाए। पर मिश्र देशके मनैनके बरका छावनहे किल मुवाए।

29 विश्वासेसे सुखल जमिनमे हस नेङ्गके इजरायल देशके मनै लाल समुन्दर नहङ्लाँ। पर मिश्र देशके मनै भर ओस्तेहेँके समुन्दर नहाँगे खोज्लाँ ते ओइने डुबके मुगिलाँ।

30 इजरायल देशके मनै परमेश्वरहे विश्वास कर्लके कारण सात दिनसम यरिहो शहरके पर्खालहे चक्कर लगैलाँ। ओकर पाछे पर्खाल ढलगिल।

31 विश्वासेके भरमे राहाब वेश्या परमेश्वरके आज्ञा नै मनुइयनके संगे नाश नै हुइल। काकरेकी नुकके यरिहो शहरमे हेरे गैलक इजरायल देशके जासूसहुँक्रिहिनहे ऊ स्वागत करल रहे।

32 यिहिसे धेउर महिन्हे कना जरुरी नै हो। काकरेकी गिदोन, बाराक, शिमशोन, यिप्ता, दाऊद रज्वा, शमूएल हस मनै और परमेश्वरके अगमवक्तनके बारेमे कती रना महिन्हे समय नै हो। 33 विश्वासेसे ओइने राज कब्जा करलाँ, और न्यायसे राज करलाँ। परमेश्वरके वाचा कर्लक चिज फेन भेटैलाँ। सिंह फेन ओइन्हे नै खैलिन। 34 और आगी ओइन्हे नै जरैलिन। तरवाल ओइन्हे नै कट्लिन। ओइने कमजोर रहिँत, पर आब बल्गर होगिलाँ। युद्धमे वीर हुइलाँ, और ओइने अपन दुश्मननके फौजहे भगैलाँ। 35 कौनो-कौनो जन्नी मनै अपन मुअल मनैनहे मुअलमेसे फेनदोस्रे जित्ती भेटैलाँ। झेलमेसे छुटक लग अपन विश्वास नै छोरब कती बहुत मनै ते पिटाई खाइत-खाइत मुगिलाँ। पर ओइने अपन विश्वास छोरे नै चहलाँ। ताकि ओइने मुके सेकके फेनदोस्रे जित्ती होके आकुर मजा जीवन भेटाई सेकिँत। 36 गोड्गात मनैनहे अपमान सहे पर्लिन, कोर्रा खाई पर्लिन, और बन्ध्वा पाके कैदी बने पर्लिन। 37 ओइन्मेसे कौनो मनैनहे पठरालेके मार्के मुवैलिन। ओइन्हे आरालेके चिरके दुई खण्डा बनादेलिन। ओइन्हे तरवाललेके मुवैलिन। ओइने गरीब रहिँत, और ओइन्हे दुःख देलिन। और ओइन्से नै मजा व्यवहार कर्लिन। और ओइने भेँरीनके और छेग्रीनके छल्री लगाके यहोँरओहोँर नेँगित। 38 यी नै मजा संसार उ विश्वासीनके रना लायकके नै रहिन। मरुभूमि, पहाड़, गुफा और पृथ्वीक ओदारहुँक्रिहिनमे हुइती ओइन्हे घुम्ती नेगे पर्लिन।

39 परमेश्वर यी मनैनसे खुशी रहिँत, काकरेकी ओइने हुँकिन्हे भरोसा करिँत। पर नै मुअतसम ओइने परमेश्वरके वाचा कर्लक चिज नै भेटैलाँ। 40 काकरेकी परमेश्वरके थेन ओइन्के लग किल नै हो, पर हमार लग फेन एकथो मजा योजना बतिन। पर परमेश्वर ओइन्हे हमार संग मिलाके किल ओइन्हे सिद्ध बनाई चहथाँ।