1 येशू पवित्र आत्मासे भरपूर होके यर्दन लदियामेसे घुमगिलाँ, तब् पवित्र आत्मा येशूहे जुरतेहेँ उजाड़-ठाउँमे लैगिलिन। 2 और चालीस दिनसम उजाड़-ठाउँमे शैतानसे ऊ परीक्षित हुइलाँ। उ दिनमे ऊ कुछु नै खैलाँ, और चालीस दिन ओराइल ते ऊ भुँखागिलाँ। 3 तब् शैतान हुँकिन्हे कहल, "यदि अप्नि परमेश्वरके छावा हुइती कलेसे यी पठराहे रोटी बनजाऊ कहिके आज्ञा देके साबित करी, ताकि अप्नि उहिहे खाइसेकी।" 4 येशू उहिहे जवाफ देलाँ, "पवित्र शास्त्रमे लिखल बा, ‘मनै रोटीसे किल जित्ती नै रथाँ।’ " 5 शैतान हुँकिन्हे एकथो महा ढेंग पहाड़मे लैजाके एक्के घरिमे संसारके सक्कु राज देखैलिन। 6 शैतान हुँकिन्हे कहल, "मै यी सक्कु अधिकार और यकर गौरव अप्निहे देबुँ। काकरेकी यी सक्कु महिन्हे सौँपगिल बा, और मै जिही चहथुँ उहिहे देथुँ। 7 अप्नि मोरिक आराधना कर्बी कलेसे यी सक्कु अप्निक होजाई।" 8 येशू उहिहे जवाफ देलाँ, "पवित्र शास्त्रमे लिखल बा, ‘तैँ परमप्रभु अपन परमेश्वरहे आराधना करिस, और हुँकार किल सेवा करिस।’" 9 तब् शैतान येशूहे यरुशलेम शहरमे लैजाके मन्दिरके टिप्पामे ठरह्वाइल और हुँकिन्हे कहल, "अप्नि परमेश्वरके छावा हुइती कलेसे यहाँसे तरे कुदुकके साबित करी। 10 काकरेकी पवित्र शास्त्रमे असिक लिखल बा, ‘ऊ अपन स्वर्गदूतनहे तोहाँर रक्षा करक लग आज्ञा दिहीँ। 11 और जब तुँ गिर्बो ते ओइने अपन हाँथेलेके तुहिन्हे थामलिहीँ, ताकि तोहाँरिक गोरामे पठरालेके चोट ना लागे।’" 12 येशू उहिहे जवाफ देलाँ, "पवित्र शास्त्रमे असिके फेन लिखल बा, ‘तैँ अपन परमप्रभु परमेश्वरके परीक्षा ना करिस।’" 13 शैतान हुँकिन्हे सक्कु परीक्षा करके सेकके अनुकुल समय नै आइतसम् हुँकिन्हे छोरके चलगिलस।

14 येशू पवित्र आत्मक शक्तिमे गालील प्रदेशमे गैलाँ, और हुँकार बारेमे आँजरपाँजरके सक्कु ठाउँमे प्रचार होगिलिन। 15 येशू यहूदिनके बैठक भवनमे शिक्षा देती रलाँ, और सक्कु जाने हुँकार प्रशंसा करिँत।

16 येशू नासरत गाउँमे फिर्ता अइलाँ, जहाँ हुँकार छुटिएसे स्याहारसुसार हुइल रहिन। ऊ अपन चलन अनुसार यहूदिनके बिँसैना दिनमे बैठक भवनमे गैलाँ, और पवित्र शास्त्र पह्रक लग उठ्लाँ। 17 हुँकिन्हे परमेश्वरके अगमवक्ता यशैयक किताब पह्रे देगिलिन। ऊ किताब खोलके यी लिखल खण्ड निकरलाँ,

18 "परमेश्वरके आत्मा मोरिक उप्पर बा।

काकरेकी गरीबनहे खुशीक खबर सुनाइक लग ऊ महिन्हे अभिषेक कर्ले बताँ।

और महिन्हे यकर लग पठाइल बताँ ताकि मै कैदिनहे छुटकारा दिऊँ,

आँधर मनैनहे देख्नाहाँ बनाऊँ, शोषणमे परल मनैनहे स्वतन्त्र कराऊँ।

19 और यी प्रचार करुँ कि परमेश्वरके कृपा देखैना समय आगिल बा।"

20 तब येशू किताब बन्द करलाँ, और एकथो सेबकहे देके ऊ बैठगिलाँ। बैठक भवनमे रहल सक्कु जहनके नजर येशूक उप्पर रहिन। 21 तब ऊ ओइन्हे कलाँ, "आज पवित्र शास्त्रक यी वचन तुहुरे सुन्ती-सुन्ती पूरा होगिल बा।" 22 सक्कु जाने हुँकार तारिफ करे लग्लाँ, और हुँकार मुहेमसे निकरल दयासे भरल शब्द सुनके ओइन्हे अचम्म लग्लिन। और ओइने कलाँ, "का यी योसेफके छावा नै हो?" 23 ऊ ओइन्हे कलाँ, "तुहुरे महिन्हे यी उखान जरुर कबो कि, ‘ए वैदा अपनहे अप्निहीँ चोख्वाई! जसिके हम्रे सुनल बती कि अप्नि कफर्नहुम नगरमे ज्या कर्ले बती वहे चिज यहाँ अपन शहरमे फेन करी।’" 24 और येशू कलाँ, "जात्तिके मै तुहुरिन्हे कहतुँ, परमेश्वरके कौनो फेन अगमवक्ताहे ओकर अपन शहरमे आदर नै हुइथिस। 25 मोरिक बात सुनो, यी जात्तिक हो कि परमेश्वरके अगमवक्ता एलियक पालामे इजरायल देशमे बहुत्ते विधवन रहिँत। वहे समयमे साह्रे तीन सालसम पानी नै बरसके सारा देशमे बरवार अनिकाल परल रहे। 26 पर एलिया अगमवक्ता ओइन्मेसे कौनो विधवनके थेन नै पठागिलस। सिरिफ सीडोन नगरके सारपट गाउँमे एकथो गैर-यहूदी विधवक थेन पठागिलस। 27 परमेश्वरके अगमवक्ता एलीशक समयमे इजरायल देशमे बहुत्ते कोढ़ रोग लागल मनै रहिँत। पर सिरिया देशके कोढ़ रोग लागल गैर-यहूदी नामान बाहेक केऊ फेन नै चोख्वागिलाँ।" 28 यी बात सुनके बैठक भवनमे रहल सक्कु जाने रिसेलेके चुर होगिलाँ। 29 और ओइने उठ्लाँ और येशूहे शहरमेसे बाहेर निकरलाँ। और जोन ढेंग पहाड़मे ओइने शहर बनाइल रहिँत। वहे ढेंग पहाड़मे लैजाके हुँकिन्हे तरे धकेलके मुवाई खोजतिहिँत। 30 पर येशू ओइन्के बिच्चेमसे निपुँचके वहाँसे चलगिलाँ।

31 येशू गालील प्रदेशके एकथो शहर कफर्नहुम नगरमे अइलाँ। बिँसैना दिनमे येशू ओइन्हे शिक्षा देहतिहिँत। 32 हुँकार शिक्षा सुनके ओइन्हे अचम्म लग्लिन। काकरेकी ऊ असिन गुरुक हस सिखाइँत, जेकर थेन सच्चा अधिकार रहत। 33 बैठक भवनमे एकथो मनैया जिहिहे भूत्वा लागल रहिस। ऊ असिक कती जोरसे गोहराइल, 34 "ए नासरत गाउँक येशू, अप्नि हमार विरोध काकरे करती, हम्रिहिन एक्केली छोरदी? का अप्नि हम्रिहिन सर्वनाश पारे आइल बती? अप्नि के हुइती कहिके हम्रे अप्निहे चिन्थी! अप्नि परमेश्वरके पवित्र जन हुइती, जे परमेश्वरके ओहोँरसे आइल बती।" 35 येशू उ भूत्वाहे घघोट्के कलाँ, "चुप लाग और ओकरमेसे निकरजा।" तब् उ मनैयाहे बिच्चेम गिराके उहिहे कुछु फेन नोकसान नै करके उ भूत्वा उ मनैयकमेसे बाहेर निकरगिल। 36 तबे उ सक्कु जहनहे अचम्म लग्लिन, और ओइने आपसमे असिक कलाँ, "यी कसिन वचन हो? यी ते अधिकार और शक्तिसे भूत्वनहे आज्ञा करथाँ, और ओइने निकर जैथाँ।" 37 असिके झत्तेहेँ वहाँक आँजरपाँजर सक्कु ईलाकक प्रत्येक ठाउँमे मनै येशूक बारेम सुन्लाँ।

38 बैठक भवनमेसे निकरके येशू सिमोनके घरेम गैलाँ। सिमोनके माउ बेमार रहिस, और पठरीमे सुतल रहिस। काकरेकी उहिहे जुरी आइल रहिस। जब येशू उ घरेम पुग्लाँ ते मनै सिमोनके माउ बेमार बतीस् कहिके चोख्वाइक लग येशूसे विन्ती करलाँ। 39 ओकर लग्गे ठरह्याके येशू जुरिहे हप्कैलाँ, और जुरतेहेँ ओकरमेसे जुरी चोखागिलिस। तब् ऊ तुरुन्ते उठ्के ओइन्के सेवा करे लागल। 40 उ साहिँजुन बहुत्ते रोगसे बेमार रहल मनैनहे औरे मनै येशूक थेन नन्लाँ। ऊ ओइन्के प्रत्येक जहनके उप्पर अपन हाँथ धारके ओइन्हे चोख्वादेलाँ। 41 बहुत्ते मनैनमेसे भूत फेन चिल्लैती, और असिक कती निकरलाँ, "तुँ परमेश्वरके छावा हुइतो।" पर येशू भूत्वनहे कुछु बोल्ही नै देलाँ। काकरेकी ओइन्हे पता रहिन कि येशू ख्रीष्ट हुइँत।

42 धुस्मुस्सेहेँ बेहान्नी येशू नगरमेसे बाहेर निकरके सुनसान ठाउँमे गैलाँ। भीड़के मनै हुँकिन्हे खोज्ती हुँकार थेन आगिलाँ, और "हम्रिहिन्हे छोरके ना जाऊ" कहिके हुँकिन्हे रोक्ना कोशिस करलाँ। 43 पर ऊ ओइन्हे कलाँ, "महिन्हे परमेश्वरके राजके खुशीक खबर दोसुर शहरमे फेन प्रचार करना बा। काकरेकी मै यक्रेहे लग पठागिल बतुँ।" 44 और येशू यहूदिया प्रदेशके यहूदिनके बैठक भवनमे प्रचार कर्ती रलाँ।