मर्कूस 15

येशू पिलातस राजपालके आघे हाजिर

1 सक्करहीँ यहूदी मुख्य पुजारीनके, यहूदी दलके नेतनके, यहूदी कानुनके गुरुनके और सक्कु यहूदी महासभा मिलके सल्लाहा करके येशूहे बहानके लैगिलाँ। और पिलातसके थेन सौँपदेलाँ, जे यहूदा ईलाकामे रोमी राजपाल रहे। 2 पिलातस हुँकिन्हे पुँछल, "का तुँ यहूदिनके राजा हुइतो?" येशू उहिहे जवाफ देलाँ, "अप्निए असिक कहती।" 3 तब् यहूदी मुख्य पुजारीनके येशूकमे बहुत्ते दोष लगैलाँ। 4 राजपाल पिलातस फेनदोस्रे येशूहे प्रश्न पुँछल, "का तोहाँर थेन कुछु जवाफ नै हो? हेरो, तोहाँर विरोधमे आरोपके कतरा दोष लगैथाँ।" 5 पर येशू फेनदोस्रे कुछु जवाफ नै देलाँ, तबेकमारे राजपाल पिलातसहे अचम्म लग्लिस।

येशूहे मृत्यु दण्डक आज्ञा

6 हर साल निस्तार-तिहुवारके बेला राजपाल पिलातसके यी चलन रहिस कि कौनो फेन कैदी, जिहिहे मनै कहिँत, उहिहे ऊ छोरदेहे। 7 उ समयमे वहाँ बारब्बा नाउँक एकथो मनैया दोसुर विद्रोहीनके संग कारागारमे रहे। ऊ रोम सरकारके विरोधमे विद्रोहक समयमे गोड्गात मनैनके हत्या करल रहे। 8 पूरा मनैनके भीड़ राजपाल पिलातसके थेन गैल, और ओइने उहिहे कहे लग्लाँ, "जसिके अप्नि जबफेन हमार लग कैदी छोर्थी, ओस्तेके करी।" 9 राजपाल पिलातस ओइन्हे कहल, "का तुहुरे यी चहथो कि मै तुहुरिन्के लग यहूदिनके राजाहे छोरदिऊँ?" 10 काकरेकी राजपाल पिलातस खोब मजासे जाने कि यहूदी मुख्य पुजारीनके येशूहे ओकर हाँथेम यहे कारणसे सौँपलताँ। काकरेकी ओइने हुँकिन्से बिह्रे मुइँत। 11 पर यहूदी मुख्य पुजारीनके मनैनके भीड़हे उक्सैलाँ कि ओइने राजपाल पिलातससे येशूक सटाहा बारब्बाहे छोरना माँग करिँत्। 12 राजपाल पिलातस फेनदोस्रे ओइन्हे पुँछल, "असिक हो कलेसे जिही तुहुरे यहूदिनके राजा कथो, उहिहे मै का करुँ ते?" 13 फेनदोस्रे भीड़के मनै चिल्लाई लग्लाँ, "उहिहे क्रूसमे मुवाऊ।" 14 राजपाल पिलातस ओइन्हे पुँछल, "काकरे? ऊ का अपराध कर्ले बा?" पर भीड़के मनै आकुर जोरसे चिल्लाके कहे लग्लाँ, "उहिहे क्रूसमे मुवाऊ।" 15 तब् राजपाल पिलातस भीड़के मनैनहे सन्तुष्ट करना इच्छासे ओइन्के लग बारब्बाहे छोरदेहल, और येशूहे कोर्रा लगाके क्रूसमे टाँगक लग रोमी सिपाहिनके हाँथेम दैदेहल।

रोमी सिपाहिन येशूक मजाक उरैलाँ

16 पिलातसके सिपाहिन येशूहे राजपालके घरक अंगनामे लैगिलाँ, जिहिहे प्रेटोरियन कथाँ। और पूरा सिपाहिनके पल्टनहे भित्तर बलागिलस। 17,18 राजा बन्ना सोंग काह्रक लग सिपाहिन हुँकिन्हे शाही पहिरनके लुग्गा घलाके हुँकार मजाक उरैलाँ। ओइने कँटाहा बौँरक एकथो मुकुट फेन बनैलाँ, और हुँकिन्हे एकथो राजक रुपमे नक्लीमे बिह्राइक लग हुँकार मुन्टामे धारदेलाँ। तब् ओइने हुँकिन्हे सलाम करना सुरु करदेलाँ, जसिन कि ओइने चिल्लाके हुँकार आदर करतताँ, "यहूदिनके रज्वक जय!" 19 ओइने लगातार बल्गर गौलरके लट्ठीलेके हुँकार मुन्टामे मारतिहिँत। ओइने हुँकार बेज्जत करक लग कैयोचो हुँकारमे थुकत फेन रहिँत। और आदर करना सोंग काह्रक लग हुँकार आघे लिहुरतिहिँत। 20 जब ओइने हुँकार सोंग करके सेक दरलाँ, तब् ओइने हुँकारमेसे शाही पहिरन निकारदेलाँ। और ओइने हुँकार अपने लुग्गा हुँकिन्हे घलादेलाँ। ओकरपाछे ओइने हुँकिन्हे क्रूसमे टँगाइक लग लैगिलाँ।

येशू क्रूसमे

21 जस्तेके ओइने नगरमेसे बाहेर जाइतिहिँत। तब्बेहेँ सिमोन नाउँक एकथो मनैया गाउँक ईलाकामेसे यरुशलेम शहरमे आइतेहे। सिमोन कुरेन शहरके रहे, और ओकर छावनके नाउँ अलेक्जेन्डर और रुफस रहिस। सिपाहिन उहिहे क्रूसहे वहाँ लैजिना आदेश देलाँ, जहाँ येशूहे टँगैना रहे। 22 सिपाहिनके येशूहे गलगथा कना ठाउँमे लैगिलाँ, आरामाइक भाषामे जेकर मतलब हुइत "खोपड़ीक ठाउँ।" 23 तब् सिपाहिन येशूहे मूर्र नाउँक बिरवा अंगुरके रसमे मिलाके देलाँ, ताकि हुँकिन्हे धेउर ना बठाइन। पर येशू पिनासे मनाही करदेलाँ। 24 ओइने हुँकिन्हे क्रूसमे टँगा देलाँ। तब् केकरमे कोन लुग्गा परी कना पक्का करक लग चिट्टा दारके ओइने येशूक लुग्गाहे आपसमे बाँटलेलाँ। 25 जब ओइने येशूहे क्रूसमे टंग्ला, तब् बेहानिक नौ बजल रहे। 26 ओइने क्रूसमे चिन्हा लगैलाँ, जेम्ने हुँकार दोष लिखल रहिन। ओम्ने लिखल रहे, "यहूदिनके रज्वा।" 27 ओइने हुँकार संग दुईथो डाँकनहे क्रूसमे टंग्लाँ, एकथोहे हुँकार दाहिन पाँजर और दोसुरहे बाउँ पाँजर। 28 असिके पवित्र शास्त्र सही साबित हुइल, जोन ख्रीष्टके बारेम कहिगिल रहे, "हुँकार संग अपराधीनके हस व्यवहार हुइहिन।" 29 वहाँसे जैना मनै अपन मुन्टा हिला-हिलाके हुँकार खिल्ली उरैती असिक कहिँत, "उह! हेरो, तैँ मन्दिर भस्काके तीन दिनमे बनुइया, 30 क्रूसमेसे उतरके आ, और अपनहे बँचा।" 31 ओस्तेके यहूदी मुख्य पुजारीनके फेन यहूदी कानुनके गुरुनके संग असिक कती आपसमे येशूक खिल्ली उरैती कलाँ, "यी दोसुर जहनहे बँचाइल, पर अपनहे बँचाई नै सेकी। 32 यी मनैया जे अपनहे ख्रीष्ट और इजरायल देशके राजा कहत। यिहिहे क्रूसमेसे तरे उत्रे देऊ, तब् हम्रे फेन देखब, और विश्वास करब कि ऊ हमार रज्वा हो।" जोन दुईथो कैदी हुँकार संग क्रूसमे टँगागिल रहिँत, ओइने फेन हुँकार निन्दा करलाँ।

येशूक मृत्यु

33 बाह्र बजेसे तीन बजेसम सारा देशहे अंधार छोप देहल। 34 तीन बजे ओहोँर असिक कती येशू जोरसे चिल्लैलाँ, "इलोई, इलोई, लामा सबखथनी?" जेकर मतलब हो, "हे मोरिक परमेश्वर, हे मोरिक परमेश्वर, तुँ महिन्हे काकरे त्यागदेलो?" 35 कौनो मनै वहाँ आँजर-पाँजर ठरह्याइल रहिँत। ओइने हुँकार कलक सुन्लाँ, ओइने बिना बुझ्ले एकदोसर जहनसे कहे लग्लाँ, "सुनो, यी अपन सहयोगके लग परमेश्वरके अगमवक्ता एलियाहे बलाइता!" 36 ओइन्मेसे एकथो दौरल तब् ऊ स्पन्ज लेहल और सिर्कामे पुरै बोरके एकथो नम्मा गौलरके लट्ठीमे लेके येशूक मुहेम पुगाइल, ताकि ऊ ओम्नेमेसे सिर्का चुसे सेकिँत। उ मनैया कहल, "रुको, कुछु ना करो, हम्रे हेरी कि परमेश्वरके अगमवक्ता एलिया आई और यिहिहे क्रूसमेसे मुक्त करदी।" 37 तब् येशू जोरसे चिल्लैलाँ और ऊ मुगिलाँ। 38 तब् यरुशलेमके मन्दिरमे झुलल ठुल पर्दा, जोन सक्कुहुनहे परमेश्वरके हाजिरीमे अइनासे रोकत। उ बिच्चेमसे उप्परसे लेके तरे सम् दुई खण्डा होके फाटगिल। 39 रोमी फौजीनके कप्तान जे वहाँ क्रूसके आघे ठरह्याइल रहे। ऊ हुँकार चिल्लैलक सुनल और देखल कि येशू कसिके मुलाँ। ऊ कहल, "यी मनैया जात्तिके परमेश्वरके छावा रहे।" 40 कौनो जन्नी मनै वहाँ रहिँत, जेने दूरेसे वहाँ हेरतिहिँत। जन्नीनके यी समूहमे मरियम जे मग्दल गाउँमेसे रहे, दोसुर मरियम जे याकूब और योसेफके दाई रहे और सलोमी रहिँत। 41 आघे जब येशू गालील प्रदेशके आँजरपाँजर यात्रा करलाँ। यी तीनथो जन्नीन येशूक चेलनके रुपमे हुँकार अनुशरण करिँत्। और ओइन्के लग चहना चिज जुटाँइत। औरे जन्नीन फेन रहिँत, जेने गालील प्रदेशसे येशूक संग यरुशलेम शहरमे आइल रहिँत। ओइने फेन दूरेसे हेरतिहिँत।

येशूक दफन

42,43 योसेफ नाउँक एकथो मनैया रहे, जे अरिमाथिया नगरके रहे, और ऊ यहूदी महासभक सदस्य फेन रहे। ऊ अप्ने फेन परमेश्वरके राज आई कहिके अँस्याइतेहे। ऊ हिम्मत करके राजपाल पिलातसके थेन गैल और उहिसे येशूक लाहाशहे दफ्नाइक लग माँगल। ऊ असिके यहे कारणसे करल। काकरेकी तयारीक दिन आग्गिहीँ संझा होगिल रहे। यी दिन यहूदिनके बिँसैना दिनसे आघेक दिन रहे, और बिँसैना दिनमे ओइन्हे लाहाश दफ्नाई नै मिलिन। 44 जब राजपाल पिलातस योसेफके मुहसे यी बात सुनल। तब ऊ फौजीनके कप्तानहे बलाइल और पुँछल, "का यी जात्तिके हो कि येशू मुसेकल?" 45 हुँकार मृत्यु होसेकल कना बात कप्तानसे पता पाइल ते येशूक मुअल शरीर योसेफहे लैजिना अनुमति देहल। 46 तब् योसेफ मलमलके लुग्गा किनल, और लाहाशहे तरे उतारके ऊ लुग्गालेके बेँहेर देहल, और चट्टानमे खोपके बनाइल एकथो चिहानमे धारल। तब् चिहानके मुहेम एकथो पठरा धारदेहल। 47 मरियम जे मग्दल गाउँमेसे रहे, दोसुर मरियम जे याकूब और योसेफके दाई रहे। यने हेरतिहिँत कि येशूक लाहाशहे कहाँ धारल बतिन।