1 तबेकमारे परमेश्वर स्वर्गमे हुँकार संग शामिल हुइक लग बलैलक विश्वासी भैयो, येशूकमे मन लगाऊ, जे हमार लग परमेश्वरके खुशीक खबर सुनुइया दूत और प्रधान पुजारी हुइँत। 2 येशू हुँकिन्हे नियुक्त करुइया परमेश्वरकेमे विश्वासयोग्य रहिँत, जसिके मोशा फेन परमेश्वरके परिवारके सक्कु मनैनके सेवा करनामे विश्वासयोग्य रहे। 3,4 मनै घर बनैथाँ, पर परमेश्वर सक्कु चिज बनैलाँ। काकरेकी मनै बनाइल घरसे धेउर घर बनुइया मनैयाहे आदर करथाँ। ओस्तेहेँके येशू फेन मोशासे धेउर भारी सम्मानके योग्यक बताँ, जेकर माध्यमसे परमेश्वरके घर बनल। 5 मोशा परमेश्वरके घरक सक्कु मनैनसे सेबक हस विश्वासयोग्य हुइलस, और पाछेजाके मोशक कर्लक काम भविष्यमे परमेश्वरके बोल्ना सच्चा बातके सच्चा उदाहरण रहे। 6 पर ख्रीष्ट भर परमेश्वरके घरक मनैनके संग छावक रुपमे विश्वासयोग्य रहिँत। और यदि हम्रे ख्रीष्टमे रलक हमार आशामे हिम्मत और भरोसा धर्ले पलिरबी कलेसे हम्रे परमेश्वरके घरक मनै हुइती।

7 तबेकमारे पवित्र आत्मा पवित्र शास्त्रमे कले बताँ,

"आज तुहुरिन्हे परमेश्वरके आवाज सुन्हिक परी।

8 उजाड़-ठाउँमे परीक्षक समयमे परमेश्वरके विरोधमे विद्रोह करुइया तुहुरिन्के पुर्खन हस

परमेश्वरके आज्ञा पालन करना अस्वीकार ना करो।

9 वहाँ तुहुरिन्के पुर्खनके महिन्हे नै पत्यैलाँ और महिन्हे जँच्लाँ।

जब्की ओइने चालीस सालसम मोरिक अचम्मक काम देखल रहिँत।

10 तबेकमारे उ पुस्तासे मै रिसागिनु।

और कनु, ‘ओइने महिन्हे अस्वीकार कर्ले बताँ।

ओइने मोरिक देहल काम करनासे अस्वीकार कर्ले बताँ।’

11 तबेकमारे मै अपन क्रोधमे असिके कसम खैनु,

‘मोरिक विश्राम देना ठाउँमे ओइने कबु नै जाई भेटैहीँ’।"

12 हे मोरिक विश्वासी भैयो, चौँकस रहो! तुहुरिन्मेसे केक्रोमे रहल दुष्ट और अविश्वासी मन तुहुरिन्हे जित्ती परमेश्वरसे दूर ना लैजाए। 13 जबसम पवित्र शास्त्रमे "आझिक दिन" कना शब्द बा, तबसम प्रत्येक दिन एकदोसर जहनहे मजा तरिकासे जीवन बिताइक लग उत्साहा देऊ। यदि तुहुरे ओसिक कर्बो कलेसे, पाप तुहुरिन्हे धोखा नै दि, और तुहुरे परमेश्वरके विरोधमे जिद्दीह्या नै बन्बो। 14 यदि हमार सुरुमे रहल विश्वासमे हम्रे जीवनके अन्त्यसम बल्गर पलिरबी कलेसे हम्रे ख्रीष्टके संग साझा हकदार हुइबी। 15 पवित्र शास्त्रमे असिके लिखल बा,

"आझी तुहुरे परमेश्वरके आवाज सुन्बो कलेसे

परमेश्वरके विरोधमे विद्रोह करुइया तुहुरिन्के पुर्खन हस

परमेश्वरके आज्ञा पालन करना तुहुरे अस्वीकार ना करो।"

16 परमेश्वरके आवाज सुनके फेन हुँकार विरोध के करल? ओइने इजरायल देशके मनै हुइँत, जेनहे मोशा मिश्र देशमेसे निकारके नानल रहे। 17 किहिसे चालीस सालसम परमेश्वर रिसैलाँ? ओइने इजरायल देशके मनै हुइँत, जेने पाप करलाँ और उजाड़-ठाउँमे मुगिलाँ। 18 जब परमेश्वर कसम खाके यी घोषणा करलाँ कि ओइने उ ठाउँमे कबु नै जाई भेटैहीँ, जोन ठाउँ मै ओइन्हे बिसाँइक लग देहम। परमेश्वर उ मनैनके बारेमे कहतिहिँत, जेने हुँकार आज्ञा पालन करनासे अस्वीकार करल रहिँत। 19 यिहिसे हम्रे पता पैली कि विश्वास नै कर्लक कारण ओइने बिँसैना ठाउँमे जाई नै भेटैलाँ।