लूका 9

बाह्रथो चेलनहे पठागिलक

1 तब् येशू बाह्रथो चेलनहे एक्के थेन बलैलाँ, और भूत्वनहे निकरना और सक्कु मेरके रोग और कमजोरीनहे चोख्वैना शक्ति और अधिकार ओइन्हे देलाँ। 2 येशू ओइन्हे परमेश्वरके राजके प्रचार करे और बेमार मनैनहे चोख्वाई पठैलाँ। 3 येशू ओइन्हे कलाँ, "तुहुरिन्के यात्रामे अपन संग कुछु ना लेहो; ना लट्ठी, ना झोला, ना रोटी, ना पैँसा, ना दुईथो झुलुवा रही। 4 जोन घरेम तुहुरे जैबो वहैँ बैठ्हो, और वहैँसे विदा हुइहो। 5 जहाँ मनै तुहुरिन्के स्वागत करना या तुहुरिन्के बात सुन्नासे अस्वीकार करहीँ कलेसे वहाँसे निक्रेबेर तुहुरे अपन गोरामेसे धुर फेन झरादेहो। असिक करना कलक उ नगरके मनैनहे परमेश्वर सजाय दिहीँ कना जनाइत।" 6 तब् ओइने वहाँसे विदा हुइलाँ और खुशीक खबर प्रचार कर्ती और सक्कु ठाउँ बेमार मनैनहे चोख्वैती गाउँ-गाउँ गैलाँ।