मर्कूस 10

याकूब और यूहन्नक बिन्ती

35 तब् जब्दियक दुईथो छावन याकूब और ओकर भैया यूहन्ना अइलाँ और येशूहे कलाँ, "गुरुजी, हम्रे चहथी कि हम्रे ज्या फेन अप्निसे मंग्बी अप्नि हमार लग करदेबी।" 36 येशू ओइन्हे पुँछ्लाँ, "तुहुरे का चहथो कि मै तुहुरिन्के लग करुँ?" 37 ओइने येशूहे कलाँ, "जब अप्नि अपन महान राजमे राज कर्बी, तब हम्रे दुनुजाने अप्निक आँजरपाँजर अप्निक बराबरके ठाउँमे बैठे भेटाई। एकथो अप्निक दाहिन पाँजर और दोसुर अप्निक बाउँ पाँजर।"