निउतरह्या 21

यरुशलेम शहरके यात्रा

1 एफिसस शहरमे रलक मण्डलीक अगुवनसे विदा होके हम्रे पानी जहाजमे चहुँरके सोझे कोस टापुमे अइली। और दोसुर दिन रोडस टापुमे और वहाँसे पटारा टापुमे पुग्ली। 2 तब् फोनिके प्रदेशमे जैना एकथो पानी जहाजमे चहुँरके यात्रा सुरु कर्ली।

3 जब साइप्रस टापु देखा परल, तब् हम्रे उहिहे बाउँ पाँजर पारके सिरिया प्रदेश ओहोँर लागके टुरोस नगरमे उतरली। काकरेकी पानी जहाजमेसे मालसामान वहाँ उतारे परना रहे। 4 चेलनहे फेला पारके ओइन्के संग हम्रे सात दिन वहाँ बैठ्ली। पावलहे यरुशलेम शहरमे नै जैहो कहिके ओइने पवित्र आत्मक अगुवाइसे बिन्ती करलाँ।

5 सात दिन पाछे जब वहाँसे हमार जैना समय हुइल ते हम्रे विदा होके अपन यात्रामे निकरगिली। अपन परिवार बालबच्चा समेत ओइने जम्मै हम्रिहिन्हे शहरके बाहेरसम पुगाई अइलाँ। और हम्रे समुन्दरके आँरितिर ठेहुनी टेकके प्राथना कर्ली। 6 ओकर पाछे हम्रे एकदोसर जहनसे विदा होगिली। आब हम्रे पानी जहाजमे चहुँरली, और ओइने भर अपन-अपन घर घुमगैलाँ।

7 टुरोस नगरमेसे समुन्दरके यात्रा करके हम्रे टोलेमाइस नगरमे पुगगिली। वहाँ विश्वासीनहे नमस्कार करके ओइन्के संग एक दिन बैठ्ली। 8 दोसुर दिन हम्रे विदा होके कैसरिया शहरमे अइली, और खुशीक खबर प्रचार करुइया फिलिपके घरेम पैँठ्ली। जे उ सात जहनमेसे एकथो मनैया रहे जिहिहे विधवनहे रेखदेख करक लग यरुशलेम शहरके निउतरह्यन चुनल रहिस। 9 ओकर अगमवाणी बोल्ना चारथो कुँवारी छाई रहिस।

10 जब हम्रे वहाँ थोरिक दिन बैठ्ली ते यहूदिया प्रदेशमेसे अगाबस नाउँक एकथो परमेश्वरके अगमवक्ता आइल। 11 ऊ हमार थेन आके पावलके पटुका लेके अपन हाँथ-गोरा बाँधल और कहल, "पवित्र आत्मा असिक कहतताँ, ‘यी पटुका जोन मनैयक हो, उहिहे यरुशलेम शहरमे यहूदी दलके नेतन अस्तेहेँके बहन्हीँ। और गैर-यहूदिनके हाँथेम सौँपदिहीँ।’"

12 जब हम्रे यी बात सुन्ली, तब हम्रे और उ ठाउँक मनै मिलके पावल यरुशलेम शहरमे ना जाए कहिके बिन्ती कर्ली। 13 पर पावल जवाफ देहल, "तुहुरे असिके रोके काकरे मोरिक मनहे कमजोर पारतो? मै ते प्रभु येशूक नाउँक लग यरुशलेम शहरके कैदमे परना किल नै होके, पर मुअक लग फेन मै तयार बतुँ।" 14 उहिहे मनाई नै सेकके "प्रभुक इच्छा पूरा होए।" कहिके हम्रे चिमचाम होगिली।

15 थोरिक दिन पाछे हम्रे तयार होगिली और यरुशलेम शहर ओहोँर गैली। 16 हमार संगे कैसरिया शहरके कौनो-कौनो चेलनके फेन गैलाँ, और ओइने हम्रिहिन्हे उ समयमे साइप्रस टापुमे बैठुइया मनासोन नाउँक एकथो पुरान चेलक घरेम नन्लाँ। ओकर थेन हम्रिहिन्हे रहे परल रहे।

पावल यरुशलेम शहरमे पुग्लक

17 और जब हम्रे यरुशलेम शहर पुग्ली, तब् विश्वासीन खुशी हुइती हम्रिहिन्से भेँटा हुइलाँ। 18 दोसुर दिन पावल हमार संग याकूबके थेन गैल। वहाँ मण्डलीक सक्कु अगुवन जमा हुइल रहिँत। 19 ओइन्हे नमस्कार करके सेकके, पावल ओइन्के सेवकाईसे गैर-यहूदिनके बिच्चेम परमेश्वरके कर्लक काम ओइन्हे एक-एक करके बयान करल। 20 यी सुनके ओइने परमेश्वरके महिमा करलाँ। तब् ऊ कहल, "हेरो भैयो, तुहुरिन पता बा कि यहूदिनके बिच्चेम विश्वास करुइयन हजारौँ बताँ, और सक्कु जाने मोशक नियम कानुन विश्वासयोग्यतासे मन्थाँ। 21 ऊ यहूदी विश्वासीन अप्निक बारेमे फेन कुछु हल्ला सुनल बताँ, उ का हो कलेसे, गैर-यहूदिनके बिच्चेम रहुइया यहूदिनहे अप्नि ‘मोशक नियम कानुन छोरदेहो। और अपन लरकनके खतना ना करहो। और यहूदी रीतिरिवाज पालन ना करहो’ कहिके सिखाइल बती, हुँ।

22 आब हम्रे का करी? अप्नि आइल बती कहिके मनै पक्कै फेन सुन्हीँ। 23 तबेकमारे ज्या हम्रे कबी, अप्नि वहे करी। हमार यहाँ चार जाने मनै बताँ, जेने परमेश्वरके आघे कसम *21:23 कसम पहिले इजरायल देशमे कौनो-कौनो थारु मनैनके लग असिन चलन रहिन कि ओइन्हे अपन पूरा जीवन अंगुरके मदसे या अशुद्ध करना चिजसे दूर रहे परिन और ओइने अपन भुट्ला कबु नै कट्ना कसम खाइँत। पाछेजाके यहूदी कानुन कौनो एकथो मनैयाहे अस्थाई रुपमे एकथो नाजिरी हुइना अवसर मिल्लिस, जेकर मतलब यी रहे कि ऊ एकथो टोकल समयसम एकथो नाजिरीक रुपमे रही, और उ समयक अन्त्यमे पालिकपाला बलिदान चह्रैहीँ। जब यी सब चिज पूरा होजाई। तब उ मनैया अपन भुत्ला खौर्वालेहे और बलिदानके संगसंगे अपन भुत्ला जरा देहे। ओकर पाछे ऊ अंगुरके रस पिना भेटाए और अपन सामान्य जीवन जिअक लग स्वतन्त्र होजाए। खाके पूरा कर्ले बताँ। 24 यनहे लेके अप्नि फेन यनके संगसंगे शुद्ध हुइना विधि पूरा करी, और यनहे चहना खर्च अप्नि भरदी, और यने अपन कपारिमनिक भुट्ला खौरिँत। असिके अप्निहे मोशक नियम कानुन पालन करल देख्के अप्निक बारेमे सुन्लक कौनो बात सच्चा नै हो कहिके सक्कु जाने पता पैहीँ।

25 पर गैर-यहूदिनके जेने विश्वास करल बताँ। ओइने मूर्तिनहे चह्राइल खैना चिज ना खाइँत। और जानबरीनके खुन ना खाइँत। और घेँचा अँइठके मुँवाइल पशुनके सिकार ना खाइँत। और व्यभिचार ना करिँत् कना हमार निर्णय जनाके हम्रे चिट्ठी लिखल बती।" 26 दोसुर दिन पावल उ मनैनहे अपन संग लैजाके अपनहे शुद्ध करल। तब ऊ मन्दिरमे गैल। और घोषणा करल कि जब शुद्धिकरणके दिन ओराई। तब ओइन्मेसे हरेक जहनके लग देना दान चह्राजैहिन।

मन्दिरमे पावलहे पक्राऊ

27 जब सतौँ दिन पूरा हुई लागल रहे, तब् एशिया प्रदेशके यहूदिनके पावलहे मन्दिरमे देख्के सारा भीड़हे उक्सैलाँ, और पावलहे हुलदङ्गा मचैती पकरलाँ। 28 ओइने असिक कती चिल्लाई लग्लाँ, "इजरायलके मनै सहायता करो! मनैनहे जेहोँर-तेहोँर हमार जाति, हमार मोशक नियम कानुन और यी ठाउँक विरोधमे शिक्षा देती नेगुइया मनैया यहे हो। अतरा किल नै हो, यी गैर-यहूदिनहे फेन मन्दिरके भित्तर नानके यी पवित्र ठाउँहे अशुद्ध बनादेहल बा।" 29 ओइने असिके यहे कारण कलाँ, काकरेकी यकर आघे ओइने एफिसस शहरके त्रोफिमस कना एक जहनहे पावलके संग शहरमे देख्लक ओहोँरसे उहिहे ऊ मन्दिरके भित्तर नानल हुई कहिके सोँच्लाँ।

30 तब् पूरा शहरमे हुलदङ्गा मचगिल और मनै दौर्ती आके जमा हुइलाँ, ओइने पावलहे पकरके मन्दिरमेसे बाहेर घिँस्यैती नन्लाँ, और जुरतेहेँ दवार बन्द करदेलाँ। 31 जब ओइने उहिहे पीटना कोशिस करतिहिँत, तब् सारा यरुशलेम शहरके मनै हुलदङ्गा करतताँ कना बातके खबर पल्टनके सेनापतिक थेन पुग्लिस।

32 ऊ जुरतेहेँ सिपाही और कप्तानहुँक्रिहिनहे संगे लेके दौर्ती आइल। भीड़के मनै सेनापति और सिपाहिनहे देख्लाँ, और पावलहे ठठाई छोरदेलाँ। 33 तब् उ सेनापति पावलके लग्गे आके उहिहे पक्रल, और दुईथो सिँक्रीलेके उहिहे बहन्ना आदेश देहल। यी के हो और यी का करल कहिके ऊ पुँछल।

34 पर उ भीड़मेसे केऊ एक बात केऊ दोसुर बात कहिके चिल्लैलाँ। और उ होहल्लक कारण घटना का हो कना पता पाई नै सेक्लक ओहोँरसे पावलहे ब्यारेकमे लैजाऊ कहिके सेनापति ओइन्हे अह्राइल। 35 जब पावल सीढ़ीमे पुगल, तब् भीड़के दबाबके कारण सिपाहिन उहिहे उठाके लैगिलाँ। 36 काकरेकी मनैनके भीड़ "उहिहे मुवाँदेऊ" कहिके चिल्लैती पाछे-पाछे लागल रहे।

भीड़के मनैनहे पावलके सम्बोधन

37 ब्यारेकके भित्तर पुगाइबेर पावल सेनापतिहे कहल, "अप्नि, अनुमति देबी कलेसे, मै अप्निहे कुछु कहक चहथुँ।" ऊ कहल, "का तैँ ग्रीक भाषा बोले जन्थे? 38 का तैँ वहे मिश्र देशके नै हुइस, जे भर्खर सरकारके विरोधमे विद्रोह मचाके चार हजार विद्रोहीनहे उजाड़-ठाउँमे लैगिल रहे?"

39 पर पावल जवाफ देहल, "नाई, मै ते यहूदी मनैया हुइतुँ। मै किलिकिया प्रदेशके टार्सस शहरमे जल्मनु, छुटिमुती शहरके नागरिक नै हुइतुँ। बिन्ती बा, महिन्हे यी मनैनहे कुछु कना अनुमति दैदी।" 40 जब सेनापति अनुमति देहल, तब् सीढ़ीमे ठरह्याके पावल मनैनहे हाँथेलेके शान्त रहो कहिके इशारा करल। जब मनै एकदम शान्त हुइलाँ, तब ऊ हिब्रू भाषामे कहल: