निउतरह्या 25

फेस्तसके आघे पावलके मुद्दा

1 हाकिम फेस्तस यहूदिया प्रदेशमे अइलक तीन दिन पाछे कैसरिया शहरमेसे यरुशलेम शहरमे गैल। 2 मुख्य पुजारी और यहूदिनके नेतन पावलके विरोधमे अभियोग लगैलाँ। 3 और पावलहे डगरीहिमे मुवैना षड्यण्त्र बनाके उहिहे यरुशलेम शहरमे निकरवादिँत कना बिन्ती करलाँ।

4 पर हाकिम फेस्तस पावलहे कैसरिया शहरके थानामे दारल। और अप्ने फेन वहाँ झत्ते जैना मन हुइलक बात बत्वाइल। 5 ऊ कहल, "तबेकमारे तुहुरिन्के मनिक नेतन वहाँ मोरिक संग जाँइत, और उ मनैयकमे कुछु खराबी बा कलेसे उहिहे अभियोग लगाँइत।"

6 हाकिम फेस्तस आठ-दश दिनसे धेउर दिन यरुशलेम शहरमे बैठ्के कैसरिया शहरमे घुमगिल। और दोसुर दिन न्याय-आसनमे बैठके ऊ पावलहे नन्ना हुकुम देहल। 7 पावल आइल ते यरुशलेम शहरमेसे अइलक यहूदी दलके नेतन ओकर आँजर-पाँजर ठरह्यागिलाँ। और पावलके विरोधमे अनेक मेरिक गम्भीर अभियोग लगैलाँ, जेकर ओइने सबुत देहे नै सेक्लाँ। 8 पर पावल अपन पक्षमे बोल्ती कहल, "मै यहूदिनके नियम कानुनके विरोधमे, मन्दिरके विरोधमे और महाराजक विरोधमे कुछु अपराध नै करल हुइतुँ।"

9 पर हाकिम फेस्तस यहूदी दलके नेतनहे खुशी पारक लग पावलसे पुँछल, "का तुँ यरुशलेम शहरमे जाके वहाँ मोरिक आघे यी बातके बारेमे इन्साफ करजाए कना चहथो?"

पावल महाराजक न्याय-आसनके आघे

10 पर पावल कहल, "मै महाराजक न्याय-आसनके आघे ठरह्याइल बतुँ, और यी वहे ठाउँ हो, जहाँ मोरिक न्याय हुई परना हो। यहूदी दलके नेतनके मै कुछु खराबी नै करल हुइतुँ कहिके ते अप्नि मजासे जन्थी।

11 यदि मै अपराधी हुइतुँ, और मै ज्यान सजाय मिल्ना लायकके काम करल हुइबुँ कलेसे मुअक लग मै अस्वीकार नै करम। पर यदि मोरिक उप्पर यनके लगैलक आरोपमे कुछु सबुत नै हो कलेसे महिन्हे केक्रो अधिकार नै हो कि केऊ महिन्हे यनके हाँथेम सौँपे। मै महाराजक थेन ऊ अप्निहीँ न्याय करिँत् कहिके अपील करम।" 12 तब् हाकिम फेस्तस सल्लाहकारनसे सल्लाहा लेके कहल, "तुँ महाराजाहे अपील कर्लो, तुँ महाराजक थेन जैबो।"

राजा अग्रिपासहे हाकिम फेस्तसके सल्लाहा

13 थोरिक दिन पाछे हाकिम फेस्तसहे नमस्कार करे राजा अग्रिपास और ओकर छोट्की बहिन्या बरनिकी कैसरिया शहरमे आपुग्लाँ। 14 ओइने वहाँ बहुत्ते दिन बैठके सेक्लाँ। तब् हाकिम फेस्तस पावलके मुद्दा राजक आघे असिक कती पेश करल, "हाकिम फेलिक्सके झेलमे दारके गैलक एकथो बन्दी यहाँ बा। 15 मै यरुशलेम शहरमे रहलमे जेकर बारेमे, मुख्य पुजारीनके और यहूदी दलके नेतन ओकर विरोधमे आरोप लगाके उहिहे दण्ड देहे परी कहिके अनुरोध करल रहिँत। 16 आरोपी और आरोप लगुइया मनैनके संग आमने-सामने नै होके और अपन विरोधमे लगागिलक आरोपके बारेमे बोल्ना मौका बिना भेटैले कौनो मनैयाहे बिना पत्तक दण्ड देना रोमीनके नियम नै हो कहिके मै ओइन्हे जवाफ देनु।

17 तबेकमारे जब यहूदी दलके नेतन मोरिक संग कैसरिया शहरमे अइलाँ। मै बिना बेर कर्ले काल्ही न्याय-आसनमे बैठके पावलहे हाजिर करैना हुकुम देनु। 18 जब आरोप लगुइयन ठरह्यैलाँ, तब बहस चलल। पर मोरिक सोँचल हस ओकर मुद्दामे कौनो नै मजा घट्नक बारेमे ओइने कौनो दोष लगाई नै सेक्लाँ। 19 पर ओइन्के मतभेद भर ओइनेहेन्के धर्मक बारेमे और मुसेकल येशूक बारेमे रहिन, जिहिहे पावल भर अभिन जित्ती बा कहिके दाबी करतेहे। 20 तबेकमारे यी बातके जाँच पत्ता लगैना बारेमे मै अलमलमे पर्लक ओहोँरसे मुद्दक बारेम छलफल करे यरुशलेम शहरमे जैना पावलके मन बतिस कि नै कहिके मै उहिहे पुँछ्नु, ‘का तुँ यरुशलेम शहरमे जाके वहाँ यी बातके बारेमे न्याय होए कना चहथो?’

21 पर पावल महाराजक न्याय नै हुइतसम हिरासतेमे धरहो कहिके अपील कर्लक ओहोँरसे उहिहे महाराजक थेन नै पठाइतसम अख्वारीमे धरना हुकुम देनु।" 22 तब् राजा अग्रिपास हाकिम फेस्तसहे कहल, "उ मनैयक बात मै अप्निहीँ सुने भेटैतुँ ते हुइना रहे।" तब् ऊ कहल, "काल अप्नि सुनलेबी।"

पावल राजा अग्रिपासके आघे

23 दोसुर दिन राजा अग्रिपास और ओकर छुट्की बहिन्या बरनिकी महा धुमधामसे सेनापति और शहरके प्रमुख मनैनके संगे सभाभवनमे पैठ्लाँ। तब् हाकिम फेस्तसके हुकुम पाके पावल हाजिर करागिलस। 24 फेस्तस हाकिम कहल, "राजा अग्रिपास और हमार संग यहाँ हाजिर हुइलक सक्कु जाने, अप्निनके यी मनैयाहे देखती। जेकर बारेमे सारा यहूदिनके ‘यी मनैया आबसे जिना लायकके नै हो’ कहिके यरुशलेम शहरमे और यहाँ फेन महिन्से बिन्ती करल रहिँत।

25 पर ज्यान सजाय पाईपरना यिहिहे कुछु करल मै नै भेटैलक ओहोँरसे और यी अप्निहीँ फेन महाराजक थेन रोम शहरमे अपील कर्लक ओहोँरसे मै यिहिहे पठैना निर्णय कर्नु। 26 यकर बारेमे मै मोरिक महाराजाहे लिख्ना विशेष बात कुछु नै हो। तबेकमारे मै यिहिहे अप्निनके आघे और खास करके, हे राजा अग्रिपास, अप्निक आघे नानल बतुँ। और हम्रे यकर दोषके जाँच करके सेकके सायद मै कुछु लिख्ना बात भेटैम। 27 काकरेकी कैदीक विरोधमे कौनो दोष बिना बतैले उहिहे पठैलेसे ओकर ते कुछु मतलब नै रही।"