मत्ती 11

अपन मन बदलके पाप करना नै छोरुइया शहरके मनै

20 जोन-जोन नगरमे येशूक धेउर शक्तिशाली काम हुइल रहिन। उ नगरके मनैनहे ऊ दाँते लग्लाँ। काकरेकी ओइने अपन मन बदलके पाप करना नै छोरलाँ। 21 "ए खोराजीन शहरमे बैठुइया मनै! तुहुरिन्हे परमेश्वर दण्ड दिहीँ, ए बेथसेदा गाउँमे बैठुइया मनै! तुहुरिन्हे फेन परमेश्वर दण्ड दिहीँ। काकरेकी तुहुरिन्केमे कर्लक शक्तिशाली काम टुरोस नगर और सीडोन नगरके मनैनमे करल हुइत कलेसे ओइने तब्बेहेँ बोरक लुग्गा घालके अपनमे भुवा घाँसलेताँ। यी देखाइक लग कि ओइने अपन मन बदलके पाप करना छोर सेक्लाँ। 22 पर मै तुहुरिन्हे कहतुँ, परमेश्वर न्यायक दिनमे टुरोस और सीडोन नगरके मनैनसे धेउर दण्ड तुहुरिन्हे दिहीँ। 23 और ए कफर्नहुम नगरके मनै, तुहुरे सोँच्थो कि तुहुरे गजब महान बतो कि तुहुरे स्वर्गसम पुगतो। पर परमेश्वर तुहुरिन्हे नरकमे गिरैहीँ। काकरेकी तुहुरिन्केमे करगिलक शक्तिशाली काम सदोम शहरमे करजाइत कलेसे उ शहरके मनै आझिक दिनसम पलिरताँ। 24 पर मै तुहुरिन्हे कहतुँ, परमेश्वर न्यायक दिनमे सदोम शहरके मनैनसे धेउर दण्ड तुहुरिन्हे दिहीँ।"