1 यी पूरा संसारके सृष्टि हुइनासे आघे ऊ रहे, जिहिहे वचन कहिजाइत, और ऊ परमेश्वरके संग रहे, और वहे परमेश्वर रहिँत। 2 ऊ सुरुएसे परमेश्वरके संग रहे। 3 सक्कु चिज हुँकिनेसे बनागिलस, और ज्या चिज फेन बनागिलस, ओम्नेमेसे कौनो फेन चिज हुँकार बिना नै बनागिलस। 4 ऊ पूरा जीवनके स्रोत रहे, और वहे हो जे सारा मनैनहे ओजरार देहत। 5 उ ओजरार अंधारमे चम्कत और अंधार उहिहे छोपे नै सेकल। 6 परमेश्वर एकथो मनैयाहे पठैलाँ, जेकर नाउँ यूहन्ना रहिस। 7 ऊ ओजरारके बारेमे गवाही देहे आइल ताकि सक्कु मनै ओकर गवाहीसे विश्वास करिँत। 8 ऊ अप्निहीँ ते उ ओजरार नै रहे, पर ऊ उ ओजरारके बारेमे गवाही देहे आइल। 9 ऊ एकथो सच्चा ओजरार हो जे सक्कु मनैनहे ओजरार देहत, वहे संसारमे आइक लग रहिँत। 10 ऊ संसारमे रहिँत, संसार हुँकिनेसे बनागिलस, तभुन फेन संसारके मनै हुँकिन्हे नै चिहिन्लाँ। 11 ऊ अपने मनैनके थेन अइलाँ, पर हुँकार अपने मनै हुँकिन्हे स्वीकार नै करलिन। 12 पर जतरा मनै हुँकिन्हे स्वीकार करलाँ और हुँकारमे विश्वास करलाँ, ऊ ओइन्हे परमेश्वरके लरका हुइना अधिकार देलाँ। 13 उ मनै ना ते दाईबाबासे, ना मनैनके इच्छासे, ना ते मनैनके लरका पैना इच्छासे हो, पर ओइने परमेश्वरके इच्छासे जल्मल रथाँ। 14 जिहिहे वचन कहिजाइत, ऊ मनैयक रुपमे अइलाँ और अनुग्रह और सच्चाइसे पूरा होके हमार बिच्चेम वास बैठ्लाँ। हम्रे हुँकार असिन महिमा देख्ली। जोन महिमा बाबक एक्केथो छावक किल रहत। 15 यूहन्ना हुँकार बारेमे गवाही देहल, और गोहराके कहल, "ऊ वहे हुइताँ, जेकर बारेमे मै कहल रहुँ, ‘महिन्से पाछे एकथो मनैया अइहीँ, जे महिन्से फेन भारी बताँ, काकरेकी ऊ महिन्से फेन आघेसे रहिँत।’" 16 हुँकार अनुग्रहक पूर्णतक कारण हम्रे सक्कु जाने आशिषके उप्पर आशिष *भेटाइल बती। 17 मोशक नियम कानुन ते मोशक माध्यमसे देगिल रहे, पर परमेश्वर येशू ख्रीष्टके माध्यमसे अनुग्रह और सच्चाई देखैलाँ। 18 परमेश्वरहे केऊ फेन कबु देखल नै हो। हुँकार एक्केथो छावा किल हुँकिन्हे देखल बतिन जे परमेश्वरके हस बताँ, और जे परमेश्वरके लग्गे बताँ। परमेश्वरहे वहे छावा प्रकट कर्ले बतिन।

19 डुब्कि देहुइया यूहन्नक गवाही यी हो कि जब यहूदी दलके नेतन यरुशलेम शहरमेसे पुजारी और लेवीनहे डुब्कि देहुइया यूहन्नक थेन यी पुँछे पठैलाँ कि "तुँ के हुइतो?" 20 तब् ऊ ओइन्हे फरछ्वारसे कहिदेहल, "मै ख्रीष्ट नै हुइतुँ।" 21 तब् ओइने यूहन्नाहे फेनदोस्रे पुँछ्लाँ, "तब् तुँ के हुइतो, का तुँ परमेश्वरके अगमवक्ता एलिया हुइतो, जे आइक लग रहे?" ऊ कहल, "मै नै हुइतुँ।" "का तुँ उ परमेश्वरके अगमवक्ता हुइतो?" ऊ जवाफ देहल, "मै नै हुइतुँ।" 22 ओइने उहिहे पुँछ्लाँ, "तुँ के हुइतो ते? हम्रिहिन जवाफ देऊ ताकि हम्रिहिन्हे पठुइयनहे हम्रे जवाफ देहे सेकी। तुँ अपन बारेमे का कना चहथो?" 23 ऊ कहल, "जसिके परमेश्वरके अगमवक्ता यशैयक किताबमे लिखल बा, ‘परमप्रभुक डगर तयार पारो’ कहिके उजाड़-ठाउँमे चिल्लुइया मै एकथो मनैयक आवाज हुइतुँ।" 24 उ पुँछुइयनहे फरिसीनके पठाइल रहिँत। 25 तब् ओइने उहिहे पुँछ्लाँ, "तुँ ख्रीष्ट फेन नै हुइतो, एलिया फेन नै हुइतो, उ परमेश्वरके अगमवक्ता फेन नै हुइतो कलेसे काकरे डुब्कि देथो?" 26 यूहन्ना ओइन्हे जवाफ देहल, "मै ते पानीलेके डुब्कि देथुँ, पर तुहुरिन्के बिच्चेम एक जाने ठरह्याइल बताँ, जिहिहे तुहुरे नै चिहिन्थो। 27 मोरिक पाछे अउइया वहे हुइताँ, जेकर थेन यी लायकके फेन मै नै हुइतुँ कि मै हुँकार असिन नोकर बने सेकुँ, जे जुत्तक टेनी खोल्ना काम करत।" 28 यी बात यर्दन लदियक उपार बेथानिया गाउँमे हुइल रहे, जहाँ यूहन्ना डुब्कि देहतेहे।

29 दोसुर दिन येशूहे अपन ओहोँर आइत देख्के डुब्कि देहुइया यूहन्ना कहल, "हेरो, अपनहे बलिदान करके संसारके पाप उठाके लैजुइया परमेश्वरके पठ्वा! 30 ऊ वहे हुइताँ, जेकर बारेमे मै कहल रहुँ, ‘महिन्से पाछे एकथो मनैया अइहीँ, जे महिन्से फेन भारी बताँ, काकरेकी ऊ महिन्से फेन आघेसे रहिँत।’ 31 ऊ ख्रीष्ट हुइताँ कहिके मै अप्निहीँ फेन हुँकिन्हे नै चिन्हल रहुँ। पर हुँकिन्हे इजरायलके मनै चिन्हे सेकिँत कहिके मै पानीलेके डुब्कि देती अइनु।" 32 यूहन्ना असिके कती गवाही देहल, "मै पवित्र आत्माहे परेउनक रुपमे स्वर्गमेसे उतरके आके हुँकार उप्पर बैठल देख्नु। 33 मै ते हुँकिन्हे नै चिन्हल रहुँ, पर जे महिन्हे पानीलेके डुब्कि देहक लग पठाइल, वहे महिन्हे कहल, ‘जेकर उप्पर तुँ पवित्र आत्माहे उतरत और बैठत देख्बो, पवित्र आत्मालेके डुब्कि देहुइया वहे हुइताँ।’ 34 मै देखल बतुँ और मै तुहुरिन्हे जात्तिक कहतुँ, कि परमेश्वरके छावा वहे हुइताँ।"

35 फेनदोस्रे दोसुर दिन यूहन्ना अपन दुईथो चेलनके संग ठरह्याइल रहे। 36 ऊ येशूहे जैती रहल देख्के कहल, "हेरो, परमेश्वरके पठ्वा!" 37 ओकर कलक यी बात सुनके उ दुनु चेलनके येशूक पाछे लागगिलाँ। 38 येशू घुमके हेरलाँ और ओइन्हे अपन पाछेपाछे आइत देख्के ऊ ओइन्हे पुँछ्लाँ, "तुहुरे का चहथो?" ओइने हुँकिन्हे कलाँ, "गुरुजी, अप्नि कहाँ रथी?" 39 येशू ओइन्हे कलाँ, "आऊ और तुहुरे देख्बो।" जब ओइने हुँकार संग हुँकार रना ठाउँ हेरे गैलाँ ते साहिँ जुनिक लगभग चार बजगिल रहे। तबेकमारे बाँकी रहल समय ओइने वहैँ रुकगिलाँ। 40 यूहन्नक कहल बात सुनुइया और येशूक पाछे लगुइया उ दुई जहनमेसे एकथो सिमोन पत्रुसके भैया अन्द्रियास रहे। 41 ऊ आघे अपन सग्गे भैया सिमोनहे भेँटा करके उहिहे कहल, "हम्रे ख्रीष्टहे भेटागिल बती।" 42 अन्द्रियास सिमोन पत्रुसहे येशूक थेन नानल। येशू सिमोन पत्रुसहे हेरलाँ और कलाँ, "तुँ यूहन्नक छावा सिमोन हुइतो, तुँ केफास (जेकर मतलब हो, चट्टान) कहिजिबो।"

43 दोसुर दिन येशू गालील प्रदेशमे जैना पक्का करलाँ। और फिलिपहे भेँटा करके उहिहे कलाँ, "मोरिक पाछे लागो।" 44 फिलिप फेन अन्द्रियास और पत्रुसके गाउँ बेथसेदक रहे। 45 फिलिप नथानेलहे भेँटा करके कहल, "हम्रे उ मनैयाहे भेटागिल बती, जेकर बारेमे मोशक नियम कानुनमे और अगमवक्तन फेन लिखल रहिँत, ऊ नासरत गाउँक योसेफके छावा येशू हो।" 46 नथानेल उहिहे कहल, "का नासरत गाउँमेसे फेन मजा चिज आई सेकी?" फिलिप उहिहे कहल, "आके हेरो।" 47 येशू नथानेलहे अपन ओहोँर आइत देख्के ओकर बारेमे कलाँ, "हेरो, यी जात्तिके इजरायल जातिक विश्वासयोग्य सन्तान हो, जे पूरा रुपमे ईमानदार बा।" 48 नथानेल येशूहे पुँछल, "अप्नि महिन्हे कसिके चिहिन्थी?" येशू उहिहे जवाफ देलाँ, "फिलिप तुहिन्हे बलैनासे आघे, अञ्जीरके रुख्वक तरे मै तुहिन्हे देखल रहुँ।" 49 नथानेल हुँकिन्हे कहल, "गुरुजी, अप्नि परमेश्वरके छावा हुइती; अप्नि इजरायलके राजा हुइती।" 50 येशू उहिहे जवाफ देलाँ, "मै तुहिन्हे अञ्जीरके रुख्वक तरे देख्नु कनु, का तबे तुँ विश्वास करतो? तुँ यिहिसे फेन बरबर काम देख्बो।" 51 तब् येशू उहिहे कलाँ, "जात्तिके, मै तुहिन्हे कहतुँ, तुँ स्वर्गहे खुलल देख्बो, और परमेश्वरके स्वर्गदूतनहे मै, मनैयक छावक उप्पर चहुँरत और उतरत देख्बो।"