1 बहुत्ते कर उठुइयन और दोसुर बहुत्ते जाने जेनहे यहूदी मनै पापी कहिँत, ओइने हुँकार वचन सुनक लग हुँकार लग्गे आँइत। 2 फरिसी और यहूदी कानुनके गुरुनके असिके गनगनाई लग्लाँ, "यी मनैया ते पापीनसे मिलत, और ओइन्के संग खानपिन करत।" 3 तब् येशू ओइन्हे यी दृष्टान्त कलाँ: 4 "तुहुरिन्मेसे कोन मनैया हुई, जेकर सौथो भेँरीनमेसे एकथो भेँरवा भुलागिल कलेसे, ऊ उनान्सौ भेँरीनहे हरियर डँरवामे चह्रत छोरके भुलाइल एकथो भेँरवाहे नै भेटाइतसम खोज्ती नै रहत का? 5 जब ऊ हेराइल भेँरवाहे भेटाके सेकत ते खुशी हुइती उहिहे अपन कन्धामे उठालेहत। 6 और अपन घरे जाके ऊ अपन संघरियन और परोसीनहे बलाके जमा करत, और ओइन्हे कहत, ‘मोरिक संग रमाऊ, काकरेकी मै अपन हेराइल भेँरवाहे भेटागिल बतुँ।’ 7 मै तुहुरिन्हे यी कहतुँ: असिके जब एकथो पापी मनैया अपन मन बदलके पाप करना छोरत, और परमेश्वरके ओहोँर घुमत। यी एकथो पापी मनैयक कारण परमेश्वर और हुँकार स्वर्गदूतनके बहुत खुशी हुइहीँ, जे अपन पाप करना जीवनहे छोरदेहत। ऊ और हुँकार स्वर्गदूतनके उ उनान्सौ धर्मी मनैनके कारण अतरा खुशी नै हुइहीँ, जेनहे अपन पाप करना जीवन छोरना जरुरी नै हुइतिन।"

8 येशू कलाँ, "यदि एकथो जन्नी मनैयक थेन दशथो चाँदीक सिक्का बतिस, और ओम्नेमेसे एकथो हेरागिलिस कलेसे ऊ दिया बारी और उहिहे नै भेटाइतसम घर बहार-बहार ध्यान लगाके खोज्ती रही। 9 हेराइल सिक्का भेटाके सेकके ऊ अपन संघरियन और अपन परोसीनहे बलाके कहत, ‘मोरिक संग रमाऊ, काकरेकी मै मोरिक हेराइल सिक्का भेटागिनु।’ 10 मै तुहुरिन्हे कहतुँ, अस्तेहेँके अपन मन बदलके पाप करे छोरुइया एकथो पापीक लग परमेश्वरके स्वर्गदूतनके आघे आनन्द हुइत।"

11 फेनदोस्रे येशू एकथो दृष्टान्त कलाँ, "कौनो एकथो मनैयक दुईथो छावा रहिस। 12 छोट्का छावा अपन बाबाहे कहल, ‘बाबा, मोरिक भागमे परना धन-सम्पतिक हिस्सा महिन्हे अब्बेहेँ दैदे।’ तब् ओइन्के बाबा अपन सम्पति अपन दुनु छावनहे बाँटदेहल। 13 थोरिक दिन पाछे छोट्का छावा अपन सक्कु धन-सम्पति बिटोरके दूरिक देशमे चलगिलस। और वहाँ ऐसआराम और अपन मनपर्दी जिन्गी जिके अपन सारा सम्पति उरादारल। 14 जब ओकर सक्कु धन-सम्पति खर्च होसेकल रहिस। तब ठिक्केपर वहे बेला उ देशमे बरवार अनिकाल परल। और खाइक लग ओकर थेन कुछु नै रहिगिलिस। 15 और ऊ एकथो वहे देशके नागरिक रहल मनैयक थेन काम करे गैल। और उ नागरिक उहिहे अपन खेट्वामे सुरिनहे चह्राई पठादेलिस्। 16 और ऊ अतरा जोरसे भुँखाइल रहे, कि ऊ सुरिनके खैना चाह्रा खाके फेन महा खुश रहे। काकरेकी उहिहे केऊ फेन कुछु खाई नै दिस। 17 जब उहिहे अपन अवस्थक बारेमे अक्किल अइलिस, ते ऊ सोँचे लागल कि: ‘मोरिक बाबक सक्कु कामदारनके लग पेट भरके खाके फेन उब्रना खाना बतिस, और यहाँ मै भुँखे मुअतुँ। 18 मै उठ्के अपन बाबक थेन जैम, और उहिहे कहम कि, बाबा, मै परमेश्वरके विरोधमे और तोरिक नजरमे पाप करल बतुँ। 19 आबसे मै तोरिक छावा कना लायकके नै हुइतुँ। महिन्हे तोरिक ज्यालादारी कामदारनमेसे एकथो हस मानके धारले।’"

20 "तब् उ देशहे छोरके ऊ अपन बाबक थेन फिर्ता जाइक लग निकरगिल। और ऊ दूरे रहलमे ओकर बाबई उहिहे देख्के सोग लग्लिस। और ऊ अपन छावक ओहोँर दौरल। और ऊ उहिहे उँक्वार भर पकरलेहल, और उहिहे खोब चुम्मा खैलस। 21 छावा उहिहे कहल, ‘बाबा मै परमेश्वरके विरोधमे और तोरिक नजरमे पाप करल बतुँ। और मै तोरिक छावा कना लायकके नै हुइतुँ।’ 22 पर बाबा भर अपन कामदारनहे कहल, ‘झत्तेहेँ एकदम मजा लुग्गा नानके यिहिहे घलादेऊ। और यकर हाँथेक अंग्रीमे अंग्थी, और गोरामे जुत्ता घलादेऊ। 23 और बरवार जिता मारो, और हम्रे खाई और खुशियाली मनाई। 24 काकरेकी यी असिन रहे मानो कि मोरिक छावा मुगिल रहे, और आब जित्ती होगिल बा। यी हेरागिल रहे, और आब यी मिलगिल।’ तब् ओइने खुशियाली मनाई लग्लाँ।"

25 "तब्बेहेँ ओकर बरका छावा खेट्वामे काम करतेहे। और जब ऊ खेट्वामेसे घुमके घरे आइतेहे, तब घरक लग्गे पुगल ते ऊ नाचगान कर्लक आवाज सुन्लस। 26 तब ऊ एकथो कामदारहे अपन थेन बलाके पुँछल, ‘यी का हुइता?’ 27 उ कामदार उहिहे कहल, ‘अप्निक भैया घरे फिर्ता आगिल बताँ। और अप्निक बाबा बरवार जिता मारके खुशियाली मनाइतताँ। काकरेकी हुँकार छावा मजै और स्वस्थ घुमके आइल हुँकिन्हे मिल्लिन।’ 28 यी सुनके ऊ रिसेलेके चुरचुर होगिल, और घरक भित्तर नै जाइतेहे। तबेकमारे ओकर बाबा घरेमसे बाहेर अइलिस, और उहिहे घरक भित्तर लैजाइक लग बिन्ती करे लागल। 29 पर ऊ अपन बाबाहे कहल, ‘हेर, अतरा सालसे मै तोरिक सेवा करतुँ और जबफेन तोरिक कहल बात मन्ती रनु। तभुन फेन तैँ महिन्हे मोरिक संघरियनके संग आनन्द मनाइक लग कबु फेन छेग्रिक एकथो पठ्वा तक नै देले। 30 पर जब तोरिक यी छावा जे तोरिक सारा सम्पति वेश्यनकेमे उराके आइल बा ते तैँ ओकर लग जिता मारदेले बते।’ 31 तब् ऊ उहिहे कहल, ‘हेर, मोरिक छावा, तैँ ते सदादिन मोरिके संग बते, और मोरिक ज्या जत्रा बा उ तोरिके हो। 32 पर आब हम्रिहिन्हे खुशी हुइना और खुशियाली मनैना जरुरी बा। काकरेकी यी असिन रहे मानो कि तोरिक भैया मुगिल रहे, और आब जित्ती होगिल बा। यी हेरागिल रहे, और आब यी मिलगिल बा।’"