1 एक दिन फेनदोस्रे बहुत्ते मनै येशूक थेन अइलाँ। और हुँकार चारु ओहोँर जमा होगिलाँ। जब मनैनके थेन वहाँ खाइक लग कुछु नै बच्लिन। तब येशू अपन चेलनहे अपन थेन बलैलाँ। और ओइन्हे कलाँ, 2 "यी मनै पैलेहेँ तीन दिनसे मोरिक संग बताँ। जोन खाना यने अपन संग नानल रहिँत। उ फेन ओरागिल बतिन। तबेकमारे महिन्हे यनहे देख्के सोग लागता। 3 यनमेसे बहुत जाने दूर दूरके ठाउँसे आइल बताँ। यदि मै यनहे बिना खवैले भुँख्ले घरे पठैम कलेसे यने डग्रेहेमे बेहोस होजिहीँ।" 4 येशूक चेलनके हुँकिन्हे कलाँ, "यी सुनसान ठाउँमे हम्रे अतरा धेउर मनैनहे खवाइक लग अतरा धेउर रोटी कहाँसे नानी?" 5 येशू ओइन्हे पुँछ्लाँ, "तुहुरिन्के थेन कैथो रोटी बा?" चेलनके जवाफ देलाँ, "सातथो रोटी" 6 तब् येशू मनैनहे भुइयाँमे बैठे कलाँ। सातथो रोटी ऊ लेलाँ और परमेश्वरहे धन्यवाद देलाँ, रोटीहे खन्टैलाँ और मनैनहे बाँटक लग चेलनहे देलाँ, और चेलनके ओस्तेहेँ करलाँ। 7 ओइन्के थेन थोरचे छुटी-छुटी मच्छी फेन रहिन। येशू ओकर लग फेन परमेश्वरहे धन्यवाद देलाँ, और चेलनहे उ फेन बाँटक लग कलाँ। 8 मनै खैलाँ और अघागिलाँ, ओकरपाछे खन्टैलक उब्रल रोटी और मच्छी चेलनके सात छिट्वा भरके जमा करलाँ। 9 उ दिन वहाँ लगभग चार हजार मनै रहिँत। तब् खाके सेक्लाँ ते उ सक्कुहुनहे येशू ओइन्के घरे पठादेलाँ। 10 तब् येशू अपन चेलनके संग लाउमे बैठ्के दलमनुथा कना अञ्चलमे गैलाँ।

11 कौनो फरिसी दलके मनै येशूक थेन अइलाँ, और ओइने हुँकिन्से बहस करे लग्लाँ। ओइने येशूहे फँसाई चाहिँत, तबेकमारे ओइने येशूहे कलाँ कि असिन कौनो स्वर्गक चमत्कार करके देखाऊ। जिहिसे यी पता चलजाए कि परमेश्वर हुँकिन्हे अपन अधिकार देले बताँ। 12 ओइने विश्वास नै कर्लक कारण नम्मा साँस लेके येशू ओइन्हे कलाँ, "तुहुरे यी जबानक मनै चिन्हक रुपमे चमत्कार काकरे खोज्थो? नाई, मै कहतुँ! यी जबानक मनैनहे कौनो सबुत नै देजाई!" 13 तब् येशू फरिसीनहे वहैँ छोरदेलाँ, और अपन चेलनके संग लाउमे चलगिलाँ। तब् ओइने आघे गालील समुन्दरके आँजरपाँजरके ठाउँमे गैलाँ।

14 येशूक चेलनके अपन संग पुग्ना मेरिक खाना लैजाई बिस्रागिलाँ। और लाउमे ओइन्के थेन एक्केथो किल रोटी रहिन। 15 येशू ओइन्हे चेतावनी देलाँ, "हौश्यार रहो, फरिसी दलके मनैनके खमीर और हेरोद रज्वक खमीरसे बँचल रहो।" 16 ओइने आपसमे छलफल करे लग्लाँ, "हम्रे अपन संग पुग्ना मेरिक रोटी नै नन्ली, तबे यी असिक कहतताँ।" 17 येशूहे पता रहिन कि ओइने का कहतताँ। तबेकमारे ऊ ओइन्हे पुँछ्लाँ, "तुहुरिन्के थेन रोटी नै हो कहिके तुहुरे यकर बारेम काकरे छलफल करतो? का तुहुरे नै जन्थो, और अभिन फेन नै बुझ्लो? का तुहुरिन्के मन विश्वास करनामे अभिन फेन हिचकिचाइता? 18 का तुहुरिन्के आँखी आँधर बा? का तुहुरिन्के कान बहिर बा? का तुहुरे बिस्रागिल बतो? 19 जब मै पाँच हजार मनैनहे पाँचथो रोटीसे किल खाना खवाइल रहुँ। तब् तुहुरे पाछे उब्रलक कै छिट्वा रोटीक खण्टा उठाइल रहो?" चेलनके जवाफ देलाँ, "बाह्र छिट्वा"। 20 "जब मै उ चार हजार मनैनहे सातथो छुटी रोटीसे किल खवैनु, ते तुहुरे उब्रलक कै छिट्वा रोटीक खन्टा उठाइल रहो?" चेलनके जवाफ देलाँ, "सात छिट्वा"। 21 फेनदोस्रे येशू ओइन्हे कलाँ, "तुहुरे अभिन फेन नै बुझ्लो कि मै के हुइतुँ!"

22 तब् येशू और हुँकार चेलनके बेथसेदा गाउँमे अइलाँ। कौनो मनै एकथो आँधर मनैयाहे येशूक थेन नन्लाँ। ओइने येशूहे बिन्ती करलाँ कि ऊ उहिहे छुइँत और उहिहे चोख्वादिँत। 23 येशू उ मनैयाहे अपन हाँथेलेके पकरलाँ, और नगरमेसे बाहेर लैगिलाँ। तब् येशू ओकर आँखीमे थुक लगैलाँ, और अपन हाँथ ओकरमे धारके उहिसे पुँछ्लाँ, "का तुहिन्हे कुछु देखाइता?" 24 तब् उ मनैया चारु ओहोँर हेरल और कहल, "मै मनैनहे देखतुँ, पर महिन्हे फरछ्वारसे नै देखाइथो, ओइने मोरिक चारु ओहोँर रुख्वा नेगे हस देखाइतताँ।" 25 तब् फेनदोस्रे येशू अपन हाँथ उ मनैयक आँखीमे धरलाँ। अप्सीर यी मनैया घित्गरसे हेरल, ते ओकर आँखीक रोशनी फिर्ता आगिलिस, और उहिहे सक्कु चिज फरछ्वारसे बिल्गाई लग्लिस। 26 यकरपाछे येशू उहिहे असिक कहिके ओकर घरे पठैलाँ, "अपन घर फिर्ता जाऊ, पर यहाँ का हुइल कहिके यी बात गाउँलेनहे बताइक लग कौनो फेन गाउँमे ना पैँठ्होँ।"

27 येशू और हुँकार चेलनके बेथसेदा गाउँमेसे निकरगिलाँ, और कैसरिया शहरके फिलिप्पी नगरके लग्गेक बहुत्ते गाउँमे पुग्लाँ। डगरमे जाइबेर येशू अपन चेलनहे पुँछ्लाँ, "मनै मोरिक बारेम का कथाँ कि मै के हुइतुँ?" 28 चेलनके जवाफ देलाँ, "कौनो मनै यी सोँच्थाँ कि अप्नि यूहन्ना हुइती, जे मनैनहे डुब्कि देहत। कौनो मनै सोँच्थाँ कि अप्नि परमेश्वरके अगमवक्ता एलिया हुइती। और कौनो मनै सोँच्थाँ कि अप्नि परमेश्वरके दोसुर भविष्यवक्तामेसे कौनो एकथो हुइती।" 29 तब् येशू ओइन्हे पुँछ्लाँ, "तुहुरे मोरिक बारेम का सोँच्थो, मै के हुइतुँ?" पत्रुस येशूहे जवाफ देहल, "अप्नि ख्रीष्ट हुइती, जिहिहे परमेश्वर पठैले बताँ।" 30 तब् येशू ओइन्हे चेतावनी देलाँ कि यी बात किहुहे फेन ना बतैहो कि ऊ ख्रीष्ट हुइताँ।

31 तब् येशू अपन चेलनहे सिखैना सुरु करदेलाँ। और ऊ कलाँ, "कौनो बात मोरिक लग हुइना जरुरी बा, मै, मनैयक छावाहे यी जरुरी बा कि मै बहुत्ते दुःख सहुँ। यी हुइना जरुरी बा कि हमार यहूदी दलके नेतन, यहूदी मुख्य पुजारीन और यहूदी कानुनके गुरुनके महिन्हे स्वीकार ना करिँत्, और महिन्हे मुवाँइत। पर तेसर दिनमे मै फेनदोस्रे जित्ती होजाँऊ।" 32 येशू ओइन्हे फरछ्वार करदेलाँ। यकर लग पत्रुस येशूहे अल्गे लैगिलस, और हप्काई लागल। 33 पर येशू पाछे घुम्लाँ, और चेलनके ओहोँर हेरके पत्रुसहे हप्कैलाँ, "ए शैतान, महिन्से दूर होजा! काकरेकी तोरिक सोँच मनैयक साधारण सोँच हो, तोरिक सोँच परमेश्वरके ओहोँर नै हो।"

34 तब् येशू मनैनहे और अपन चेलनहे अपन थेन बलैलाँ, और येशू ओइन्हे कलाँ, "यदि तुहुरे मोरिक संग आई चहथो कलेसे, तुहुरिन्हे अपनहे बिस्राई परी। तुहुरिन्हे मोरिक लग दुःख सहे परी, यहाँसम कि तुहुरिन्हे मुअक लग फेन तयार हुई परी। तब् तुहुरे मोरिक चेला बनक लग अपन क्रूस उठाके मोरिक संग आई सेक्बो। 35 असिन यकर लग करो, काकरेकी तुहुरे यी धर्तीमे अपन जीवनहे बँचाई चहथो कलेसे तुहुरे सदाकालके जीवनहे गुमादेबो। पर तुहुरे जेने मोरिक कारण और खुशीक खबरके लग अपन ज्यान देबो कलेसे तुहुरिन्हे परमेश्वरमे सदाकालके जीवन मिली। 36 यदि कौनो मनैया संसारके सक्कु चिज भेटाके धनी बन्जाई। पर ऊ परमेश्वरके संग सदाकालके जीवनके मौका गुमादेहल कलेसे उहिहे का फाइदा हुइहिस? कुछु फेन नै। 37 और एकथो मनैया सदाकालके जीवन किनक लग परमेश्वरहे का देहे सेकी? कुछु फेन नै। 38 यदि तुहुरे महिन्हे प्रभु मन्नासे अस्वीकार करबो और मोरिक शिक्षा यकर लग पालन नै करबो। काकरेकी तुहुरिन्हे डर बा कि यी जबानक पापी और व्यभिचारी मनै तुहुरिन्के मजाक उरैहीँ। कलेसे तब् मै, मनैयक छावा फेन तुहुरिन्हे अस्वीकार करम कि तुहुरे मोरिक चेला नै हुइतो। जब मै धर्तीमे पवित्र स्वर्गदूतनके संग फिर्ता अइम। तब् सक्कु जाने मोरिक महिमाहे देख्हीँ जसिन मोरिक बाबक बतिस।"