1 ओकरपाछे यहूदिनके एकथो तिहुवार रहिन, और येशू गालील प्रदेशमे गैलाँ। 2 यरुशलेम शहरमे भेँरी-दवारीक लग्गे एकथो पानीक कुण्डा बा। यी पानीक कुण्डाहे हिब्रू भाषामे बेथस्दा कहिजाइत। और यी कुण्डा आँजर पाँजरसे पाँचथो खम्बक उप्पर बनल एकथो छँपरासे घेरल रहे। 3 ओकर आँरितिर मेरमेरके बेमार मनै आँधर, नाँगर और कुँज रोग लागल मनै पस्रल रहतिहिँत। ओइने पानी कब छल्की कहिके अँस्याइँत। 4 काकरेकी परमेश्वरके एकथो स्वर्गदूत घनी-घनी पानीक कुण्डामे उतरके पानी हिलादेहे। और पानी छल्कती किल जे सुरुमे पानीमे जाए, जसिन रोगसे सत्वा पाइल रलेसे फेन ऊ चोखाजाए। 5 वहाँ अरतिस सालसे बेमार रहल एकथो मनैया रहे। 6 येशू उहिहे वहाँ पस्रल देख्लाँ। तब् नम्मा समयसे ऊ यी दशामे बा कहिके जानके येशू उहिहे पुँछ्लाँ, "का तुँ चोखैना चहथो?" 7 उ बेमार मनैया हुँकिन्हे जवाफ देहल, "हे प्रभु, जब पानी छल्काजाइत, तब महिन्हे पानीक कुण्डामे लैजुइया मोरिक केऊ मनै नै रथाँ। मै जैतीजैती महिन्से आघे दोसुर मनैया पानीमे कुदुक जाइत।" 8 येशू उहिहे कलाँ, "ठरह्याजाऊ, अपन दरी उठाऊ और नेँगो।" 9 उ मनैया जुरतेहेँ चोखागिल, और अपन दरी उठाके ऊ नेगे लागल। यी यहूदिनके बिँसैना दिनमे हुइल रहे। 10 तबेकमारे चोख्वागिलक उ मनैयाहे यहूदी दलके नेतन कलाँ, "आज ते हमार बिँसैना दिन हो। मोशक नियम कानुन अनुसार आज तुहिन्हे दरी बोक्ना मजा नै हो।" 11 पर ऊ ओइन्हे जवाफ देहल, "जे महिन्हे चोख्वाइल, वहे महिन्हे कहल, ‘अपन दरी उठाऊ और नेँगो।’" 12 ओइने उहिहे पुँछ्लाँ, "उ कोन मनैया हो, जे तुहिन्हे दरी बोकके नेगे कहल?" 13 पर जे चोख्वागिल रहे, उ मनैया नै जाने कि उहिहे के चोख्वाइल। काकरेकी उ ठाउँमे भीड़ हुइलक कारण येशू वहाँ ओल्तार होगिल रहिँत। 14 ओकरपाछे येशू उहिहे मन्दिरमे भेटाके कलाँ, "हेरो, तुँ ते चोखागिल बतो। तबेकमारे फेनदोस्रे पाप ना करहो, और असिन ना होए कि तोहाँरमे आकुर धेउर खराबी आजाए।" 15 तब चोख्वागिलक उ मनैया यहूदी दलके नेतनके थेन जाके कहिदेहल कि जे महिन्हे चोख्वाइल ऊ येशू हुइताँ।

16 तबेकमारे यहूदी दलके नेतन येशूहे सताई लग्लाँ। काकरेकी ऊ यी काम यहूदिनके बिँसैना दिनमे करल रहिँत। 17 तब् येशू उहिहे कलाँ, "मोरिक परमेश्वर बाबा अभिनसम काम कर्ती बा, और मै फेन काम कर्ती बतुँ।" 18 तबेकमारे यहूदी दलके नेतन येशूहे मुवाइक लग आकुर धेउर कोशिस करे लग्लाँ। काकरेकी ओइन्के अनुसार येशू बिँसैना दिनके नियम किल नै टुरल रहिँत। पर परमेश्वरहे अपन बाबा कहिके फेन अपनहे परमेश्वरके बराबर ठहराइतिहिँत। 19 यम्ने येशू ओइन्हे कलाँ, "जात्तिके, मै तुहुरिन्हे कहतुँ, मै, छावा अप्निहीँ कुछु करे नै सेक्थुँ। पर बाबाहे ज्या करत देख्थुँ, वहे किल करथुँ। काकरेकी बाबा ज्या करत, छावा फेन वहे करत। 20 काकरेकी मोरिक बाबा महिन्हे प्रेम करत, ऊ महिन्हे उ सक्कु चिज देखाइत, ज्या ऊ अप्निहीँ करत। यिहिसे फेन महान काम ऊ महिन्हे देखाई, जोन देख्के तुहुरे अचम्म परजिबो। 21 जसिके बाबा मुअल मनैनहे फेनदोस्रे जिवादेहत, और ओइन्हे जीवन देहत। ओस्तेके मै फेन जिहिहे चहथुँ, उहिहे जीवन देथुँ। 22,23 उ बाहेक जसिके सक्कु जाने परमेश्वर बाबाहे आदर करथाँ, ओस्तेके ओइने छावाहे अर्थात महिन्हे फेन आदर करिँत। परमेश्वर बाबा मै छावाहे न्याय करना सारा अधिकार देले बा। यदि केऊ मोरिक आदर नै करत कलेसे ऊ महिन्हे पठुइया परमेश्वर बाबाहे फेन आदर नै करत। 24 जात्तिके, मै तुहुरिन्हे कहतुँ, जे मोरिक वचन सुनत और महिन्हे पठुइयकमे विश्वास करत, उहिहे सदाकालके जीवन मिल्हिस, और उहिहे दण्ड नै मिल्हिस। पर ऊ सदाकालके मृत्युसे बँचगिल बा, और आग्गिहीँसे लावा जीवनमे जासेकल बा। 25 जात्तिके, मै तुहुरिन्हे कहतुँ, उ समय आइता बेन अइहीगिल बा, जब मुअल मनै मोरिक आवाज सुन्हीँ जे परमेश्वरके छावा हुइतुँ। और जेने सुन्हीँ, ओइने सदाकालके लग जित्ती रहिहीँ। 26 काकरेकी जसिके जीवनके स्रोत बाबा अप्निहीँ हो, ओस्तेके ऊ मै छावाहे फेन जीवनके स्रोत हुइना अधिकार देहल बा। 27 और मै, मनैयक छावा हुइलक कारण परमेश्वर बाबा सक्कु मनैनके न्याय करना अधिकार महिन्हे देले बा। 28 यी सुनके अचम्म जिन मानो, काकरेकी उ समय आइता, जब ओइने सक्कु जाने जेने शरीरमे मुगिल बताँ ओइने मोरिक आवाज सुन्हीँ। 29 और ओइने फेनदोस्रे जित्ती होके उठजिहीँ। और जेने मजा काम करके जीवन जिअल बताँ, ओइने सदाकालके जीवन भेटाइक लग जित्ती हुइहीँ। और जेने खराब काम करके जीवन जिलाँ, ओइने दण्ड भेटाइक लग जित्ती हुइहीँ। 30 मै अप्निहीँ कुछु करे नै सेक्थुँ। जसिके ओइन्के न्याय करक लग परमेश्वर बाबा महिन्हे कहत, ओस्तेहेँके मै मनैनके न्याय करथुँ। और मोरिक करना न्याय ठिक बा, काकरेकी मै अपन इच्छा नै होके महिन्हे पठुइयक इच्छा चहथुँ। 31 यदि मै अप्निहीँ अपन बारेमे गवाही देहम कलेसे मोरिक गवाही सच्चा नै ठहरी। 32 मोरिक बाबा बा, जे मोरिक बारेमे गवाही देहत। और मै जन्थुँ कि मोरिक बारेमे ऊ ज्या गवाही देहत, उ गवाही सच्चा हो। 33 तुहुरे डुब्कि देहुइया यूहन्नक थेन अपन मनैनहे पुँछे पठैलो, और यूहन्ना फेन सच्चाइक गवाही देहल बा। 34 पर मोरिक बारेमे कौनो मनैयक गवाही देना जरुरी नै हो। पर मै तुहुरिन्हे उ गवाहीक बारेमे बताइल बतुँ, जोन यूहन्ना देहल रहे, ताकि तुहुरे मुक्ति भेटाई सेको। 35 यूहन्ना ते एकथो दिया हस रहे। और तुहुरिन्हे थोरिक बेरके लग ओकर ओजरारमे आनन्द मनैना मजा लागल। 36 पर मोरिक थेन यूहन्नक गवाहीसे भारी गवाही बा। जोन काम पूरा करक लग बाबा महिन्हे देहल बा, वहे काम मोरिक बारेमे गवाही देहत। जोन काम मै करतुँ, वहे काम गवाही देहत कि बाबा महिन्हे पठाइल बा। 37 मोरिक बाबा जे महिन्हे पठाइल, वहे मोरिक बारेमे गवाही देहल बा। ओकर आवाज तुहुरे कबु नै सुनल हुइतो, और ना ते तुहुरे उहिहे कबु देखल बतो। 38 और ओकर सन्देश तुहुरिन्के मनमे नै रहत, काकरेकी तुहुरे महिन्हे विश्वास नै करथो, जिहिहे परमेश्वर पठैलाँ। 39 तुहुरे पवित्र शास्त्रमे मनन करथो, काकरेकी तुहुरे यी सोँच्थो कि ओम्ने तुहुरिन्हे सदाकालके जीवन मिली। और यी वहे पवित्र शास्त्र हो, जे मोरिक बारेमे गवाही देहत। 40 तभुन फेन तुहुरे सदाकालके जीवन भेटाइक लग मोरिक थेन आई नै चहथो। 41 मनै मोरिक प्रशंसा करिँत कहिके मै असरा नै करथुँ। 42 पर तुहुरे परमेश्वरहे अपन मनसे प्रेम नै करथो कहिके मै जन्थुँ। 43 मै अपन बाबा परमेश्वरके अधिकारसे आइल बतुँ, और तुहुरे मोरिक कलक बात नै सुन्थो। और यदि केऊ अपने अधिकारसे आई कलेसे तुहुरे ओकर कलक मानलेबो। 44 तुहुरे मोरिकमे विश्वास करे नै सेक्बो। काकरेकी तुहुरे एकदोसर जहनसे प्रशंसा पाई चहथो। और तुहुरे एक्केथो किल रहल परमेश्वरसे प्रशंसा पैना कोशिस नै करथो। 45 तुहुरे यी ना सोँचो कि मै बाबक आघे तुहुरिन्हे दोष लगैम। पर जोन मोशकमे तुहुरे अपन आशा धारल बतो, वहे तुहुरिन्हे दोष लगाई। 46 यदि तुहुरे मोशाहे विश्वास कर्तो कलेसे महिन्हे फेन विश्वास कर्तो, काकरेकी ऊ मोरिक बारेमे लिखल रहे। 47 काकरेकी तुहुरे ओकर लिखल वचनमे विश्वास नै करथो कलेसे तुहुरे पक्कै फेन मोरिक बत्वाइल बातमे विश्वास नै करबो।"