1 निस्तार-तिहुवारके छे दिन आघे येशू बेथानिया गाउँमे अइलाँ। वहाँ लाजरस बैठे, जिहिहे येशू मुअलमेसे जिवाइल रहिँत। 2 ओइने हुँकार लग वहाँ संझक लग बेरी पकैले रहिँत। मार्था सेवा-सत्कार करे, और लाजरस भर हुँकारे संग खाई बैठुइयनमेसे एकथो रहे। 3 तब् मरियम लगभग आधा लिटर जतरा जटामसिक बहुमूल्य महँकना तेल नानके येशूक गोरामे अख्न्याइल। तब् हुँकार गोरा अपन कपारिक भुट्लालेके पोँछल, और अत्तरके बाससे घर भरगिलस। 4 पर येशूक चेलनमेसे एकथो, अर्थात हुँकिन्हे पक्राई खोजुइया करियोत गाउँक यहूदा कहल, 5 "का यी बहुमूल्य महँकना तेल तीन सौ चाँदीक सिक्कामे बेँचके उ रकम गरीबनहे देलेसे नै हुइना रहे?" 6 पर ऊ गरीबनके ख्याल करके यी नै कहल रहे। काकरेकी उ चोरवा रहे, पैँसक ठैली वहे धारे, और ओम्नेमेसे चोराए। 7 येशू कलाँ, "यिहिहे कुछु ना कहो, ऊ महिन्हे समयसे पैलेहेँ दफ्नैना तयारीक लग असिके करता। 8 काकरेकी गरीबनके तुहुरिन्के संग रोज रथाँ, पर मै ते रोज तुहुरिन्के संग नै रहम।"

9 यहूदिनके एकथो बरवार भीड़ येशू वहाँ बताँ कहिके पता पागिलस। और येशूक लग किल नै होके मुअलमेसे जित्ती पारल लाजरसहे फेन हेरक लग ओइने वहाँ आइल रहिँत। 10 तबेकमारे मुख्य पुजारीनके लाजरसहे फेन मुवैना योजना बनैलाँ। 11 काकरेकी ओक्रेहे कारण बहुत्ते मनै यहूदी दलके नेतनहे अस्वीकार करके येशूकमे विश्वास करे लागल रहिँत।

12 दोसुर दिन तिहुवारमे अउइया बरवार भीड़के मनै येशू यरुशलेम शहरमे आइतताँ कना सुन्लाँ। 13 और मनै खझरिक दहियाँ लेके हुँकिन्हे स्वागत करक लग चिल्लाई लग्लाँ, "होसन्ना! धन्य हुइँत परमप्रभुक नाउँमे अउइया इजरायलके राजा!" 14 तब् यरुशलेम शहरमे पुग्तीकिल येशू गडहक एकथो बछरवक उप्पर बैठ्गिलाँ। जसिके पवित्र शास्त्रमे लिखल बा, 15 "सियोनके छाई, ना डरा। हेर, तोरिक रज्वा गडहक बछरवामे सवार होके आइतताँ।" 16 यी बात येशूक चेलनके पहिले ते नै बुझ्लाँ। पर येशूक महिमा होके सेक्लिन ते यी बात हुँकार बारेमे लिखगिल रहे, और यी काम ओइने हुँकार लग करलाँ कहिके ओइने सम्झलाँ।

17 जब येशू लाजरसहे चिहानमेसे बलाके मुअलमेसे जित्ती कराइतिहिँत, तबसे येशूक संग रहुइया भीड़के मनै हुँकार गवाही देती रलाँ। 18 येशू चमत्कार कर्लक कारण भीड़के मनै येशूहे भेँटा करे गैल रहिँत। काकरेकी ओइने सुन्ले रहिँत कि येशू यी चमत्कार करलाँ। 19 तब् फरिसीनके एकदोसर जहनहे कहे लग्लाँ, "हेरो, हम्रे कुछु नै करे सेकथुइति। देखतो, पूरा संसार ओकर पाछे लागसेकल!"

20 वहाँ केऊ-केऊ ग्रीक देशके मनै फेन रहिँत, जेने निस्तार तिहुवारमे आराधना करक लग यरुशलेम शहरमे आइल रहिँत। 21 ओइने गालील प्रदेशके बेथसेदा गाउँक मनैया फिलिपके थेन आके असिक कहिके बिन्ती करलाँ, "हेरी संघारी! हम्रे येशूहे भेँटा करे चहथी।" 22 फिलिप जाके अन्द्रियासहे कहल, और अन्द्रियास और फिलिप जाके येशूहे कलाँ। 23 येशू ओइन्हे जवाफ देलाँ, "मै, मनैयक छावक महिमित हुइना समय आपुगल बा। 24 जात्तिके, मै तुहुरिन्हे कहतुँ, गोहूँक बिया माटीमे परके नै मुअल कलेसे उ एक्केली रहत। पर उ मुगिल कलेसे उ बहुत्ते फारा फराइत। मोरिक हालत फेन अस्तेहेँ हुई। 25 अपन ज्यानके माया करुइया उ गुमाई। पर अपन ज्यानहे यी संसारमे घृणा करुइया भर सदाकालके जीवनके लग उ सुरक्षित धारत। 26 केऊ मोरिक सेवा करत कलेसे उ मोरिक चेला बने। तब मै जहाँ बतुँ, वहाँ मोरिक सेबक फेन रही। केऊ मोरिक सेवा करी कलेसे बाबा ओकर कदर करी। 27 आब मोरिक प्राण दुखि होगिल बा, और मै का कहुँ? ‘हे बाबा, हुई कलेसे महिन्हे यी परस्थितिसे बँचाले?’ पर यक्रेहेक लग मै यी संसारमे अइनु ताकि मै दुःख सहुँ। 28 हे बाबा, यी देखा कि तैँ कतरा महिमित बते।" तब् स्वर्गमेसे एकथो असिन आवाज आइल, "मै यी प्रकट करल बतुँ कि मै कतरा महिमित बतुँ, और मै यिहिहे फेनदोस्रे प्रकट करम।" 29 तब जोन मनै ठरह्याके आवाज सुनतिहिँत, ओइने कलाँ कि बद्री गुरगुराइता। दोसुर जाने कलाँ, "स्वर्गदूत हुँकिन्हे कुछु कलिन!" 30 येशू जवाफ देलाँ, "यी आवाज तुहुरिन्के लग बोलगिलस, मोरिक लग नै हो। 31 आब यी संसारके मनैनके न्याय करक लग परमेश्वरके समय आगिल बा। और यी संसारके शासक शैतान बाहेर फेँकाजाई। 32 और जब मै धर्तीमे क्रूसमे टँगाजिम, तब मै सक्कु मनैनहे अपन ओहोँर लयानम।" 33 येशू यी जनादेलाँ कि ऊ कसिके मुहीँ। 34 भीड़के मनै येशूहे पुँछ्लाँ, "ख्रीष्ट सदामान जित्ती रहिहीँ कहिके हम्रे पवित्र शास्त्रमेसे सुनल बती। अप्नि कसिके कहती कि मनैयक छावा उठाजाई? यी मनैयक छावा भर के हो?" 35 येशू ओइन्हे कलाँ, "अभिन थोरचे बेरसम ओजरार (येशू) तुहुरिन्के संग बा। ओजरार तुहुरिन्के संग रहतसम तुहुरे नेङघुम करो, ताकि अंधार तुहुरिन्हे ना छोपे। केऊ अंधारमे नेङघुम करत कलेसे, ऊ नै जानत कि ऊ कहाँ जाइता। 36 जबसम ओजरार तुहुरिन्के संग बा, तबसम तुहुरे ओजरारमे विश्वास करो, और तुहुरे ओजरारके लरका बनो।" यी बात कहिके सेकके, येशू वहाँसे चलगिलाँ, और ओइन्से दूरे रलाँ।

37 येशू ओइन्के आघे अतरा चमत्कार कर्ले रहिँत, तभुन फेन ओइने हुँकारमे विश्वास नै करलाँ। 38 ताकि परमेश्वरके अगमवक्ता यशैया ज्या कले रहे, उ वचन सँच होजाए। ऊ असिके कहल रहे, "हे प्रभु, हमार सन्देशमे केऊ फेन विश्वास नै करल, और केऊ नै बुझत कि यी तोरिक पराक्रमी शक्ति रहे।" 39 तबेकमारे ओइने विश्वास करे नै सेक्लाँ। काकरेकी यशैया फेनदोस्रे असिक कहल बा, 40 "परमेश्वर ओइन्के आँखी तुमदेहल बतिन। और ओइन्के मन सुस्त करादेले बतिन। असिके ओइने आँखीलेके ना देखिँत। और मनलेके ना बुझिँत। नै ते ओइने घुमजिहीँ, और महिन्हे ओइन्हे चोख्वाई परी।" 41 यशैया यी बात कहल, काकरेकी ऊ येशूक भविष्यक महिमा देखल, और हुँकार बारेमे बात बत्वाइल। 42 तभुन फेन शासकहुँक्रिहिनमेसे बहुत्ते जाने हुँकारमे विश्वास करलाँ। पर फरिसीनके डरकमारे ओइने खुल्ला रुपमे नै मानिँत। काकरेकी ओइने डराँइत कि ओइन्हे बैठक भवनमेसे बाहेर ना निकारदिँत। 43 काकरेकी परमेश्वरके करना प्रशंसासे मनैनके कर्लक प्रशंसा ओइने धेउर रुचाँइत।

44 येशू भीड़हे गोहराके कलाँ, "जे मोरिकमे विश्वास करत, उ महिन्हे नै होके महिन्हे पठुइयक उप्पर विश्वास करत। 45 जे महिन्हे देखत, उ महिन्हे पठुइयाहे देखत। 46 मै संसारमे ओजरारके रुपमे आइल बतुँ, ताकि मोरिकमे विश्वास करुइयन अंधारमे ना रहिँत। 47 यदि केऊ मोरिक बात सुनके ओकर पालन नै करत कलेसे मै उहिहे दोषी नै ठहरैथुँ। काकरेकी मै संसारके मनैनहे दोषी ठहराइक लग नै, पर संसारहे बँचाइक लग अइनु। 48 जे महिन्हे अस्वीकार करत, और मोरिक बात ग्रहण नै करत। ओकर लग एकथो असिन न्यायधीश बा, जे महिन्हे अस्वीकार करुइयनके न्याय करी। या जोन बात मै बत्वाइल बतुँ, वहे ओइन्हे अन्त्यक दिनमे दोषी ठहराई। 49 काकरेकी मै अपने इच्छासे नै बोल्नु, पर मोरिक बाबा जे महिन्हे पठाइल बा, वहे महिन्हे अह्राइल बा कि मै का कहुँ और कसिके कहुँ। 50 मै जन्थुँ, कि ओकर आज्ञा पालन करना कलक सदाकालके जीवन ओहोँर जैना हो। तबेकमारे मै तुहुरिन्हे वहे बतैथुँ, ज्या बाबा महिन्हे बताई कले बा।"