1 यकर दुई दिन पाछे निस्तार और अखमिरी रोटीक तिहुवार रहे। यहूदी मुख्य पुजारीनके और यहूदी कानुनके गुरुनके हुँकिन्हे कसिके छल करके पकरके मुवाई कना डाउमे रहिँत। 2 पर ओइने कहल रहिँत, "हम्रे हुँकिन्हे तिहुवारके बेलामे पक्रे और मुवाई नै परना हो। काकरेकी मनै हंगामा करे सेक्थाँ।" 3 जब येशू बेथानिया गाउँमे सिमोनके घरेम रहिँत, जिहिहे कोढ़ रोग लागल रहिस। जब येशू ओकर घरेम खाना खाई बैठल रहिँत, तब् एकथो स्त्री घरेक भित्तर आइल। ऊ एकथो शीशी नानल, जोन सिंगमरमर नाउँक पठरालेके बनल रहे। और उ शीशी अत्तरसे भरल रहे, और उ अत्तर जटामसिक शुद्ध महँकना तेलसे बनाइल रहे, और उ बहुमूल्य रहे। उ स्त्री शीशीक मोह्कर थेनसे तुरदेहल। ऊ सक्कु अत्तरहे येशूक मुन्टम अख्न्याके हुँकार आदर करल। 4 पर केऊ-केऊ रिसाके अप्निहीँ-अप्निहीँ कहे लग्लाँ, "उ अतरा महिँगा अत्तर असिके काकरे खिर्बासे करल? 5 काकरेकी यी अत्तर तीन सौ चाँदीक सिक्कासे फेन धेउरमे बेँचके गरीबनहे उ पैँसा देहे सेकजैना रहे।" तब् ओइने उ स्त्रीहे घघोट्लाँ। 6 पर येशू ओइन्हे कलाँ, "यिहिहे एक्केली छोरदेऊ, काकरे तुहुरे यिहिहे सतैथो? ऊ मोरिक संग मजा काम करल बा। 7 काकरेकी गरीबनके ते तुहुरिन्के संग रोज रथाँ, और इच्छा लागल कौनो फेन समयमे तुहुरे ओइन्के भलाई करे सेक्बो। पर मै ते रोज तुहुरिन्के संग नै रहम। 8 यी स्त्री ज्या करे सेके वहे मोरिकमे बहुत मजा करल बा। अत्तरहे ऊ मोरिक शरीरमे अख्न्याइल, और मोरिक मुनासे आघे महिन्हे दफनके लग तयार करल बा। 9 जात्तिके, मै तुहुरिन्हे कहतुँ, सारा संसारमे जहाँ-जहाँ यी खुशीक खबर प्रचार हुई, यी स्त्रीक कामहे बत्वाजैहिस, और यिहिहे याद करजैहिस।"

10 तब् बाह्रथो चेलनमेसे एकथो करियोत गाउँक यहूदा भर येशूहे ओइन्के हाँथेम पक्रा देहक लग यहूदी मुख्य पुजारीक थेन गैल। 11 ओइने यी सुनके खुशी होगिलाँ, और उहिहे पैँसा देना स्वीकार करलाँ। तब् हुँकिन्हे कसिके ओइन्के हाँथेम पक्राऊँ कहिके ऊ मजा मौका खोजे लागल।

12 दुई दिन पाछे अखमिरी रोटीक तिहुवारके सुरुक दिन, जब ओइने तिहुवारके लग पठ्वक बलि चह्राइँत। येशूक चेलनके हुँकिन्हे पुँछ्लाँ, "हम्रे कहाँ जाई कना अप्नि चहथी कि हम्रे वहाँ जाके अप्निक लग निस्तार-तिहुवारके खाना तयार पारी, और खैबी?" 13 तब् ऊ अपन चेलनमेसे दुई जहनहे असिक कहिके पठैलाँ, "यरुशलेम शहरमे जाऊ और गग्रीमे पानी भरके लैजुइया एकथो मनैयाहे तुहुरे भेटैबो। ओकर पाछे लग्हो। 14 तब् ऊ जहाँ पैठीँ वहे घरक मलिक्वाहे कहहो, ‘गुरुजी पुँछल बताँ, मोरिक चेलनके संग निस्तार-तिहुवारके खाना खैना पहुना कोन्ती कहाँ बा?’ 15 तब् ऊ तुहुरिन्हे सवाँरल उपरका तल्हक एकथो बरवार कोन्ती देखाई, वहैँ तुहुरे हमार लग निस्तार-तिहुवारके खाना रिझैहो।" 16 तब् उ दुईथो चेलनके गैलाँ, और नगरमे पैँठ्लाँ। तब् ओइने हुँकार कहल हस भेटैलाँ। और ओइने निस्तार-तिहुवारके खाना तयार परलाँ। 17 संझा हुइल ते ऊ बाह्रैथो चेलनके संग अइलाँ। 18 जब येशू और बाह्रथो चेलनके संझक खाना खाई बैठल रहिँत, तब् येशू कलाँ, "जात्तिके, मै तुहुरिन्हे कहतुँ, तुहुरिन्मेसे मोरिक संग खउइया एकजाने महिन्हे धोखा दि।" 19 जब चेलनके असिक कहत सुन्लाँ, तब् ओइने दुखि होगिलाँ। और ओइने हुँकिन्हे असिक कहिके पालिकपाला पुँछे लग्लाँ, "का ऊ, मै ते ना हुइतुँ?" 20 ऊ कलाँ, "बाह्रै चेलनमेसे एकजाने, जे मोरिक संग खोरियामे रोटी बोरता। 21 मै, मनैयक छावा मुवाजिम, जसिके पवित्र शास्त्रमे लिखल बा: ‘पर उ मनैयाहे डरलग्तिक सजाय हुइहिस, जे महिन्हे धोखा दि। यदि उ मनैया जलमे नै लेहत ते ओकर लग मजा हुइतिस!’"

22 तब् खाना खाइबेर येशू रोटी लेलाँ, और धन्यवादके प्राथना करके रोटीहे खन्टैलाँ। तब चेलनहे देलाँ और कलाँ, "लेऊ और यी खालेऊ, यी मोरिक शरीर हो!" 23 तब् येशू अंगुरके रससे भरल खोरिया लेलाँ, और परमेश्वरहे धन्यवाद देलाँ। तब् चेलनहे देलाँ और ओइने ओम्नेमेसे पिलाँ। 24 तब् येशू ओइन्हे कलाँ, "यी अंगुरके रस मोरिक खुन हो। मोरिक खुन बलिदानके रुपमे बहुत्ते मनैनके लग बहाजाई। यी उ लावा करारहे पूरा करी, जोन परमेश्वर अपन मनैनसे बहन्हीँ। 25 जात्तिके, मै तुहुरिन्हे कहतुँ, परमेश्वरके राजमे मै लावा अंगुरके रस नै पिअतसम मै यी अंगुरके रस नै पिअम।" 26 तब् येशू और हुँकार चेलनके निस्तार-तिहुवारके गीत गैती, ओइने शहरमेसे निकरके जैतून पहाड़ ओहोँर गैलाँ।

27 जब ओइने पहाड़ ओहोँर जाइतिहिँत, तब् येशू ओइन्हे बतैलाँ, "तुहुरे सक्कु जाने महिन्हे छोरके भागजिबो। जसिके मोरिक बारेम पवित्र शास्त्रमे लिखल बा, ‘जे भेँरहुवक हस मोरिक मनैनके रेखदेख करत। मै उहिहे मुवादेहम, और ओइने भेँरीनके हस छिदिरबिदिर होजिहीँ।’ 28 पर जब मै मुअलमेसे फेनदोस्रे जित्ती होजिम, तब मै गालील प्रदेशमे तुहुरिन्से आघे जैम, और वहाँ तुहुरे महिन्हे भेटैबो।" 29 तब् पत्रुस येशूहे कहल, "यदि सक्कु जाने अप्निहे छोरदिहीँ, और भागजिहीँ कलेसे फेन मै अप्निहे नै छोरम।" 30 तब् येशू पत्रुसहे कलाँ, "जात्तिके, मै तुहिन्हे कहतुँ, आझिक रात मुर्घा दुईचो बोल्नासे आघे तुँ मोरिक बारेम तीनचो कबो कि मै हिँकिन्हे नै चिहिन्थुँ।" 31 पर पत्रुस आकुर जोरसे कहल, "मै यी कबु नै कहम कि मै अप्निहे नै चिहिन्थुँ! यहाँसम कि महिन्हे अप्निक संग मुए ना परे!" तब् औरे चेलनके फेन अस्तेहेँक कलाँ।

32 जब येशू और हुँकार चेलनके गेतसमनी नाउँक बगियामे अइलाँ, तब् ऊ अपन चेलनहे कलाँ, "मै परमेश्वरसे प्राथना करतसम तुहुरे यहैँ बैठो।" 33 तब् पत्रुस, याकूब और यूहन्नाहे ऊ अपन संगे लैगिलाँ, और ऊ एकदम उदास और महा दुखि हुई लग्लाँ। 34 तब् येशू ओइन्हे कलाँ, "मोरिक आत्मा अतरा दुखि होगिल बा, कि मै मुना हस होगिल बतुँ। तुहुरे यहैँ रुको और मोरिक संग जागल पलिरहो।" 35 तब् येशू थोरचे दूर गैलाँ। और ऊ अपन ठेहुनी टेक्लाँ, और अपन मुह धर्ती ओहोँर झुकैलाँ, और परमेश्वरसे प्राथना करलाँ। 36 तब् ऊ कलाँ, "हे बाबा, तोरिक लग सक्कु बात सम्भव बा। यी दुःखके खोरियाहे मोरिक थेनसे दूर लैजा। पर तभुन फेन मै चहथुँ कि तोरिक इच्छा पूरा होए, मोरिक नै।" 37 जब येशू फिर्ता अइलाँ ते देख्लाँ कि हुँकार चेलनके निदाइल बताँ। तब ऊ सिमोन पत्रुसहे कलाँ, "सिमोन, का तुँ निदाइल बतो? तुँ एकघची फेन जागल नै रहे सेक्थो? 38 जागल रहो और प्राथना करो, और तुहुरे परीक्षामे ना परो। तुहुरे उ करे चहथो जोन मै कथुँ, पर तुहुरे यिहिहे करक लग कमजोर बतो।" 39 फेनदोस्रे जाके ऊ दोबारा वहे प्राथना करलाँ। 40 फेनदोस्रे चेलनके थेन ऊ फिर्ता अइलाँ, और ओइन्हे निदाइल भेटैलाँ, ओइने गजब मिच्छाइल रहिँत। काकरेकी ओइन्के आँखी निंदकमारे दटके निदासल रहिन। काकरेकी ओइने गजब मिच्छागिल रहिँत। जब ऊ ओइन्हे जगैलाँ ते ओइन्हे अक्किल नै आइतिहिन कि हुँकिन्हे का जवाफ दि। 41 जब ऊ तेसरचो अइलाँ ते ऊ ओइन्हे कलाँ, "का तुहुरे अभिन निदाइलतो, और अराम करतो? सुनो, आब होगिल, उ समय आगिल बा। जब केऊ मै, मनैयक छावाहे खराब मनैनहे दैदिहीँ, और ओइने महिन्हे पकरहीँ। 42 उठो, जाई। हेरो, जे महिन्हे ओइन्से पकरवाइक लग सहयोग करता, ऊ यहाँ आइता।"

43 जब येशू अभिन कती रहिँत, तब्बेहेँ करियोत गाउँक यहूदा जे बाह्रथो चेलनमेसे एकथो रहे, ऊ वहाँ आइल। ऊ एकथो बरवार मनैनके भीड़ लेके आइल, जेने अपन संग तरवाल और भट्ठा लेले आइल रहिँत। यी मनैनहे यहूदी मुख्य पुजारीन, यहूदी कानुनके गुरुनके और यहूदी दलके नेतन पठाइल रहिन। 44 यहूदा जे येशूहे पकरवाइक लग ओइन्हे सहयोग करतेहे। मनैनके भीड़हे ऊ आग्गिहीँसे बताइल रहे कि जिहिहे मै गुरु कहिके नमस्कार करम और चुम्मा खैम, उहिएहे पकरहो और पहरा देके लैजिहो। 45 जब यहूदा आइल तब् सोझे येशूक थेन जाके ऊ कहल, "हे गुरुजी," और हुँकिन्हे चुम्मा खाइल। 46 तब् ओइने येशूहे पकरलाँ, और गिरफ्तार करलाँ। 47 येशूक संग रहल कौनो मनैया तरवाल निकारके यहूदी प्रधान पुजारीक नोकरहे प्रहार करल, और ओकर कान काटके छिङ्टा देहल। 48 येशू ओइन्हे कलाँ, "का तुहुरे एकथो डाँकक विरोधमे आइल हस तरवाल और भट्ठा लेके महिन्हे गिरफ्तार करे आइलतो? 49 तुहुरे महिन्हे यरुशलेमके मन्दिरमे गिरफ्तार काकरे नै करलो? मै वहाँ तुहुरिन्के बिच्चेम हरेक दिन शिक्षा दिऊँ। पर यी चिज उ पूरा हुइक लग हुइता, जोन पवित्र शास्त्र मोरिक बारेम कहत।" 50 तब् सक्कु चेलनके हुँकिन्हे छोरके भागगिलाँ। 51 एकथो जवान मनैया जे अपन शरीरहे एकथो मलमलके लुग्गालेके किल बेँह्रल रहे, वहे किल ओइन्के पाछे लागल। ओइने उ जवान मनैयाहे पक्रे खोज्लाँ। 52 पर लुग्गा छोरके ऊ नंग्ते भागगिलस।

53 तब् ओइने येशूहे यहूदी प्रधान पुजारीक थेन लैगिलाँ, और वहाँ सक्कु यहूदी मुख्य पुजारीनके, यहूदी दलके नेतन और यहूदी कानुनके गुरुनके जमा हुइल रहिँत। 54 पत्रुस भर दूरेसे यहूदी प्रधान पुजारीक अंगनक भित्तर हुँकार पाछे-पाछे लागल, और वहैँ मन्दिरके चौकिदर्वनके संग बैठके ऊ आगी तापे लागल। 55 तब् यहूदी मुख्य पुजारी और यहूदी महासभक सक्कु सदस्यन येशूहे मृत्युदण्ड मिलिन कहिके हुँकार विरोधमे झूँटा गवाही खोजे लग्लाँ, पर कुछु नै भेटैलाँ। 56 बहुत जाने हुँकार विरोधमे झूँटा गवाही देलाँ। पर ज्या ओइने कहल रहिँत, ओइन्के देलक गवाही उहिसे मेल नै खाइल। 57 केऊ-केऊ ते उठ्के हुँकार विरोधमे असिक कहिके झूँटा गवाही देलाँ, 58 "यिहिहे असिक कहत हम्रे सुन्ली, ‘मनैनके बनैलक यी मन्दिरहे मै भस्का देहम, और तीन दिनमे मै दोसुर मन्दिर बनादेहम, जोन मनैनसे बनागिलक नै हो।’" 59 पर यम्ने फेन ज्या ओइने कहल रहिँत, ओइन्के देहल गवाही उहिसे मेल नै खाइल। 60 तब् यहूदी प्रधान पुजारी उ सक्कुहुनके आघे ठरह्याके येशूहे पुँछल, "का तोरिक थेन कुछु जवाफ नै हो? यी मनै तोरिक विरोधमे देहल गवाही का हो?" 61 पर येशू चिमचाम होगिलाँ, और कुछु जवाफ नै देलाँ। फेनदोस्रे यहूदी प्रधान पुजारी हुँकिन्हे पुँछल, "का तैँ ख्रीष्ट, परमेश्वरके छावा हुइते, जेकर हम्रे आराधना कर्थी?" 62 येशू कलाँ, "मै हुइतुँ, तुहुरे मै, मनैयक छावाहे सर्वशक्तिमानके दाहिन ओहोँर भारी पदमे बैठल, और महिन्हे आकाशमे बद्रीलेके घेरल स्वर्गमेसे आइत देख्बो।" 63 जब यहूदी प्रधान पुजारी सुनल कि येशू का कलाँ, तब ऊ अपन लुग्गा फारदेहल। काकरेकी ऊ महा जोरसे झोँक्कागिल रहे, और ऊ कहल, "आब हम्रिहिन्हे आकुर गवाही नै चाही। 64 तुहुरे सुन्लो कि यी ईश्वर-निन्दा करता। तुहुरिन्के का विचार बा?" और यहूदी सभक सारा सदस्यन यी बातमे सहमत होगिलाँ। और कलाँ कि येशू दोषी बा, और ऊ मृत्युदण्ड भेटैना लायकके बा। 65 तब् ओइन्मेसे केऊ-केऊ हुँकारमे थूके लग्लाँ, और हुँकार मुह छोपके थप्पर मरलाँ। ओइने हुँकिन्हे असिक कती हाँसे लग्लाँ, "यदि तैँ परमेश्वरके अगमवक्ता हुइते कलेसे हम्रिहिन्हे बता कि तुहिहे के पिटल?" यकरपाछे मन्दिरके पहरेदार हुँकिन्हे अपन जिम्मामे लेहल और हुँकिन्हे मुक्का मारल।

66 जब पत्रुस तरे अंग्नामे आगी तापतेहे। तब् यहूदी प्रधान पुजारीक नोकर्नीमेसे एकथो वहाँ अइलस, 67 और पत्रुसहे आगी तापत देख्के उहिहे हेरल, और कहल, "तुँ फेन नासरत गाउँक येशूक संग रहो।" 68 पर ऊ असिक कती अस्वीकार करल, "महिन्हे पता नै हो, मै बुझे नै सेकथुइतुँ कि तैँ का कहते।" तब् पत्रुस वहाँसे बाहेर मुख्य दवार ओहोँर गैल। तब् मुर्घा बोलल। 69 उ नोकर्नी पत्रुसहे वहाँ देखल। ऊ फेनदोस्रे वहाँ ठरह्याइल मनैनहे कहे लागल, "यी मनैया पक्का येशूक चेला हो!" 70 पर पत्रुस फेनदोस्रे अस्वीकार करल। पर एकघची पाछे आँजर-पाँजर ठरह्याइल मनै फेनदोस्रे पत्रुसहे कलाँ, "पक्कै, तुँ ओइन्मेसे एकथो हुइतो। काकरेकी जसिके तुँ बोल्थो, उहिसे यी पता चलत कि तुँ फेन गालील प्रदेशसे हुइतो। तबेकमारे यी पक्का हो कि तुँ ओकर चेलनमेसे एकथो हुइतो।" 71 तब् पत्रुस कहल, "मै कसम खाइतुँ, कि मै जात्तिके कहतुँ! यदि मै गलत बतुँ कलेसे परमेश्वर महिन्हे सजाय दिँत, मै उ मनैयाहे नै चिहिन्थुँ, जेकर बारेम तुहुरे बत्वाइतो।" 72 तब् जुरतेहेँ दोबारा मुर्घा बोलल, और पत्रुसहे येशूक असिक कलक बात याद अइलिस, "दुईचो मुर्घा बोल्नासे आघे तुँ महिन्हे तीनचो अस्वीकार करबो।" तब् पत्रुस अपन दुःखहे रोके नै सेकल, और होँकहोकैती रुई लागल।