1 हमार आँजरपाँजर यी मनैनके विश्वासके गवाही फालाफाल बा। तबेकमारे आऊ, हमार डगरमे अइना बाधा और हम्रिहिन्हे फँसैना पापहे हम्रे हटाई। और हमार आघे रलक दौड़ हम्रे लगनशील होके दौरी। 2 हमार विश्वासहे सुरु करुइया और पूरा करुइया येशूहे हम्रे हेर्ती रही, जे अपन आघे धारदेलक आनन्दक लग अपमानहे कुछु हस नै मानके क्रूसके कष्ट भोग्लाँ। और परमेश्वरके दाहिन पाँजर आदरके उँच ठाउँमे बैठल बताँ। 3 तबेकमारे तुहुरे येशूक उदाहरणके बारेमे विचार करो। हुँकिन्हे घृणा करुइया पापी मनैनसे कर्लक अतरा विरोध ऊ कसिके सहलाँ, ताकि तुहुरे निराश होके हरेस ना खाऊ।

4 तुहुरे पापके विरोधमे कर्लक संघर्षमे, मनै तुहुरिन्हे मुवैना अवस्थासम ते सहे नै परल हो। 5 परमेश्वर अपन छाईछावन हस तुहुरिन्हे असिके उत्साहक शब्द कलक तुहुरे बिस्रागिलो।

"हे मोरिक छावा, परमप्रभु तोहाँर कर्लक गल्ती देखैहीँ कलेसे ध्यान देऊ।

और जब ऊ तुहिन्हे हप्कैहीँ ते हरेस ना खाऊ।

6 काकरेकी जिहिहे परमप्रभु प्रेम करथाँ, ओकर कर्लक गल्ती फेन देखैथाँ।

और अपन छावक रुपमे स्वीकार कर्लक मनैनहे ऊ सजाय फेन देथाँ।"

7 मोरिक अपने बाबा सजाय देहल कना समझके तुहुरे दुःख सहो। परमेश्वर तुहुरिन्हे अपन छावक हस व्यवहार करथाँ। काकरेकी हरेक बाबन अपन छाईछावनहे सजाय देथाँ, जब ओइने गल्ती करथाँ। 8 परमेश्वर अपन सक्कु लर्कनहे सुधरथाँ। और यदि तुहुरे परमेश्वरसे कौनो फेन सजाय नै भेटैलो कलेसे तुहुरे हुँकार खास लरका नै हुइतो। 9 और हमार शारीरिक बाबा फेन हम्रिहिन्हे सजाय देहल, और हम्रे ओकर आदर कर्ली। कलेसे हम्रे हमार स्वर्गक बाबाहे झन कतरा धेउर आदर करे परी। ताकि हुँकार सुधर्लक समयमे हुँकार कलक सुनके हम्रे सदादिनके लग जित्ती रहे सेकी। 10 काकरेकी हमार शारीरिक बाबनके ते ओइन्हे ठिक लागल अनुसार थोरिक दिन हम्रिहिन्हे सजाय देलाँ। पर परमेश्वर हमार भलाईक लग हम्रिहिन्हे सजाय देथाँ, ताकि ऊ हम्रिहिन्हे अपन हस पवित्र बनाई सेकिँत। 11 हम्रिहिन्हे सजाय मिलत ते हम्रिहिन्हे मन नै परत, बेन दुःख भेटाइल हस लागत। पर वहे दुःखसे सिखके सेकके हम्रे शान्ति भेटैथी। काकरेकी हम्रे मजा तरिकासे जीवन जिना सुरु कर्थी। 12 तबेकमारे अपन मिच्छाइल हाँथ उठाऊ। लग्लगैती रहल गोरा बल्गर बनाऊ। 13 और यहोँरओहोँर हेरलसे बेन हम्रे सोझ डगरमे नेंग्ती रही। जोन डगर येशूक लग्गे लैजाइत, ताकि हमारमेसे आत्मिक रुपमे कमजोर रहल मनै डगर ना बिस्राइँत। पर ओइन्के विश्वास बल्गर होजाइन।

14 सक्कु मनैनसे शान्तिमे बैठ्ना और पवित्र हुइना कोशिस करो; पवित्रताविना कौनो मनैया परमप्रभुहे देखे नै सेकत। 15 ध्यान देऊ, कि कौनो मनैया परमेश्वरके अनुग्रह भेटैनासे असफल ना होए, ताकि तुहुरिन्के बिच्चेम समस्या ना आए। काकरेकी ओसिन मनैया तुहुरिन्हे बहुत जहनहे भ्रष्ट बनादेहत। 16 केऊ फेन व्यभिचारी या अब्राहामके नतिया एसाव हस अधर्मी ना होए। काकरेकी ऊ बरका छावा रहे। और उहिहे उत्तराधिकारी हुइना विशेष अधिकार रहिस। पर ऊ अपन जल्मत्तिक अधिकारके सम्मान नै करल। तबेकमारे ऊ अपन छुट्की भैया याकूबहे एक छाँक खानक लग अपन जल्मत्तिक अधिकार बेँचदेहल। 17 तुहुरिन्हे पतै बा, पाछेसे ऊ अपन बाबासे आशीर्वाद भेटाई खोजल, पर ऊ नै भेटाइल। आँश बहाके एसाव उ आशीर्वाद चहलेसे फेन ऊ अपन कर्लक कामहे बद्लक लग कुछु फेन करे नै सेकल।

18 तुहुरे सीनै पहाड़ हस ठाउँमे नै आइल हुइतो, जिहिहे देखे और छुए सेकजाइत। इजरायलके मनै आगीक मोँजा या गहिँर अंधार या आँधीबौखा देख्लाँ। जब परमेश्वर ओइन्हे अपन नियम कानुन देलिन। 19 ओइने तुरही फुँक्लक और परमेश्वरके आवाज सुन्लाँ। जब मनै उ आवाज सुन्लाँ ते यी फेनदोस्रे ना बोले कहिके ओइने अनुरोध करलाँ। काकरेकी ओइने गजब डरागिल रहिँत। 20 ओइने असिके कलाँ, काकरेकी परमेश्वर ओइन्हे कलक यी आज्ञा ओइने सहे नै सेक्लाँ, "यदि कौनो जानबर उ पहाड़हे छुई कलेसे उहिहे पठरालेके मारके मुवादेहो।" 21 और हुँकार दृश्य अतरा डरलग्तिक रहे, कि मोशा फेन "मै डरकमारे लग्लगाइतुँ" कहिके कहल रहे।

22 पर तुहुरे ते सियोन पहाड़मे आइल बतो, जहाँ स्वर्गक यरुशलेम बा, जोन जित्ती परमेश्वरके शहर हो। जहाँ लाखोँ स्वर्गदूतनके आनन्द-उत्सव मनैथाँ। 23 तुहुरे परमेश्वरके बरका सन्तानके सभामे आइल बतो, जेकर नाउँ स्वर्गमे लिखल बा। ओइने स्वर्गमे रहुइयन धर्मी मनैनके आत्मा हुइँत, जेने अब्बे सिद्ध बनागिल बताँ। तुहुरे अप्निहीँ परमेश्वरके थेन आइल बतो, जे सक्कु मनैनके न्यायधीश हुइँत। 24 तुहुरे येशूक थेन आइल बतो, जे परमेश्वर और हमार बिच्चेम लावा करार बहन्थाँ। तुहुरे हुँकार छिट्लक खुनके थेन आइल बतो, जोन हाबिलके खुन हस न्यायक लग चिल्लैनक सटाहा माफिक बारेमे कहत।

25 हौश्यार बैठो, और परमेश्वरके कलक मानो जे तुहुरिन्से बोलतताँ। काकरेकी इजरायल देशके मनै परमेश्वरके दण्डसे बँचे नै सेक्लाँ जब मोशा पृथ्वीमे रहल समयमे ओइन्हे चेतावनी देहल ते ओइने ओकर बात सुन्ना अस्वीकार करलाँ। यदि हम्रे स्वर्गमेसे चेतावनी देहुइया परमेश्वरके बात सुन्ना अस्वीकार करब कलेसे हम्रे फेन हुँकार दण्डसे बिरकुले बँचे नै सेकब। 26 सीनै पहाड़मेसे परमेश्वर बोल्लाँ ते धर्ती हिलगिल रहे। पर आब ते ऊ असिक कहिके वाचा कर्ले बताँ, "अभिन एकचो आकुर, धर्ती किल नै होके स्वर्गहे फेन मै हिलैबुँ।" 27 "अभिन एकचो आकुर" कना वचन यी देखाइत, कि सृष्टि हुइलक सक्कु चिज हिलाजाई और हटाजाई, ताकि हिलाई नै सेकजैना चिज स्थिर रहिँत।

28 तबेकमारे हिलाई नै सेकजैना राज भेटैलक ओहोँरसे हम्रे परमेश्वरहे धन्यवाद देहे परत। तबेकमारे हम्रे भक्ति और डरसे परमेश्वरहे ग्रहणयोग्य आराधना चह्राई, जिहिसे ऊ खुशी हुइथाँ। 29 काकरेकी हमार परमेश्वर भसम परुइया आगी हस हुइताँ।