1 येशू यूहन्नासे फेन धेउर चेला बनाइतताँ, और डुब्कि फेन देहतताँ कहिके फरिसीनके सुनलेलाँ कना बात जब येशू पता पैलाँ। 2 वास्तवमे येशू अप्निहीँ ते नै पर हुँकार चेलनके डुब्कि दिँत। 3 तब येशू अपन चेलनके संग यहूदिया प्रदेश छोरके गालील प्रदेशमे फिर्ता चलगिलाँ। 4 यी परमेश्वरके इच्छा रहिन कि येशू सामरिया प्रदेश ओहोँरसे होके जाँइत। 5 तबेकमारे ऊ सामरिया प्रदेशके सुखार कना गाउँमे अइलाँ। जोन गाउँ याकूब अपन छावा योसेफहे देलक ठाउँक लग्गेहेँ बा। 6 और याकूब जोन कुवाँ कोरल रहे, उ कुवाँ अभिन फेन वहैँ रहे। और येशू नेंग्के मिच्छैलक ओहोँरसे उ कुवँक लग्गे बैठ्गिलाँ। और यी बात लगभग दुपहरमे हुइल। 7 तब्बेहेँ सामरिया प्रदेशके एकथो जन्नी मनैया पानी भरे वहाँ आइल। येशू उ जन्नी मनैयाहे कलाँ, "महिन्हे पानी पिए देऊ।" 8 काकरेकी उ समयमे येशूक चेलनके गाउँमे खैना चिज किने गैल रहिँत। 9 तब् उ सामरी जन्नी हुँकिन्हे कहल, "अप्नि एकथो यहूदी हुइती और मै एकथो सामरी जन्नी हुइतुँ, महिन्से अप्नि काकरे पानी माँगती?" काकरेकी यहूदिनके सामरीनके संग कौनो फेन सम्बन्ध नै धर्थाँ। 10 येशू उहिहे जवाफ देलाँ, "तुँ नै जन्थो कि परमेश्वर तुहिन्हे का देना चहथाँ। और तुँ यी फेन नै जन्थो कि तुहिन्से पानी मगुइया के हो। यदि तुँ जन्तो कलेसे तुँ महिन्से मंग्तो, और मै तुहिन्हे उ पानी देतुँ, जोन पानी जीवन देहत।" 11 उ जन्नी हुँकिन्हे कहल, "अप्निक थेन पानी भरना भाँरा ते नै हो, और कुवाँ फेन गजब गहिँर बा। ते अप्निक थेन उ पानी कहाँसे आई, जोन पानी जीवन देहत? 12 का अप्नि हमार पुर्खा याकूबसे भारी हुइती? जे हम्रिहिन्हे यी कुवाँ देलाँ, और ऊ अप्निहीँ, हुँकार लरका और हुँकार गैया-गोरून फेन यहे कुवँक पानी पिलाँ।" 13 येशू उहिहे जवाफ देलाँ, "यी पानी पिउइया प्रत्येक जहनहे फेनदोस्रे प्यास लागजिहिन। 14 पर जे मोरिक देहल पानी पिई, उहिहे कबु प्यास नै लग्हिस। और जोन पानी मै उहिहे देहम, ऊ असिन पानी देती रना मूल बनजाई, जोन सदाकालके जीवन दि।" 15 उ जन्नी हुँकिन्हे कहल, "हे प्रभु, उ पानी महिन्हे दि ताकि महिन्हे प्यास ना लागे, और पानी भरे दूर आई ना परे।" 16 येशू उहिहे कलाँ, "जाऊ, और यहाँ अपन थरवाहे बलाके नानो।" 17 उ जन्नी कहल, "मोरिक थरवा नै हो।" येशू उहिहे कलाँ, "तोहाँर थरवा नै हो कहिके तुँ ठिके कहतो, 18 काकरेकी तुँ पैलेहेँ पाँचथो थरवा लेसेकल बतो, और अब्बे जेकर संग तुँ बतो, ऊ फेन तोहाँर थरवा नै हो कहिके तुँ जात्तिके कलो।" 19 उ जन्नी हुँकिन्हे कहल, "हे प्रभु, महिन्हे असिन लागता कि अप्नि परमेश्वरके अगमवक्ता हुइती। 20 मोरिक सामरी पुर्खन यहे दम्मरवामे परमेश्वरके आराधना करिँत। और तुहुरे यहूदी मनै कथो कि आराधना करना ठाउँ यरुशलेम किल हो।" 21 येशू उहिहे कलाँ, "ए नारी, मोरिक बातमे विश्वास करो, उ समय आइता, जब तुहुरे ना ते यी दम्मरवामे, ना यरुशलेम शहरमे परमेश्वरके आराधना करबो। 22 तुहुरे सामरी मनै ओकर आराधना करथो, जिहिहे तुहुरे नै चिहिन्थो। और हम्रे यहूदी मनै ओकर आराधना कर्थी जिहिहे चिहिन्थी, काकरेकी मुक्ति भर यहूदिनसे आइत। 23 पर उ समय आइता बेन अइहीगिल बा, जब सच्चा अराधकहुँक्रे बाबाहे आत्मा और सच्चाइमे आराधना करहीँ। काकरेकी बाबा अस्तेहेँ अराधकहुँक्रिहिनहे खोजत। 24 परमेश्वर आत्मा हुइँत, तबेकमारे हुँकार अराधकहुँक्रे आत्मा और सच्चाइमे आराधना करे परत।" 25 उ जन्नी हुँकिन्हे कहल, "मै जन्थुँ कि मसिह अइहीँ, जिहिहे ख्रीष्ट कहिजाजाइत। और जब ऊ अइहीँ, तब् वहे हम्रिहिन्हे सक्कु बात बतादिहीँ।" 26 येशू उहिहे कलाँ, "तुहिन्से बात बतुइया, मै वहे हुइतुँ।" 27 तब्बेहेँ हुँकार चेलनके आगिलाँ। और येशूहे उ जन्नी मनैयक संग बात बत्वाइत देख्के ओइन्हे अचम्म लग्लिन। तभुन फेन ओइन्मेसे हुँकिन्हे पुँछ्ना हिम्मत केक्रो नै हुइलिन, कि येशू उ जन्नीसे काकरे बात बत्वाइतताँ, या उ जन्नीसे का जाने चाहतिहिँत? 28 तब् उ जन्नी अपन गग्री वहैँ छोरके नगर ओहोँर चलगिल। और मनैनहे कहे लागल, 29 "आऊ, एकथो मनैयाहे हेरो, जे मोरिक कर्लक सक्कु कामके बारेमे महिन्हे बतादेलाँ। कहुँ यी ख्रीष्ट ते ना हुइँत?" 30 तब् येशूहे हेरक लग वहाँक मनै नगरमेसे निकरके आई लग्लाँ। 31 अत्रैमे येशूक चेलनके हुँकिन्हे असिक कहिके बिन्ती करलाँ, "गुरुजी, कुछु खा ली।" 32 पर येशू ओइन्हे कलाँ, "मोरिक थेन असिन खाना बा, जेकर बारेमे तुहुरे कुछु नै जन्थो।" 33 तब चेलनके आपसमे कलाँ, "केऊ हुँकार लग खाना नानदेहल कि का?" 34 येशू ओइन्हे कलाँ, "मोरिक खाना कलक उ परमेश्वरके इच्छा पालन करना हो, जे महिन्हे पठाइल बा, और उ कामहे पूरा करना हो, जोन काम ऊ महिन्हे देले बा। 35 का तुहुरे यी नै कथो कि ‘बाली कट्ना अभिन चार महिना बाँकी बा?’ हेरो मै तुहुरिन्हे कहतुँ, अपन आँखी खोलो! यहाँ आइतताँ ओइन्हे हेरो। जेने सदाकालके जीवन भेटाइक लग आग्गिहीँसे तयार बताँ। 36 आग्गिहीँसे कटुइयन काम करतताँ, और ओकर मतलब यी हो कि ओइने उ मनैनहे जमा करतताँ, जेने सदाकालके जीवन भेटैहीँ। ताकि जमा करुइया मनै और जमा हुइल मनै दुनु जाने मिलके आनन्द मनाई सेकिँत। 37 काकरेकी यहाँ यी कहकुत सोहाइत कि ‘बोउइया एकथो कटुइया दोसुर।’ 38 मै तुहुरिन्हे उ खेट्वामे काटे पठैनु, जहाँ तुहुरे मेहनत नै कर्लो, पर दोसुर जाने मेहनत करलाँ। और तुहुरे उ अनाज जमा कर्बो, जेकर लग दोसुर जाने मेहनत करलाँ।" 39 और उ जन्नीक कलक कारण उ नगरके बहुत्ते सामरीन येशूकमे विश्वास करलाँ; जे यी कहल रहे कि "जे मोरिक कर्लक सक्कु कामके बारेमे महिन्हे बतादेलाँ।" 40 जब उ सामरी मनै येशूक थेन अइलाँ, तब् ओइने हुँकिन्हे बिन्ती करे लग्लाँ कि हमार थेन रहिजाई। तब ऊ वहाँ दुई दिन रलाँ। 41 तब् हुँकार वचनके कारण आकुर बहुत्ते जाने हुँकारमे विश्वास करलाँ। 42 और उ मनै उ जन्नी मनैयाहे कलाँ, "आब हम्रे तोरिक कलक बातके कारण किल विश्वास नै करथुइति। काकरेकी हम्रे अप्निहीँ सुनलेले बती, और हम्रे जन्थी कि जात्तिके संसारके मुक्तिदाता यहे हुइँत।"

43 तब दुई दिन पाछे वहाँसे निकरके येशू गालील प्रदेशमे चलगिलाँ। 44 काकरेकी येशू अप्निहीँ गवाही देलाँ, कि परमेश्वरके अगमवक्ताहे ओकर अपने देशमे आदर नै हुइथिस। 45 जब येशू गालील प्रदेशमे अइलाँ, तब् ऊ यरुशलेम शहरमे तिहुवारके समयमे ज्या कर्ले रहिँत उ सक्कु काम देख्लक ओहोँरसे गालील प्रदेशके मनै हुँकिन्हे स्वागत करलाँ। काकरेकी ओइने फेन तिहुवारमे गैल रहिँत। 46 तब येशू गालील प्रदेशके काना नगरमे अइलाँ, जहाँ ऊ पानीहे अंगुरके रस बनाइल रहिँत। वहाँ रज्वक एकथो कर्मचारी रहे, जेकर छावा कफर्नहुम नगरमे बेमार रहिस। 47 येशू यहूदिया प्रदेशमेसे गालील प्रदेशमे आइल बताँ कना सुनके ऊ येशूक थेन गैल, और हुँकिन्हे बिन्ती करे लागल कि "मोरिक संग जाके मोरिक छावाहे चोख्वादि।" काकरेकी ओकर छावा मुचुकल रहिस। 48 येशू उहिहे कलाँ, "जबसम तुहुरे चिन्हा और अचम्मक काम नै देख्बो तबसम तुहुरे ख्रीष्टके रुपमे महिन्हे विश्वास नै कर्बो।" 49 रज्वक कर्मचारी हुँकिन्हे कहल, "हे प्रभु, मोरिक छावा मुनासे आघे अप्नि आदेबी।" 50 येशू उहिहे कलाँ, "जाऊ, तोहाँरिक छावा नै मुई।" उ मनैया येशूक कहल बातमे विश्वास करल, और वहाँसे चलगिलस। 51 जब उ जाइबेर डग्रेहेमे पलिरहे, तब ओकर नोकरनके उहिहे भेटाके उहिहे बतैलाँ कि अप्निक छावा जित्ती पलि बा। 52 ऊ ओइन्हे पुँछल कि कबसे उहिहे मजा लागे लग्लिस। तब ओइने उहिहे कलाँ, "काल दुपहरके एक बजेसे जुरी उहिहे छोरे लग्लिस।" 53 तब उ लौँदक बाबा जानगिलस कि यी वहे समयसे हुइल, जोन समयमे येशू उहिहे कलाँ, "तोहाँरिक छावा नै मुई।" यी देख्के ऊ और ओकर सारा परिवार येशूकमे विश्वास करलाँ। 54 यी येशूक दोस्रा चिन्हा रहिन जोन यहूदिया प्रदेशमेसे फिर्ता आके गालील प्रदेशमे करलाँ।