यूहन्ना 13

प्रभुभोज

1 निस्तार-तिहुवारसे पैलेहेँ येशू जानलेलाँ कि यी संसारमेसे विदा होके बाबक थेन जैना हुँकार समय आगिल बा। तब् जस्तेके संसारमे रहल अपन पाछे लगुइया सक्कुहुनहे प्रेम करिँत, ओस्तेके ऊ ओइन्हे अन्त्यसम पूरा रुपमे प्रेम करलाँ। 2 येशू और हुँकार चेलनके बेरी जुनिक खाना खाइतिहिँत। शैतान पैलेहेँसे सिमोनके छावा करियोत गाउँक यहूदक मनमे येशूहे धोखा देना विचार दार सेकल रहे। 3 बाबा हुँकिन्हे सक्कु चिजमे अधिकार दैदेले बा, और ऊ परमेश्वरके थेनसे अइलाँ, और परमेश्वरेके थेन फिर्ता जाइतताँ कना बात येशूहे पता रहिन। 4 तब् ऊ खाना खाई बैठल ठाउँसे उठ्गिलाँ, और बाहेर घालल कोट खोलके अपन करहिँउमे तौलिया बेहेँरलेलाँ।

येशू अपन चेलनके गोरा धुइलक

5 तब् येशू तस्लामे पानी उल्दलाँ और चेलनके गोरा धुई लग्लाँ, और अपन बेँह्रल तौलियासे ओइन्के गोरा पोँछे लग्लाँ। 6 जब येशू सिमोन पत्रुसके थेन अइलाँ, तब ऊ येशूहे कहल, "हे प्रभु, का अप्नि मोरिक गोरा धुइबी?" 7 येशू उहिहे जवाफ देलाँ, "मै ज्या करतुँ, ओकर मतलब तुँ अभिन नै बुझ्बो, पर पाछे बुझ्बो।" 8 पत्रुस येशूहे कहल, "अप्नि मोरिक गोरा कबु नै धुइबी।" तब यी सुनके येशू उहिहे जवाफ देलाँ, "यदि मै तोहाँर गोरा नै धोदेनु कलेसे तोहाँर और मोरिक कौनो सम्बन्ध नै रही।" 9 सिमोन पत्रुस हुँकिन्हे कहल, "हे प्रभु, अप्नि मोरिक गोरा किल नै, मोरिक हाँथ और कपार फेन धोदी।" 10 येशू उहिहे कलाँ, "जे लाहासेकल बा, उ मनैयाहे ओकर गोरा किल धुइना जरुरी बतिस: ओकर पूरा शरीर शुद्ध बतिस। और तुहुरे शुद्ध बतो, पर सक्कु जाने नै हुइतो।" 11 काकरेकी हुँकिन्हे विश्वासघात करुइयाहे ऊ चिन्हल रहिँत। तबेकमारे ऊ कलाँ, "तुहुरे सक्कु जाने शुद्ध नै हुइतो।"

गोरा धुइनक मतलब

12 जब ओइन्के गोरा धोके सेक्लाँ ते येशू अपन बाहेर घल्ना कोट घालके फेनदोस्रे बैठ्गिलाँ। तब् ऊ ओइन्हे कलाँ, "का तुहुरे बुझ्लो कि मै तुहुरिन्के संग यी का कर्नु? 13 तुहुरे महिन्हे ‘गुरु और प्रभु’ कथो, उ तुहुरे ठिके कथो, काकरेकी मै तुहुरिन्के प्रभु और गुरु हुइतुँ। 14 यदि तुहुरिन्के प्रभु और गुरु होके मै तुहुरिन्के गोरा धुइल बतुँ कलेसे तुहुरे फेन अपनहे नम्र बनाके एकदोसर जहनके गोरा धुई परत। 15 काकरेकी मै तुहुरिन्हे एकथो नमूना देखाइल बतुँ कि जसिके मै तुहुरिन्के संग करल बतुँ, तुहुरे फेन ओस्तेहेँ करो। 16 जात्तिके मै तुहुरिन्हे कहतुँ, नोकर अपन मलिक्वासे भारी नै रहत, और निउतरह्या निउतरह्याहे पठुइयासे भारी नै रहत। 17 आब जब तुहुरे यी बातहे जानलेले बतो कलेसे ओकर पालन करो, ताकि तुहुरे धन्य होजाऊ।"