मत्ती 16

फरिसी दल और सदुकी दलके मनैनके खमीर

5 चेलनके इपार आके सेकके ओइने अपन संग पुग्ना खाना लैजिना बिस्रागैलाँ। 6 येशू ओइन्हे कलाँ, "हौश्यार रहो, फरिसी दलके मनैनके खमीर और सदुकी दलके मनैनके खमीरसे बँचल रहहो।" 7 ओइने आपसमे छलफल करे लग्लाँ, "हम्रे अपन संग पुग्ना मेरिक रोटी नै नन्ली, तबे यी असिक कहतताँ।" 8 येशू यी पता पाके कलाँ, "ए अल्पविश्वासीन! तुहुरे यकर बारेम काकरे छलफल करतो कि तुहुरिन्के थेन रोटी नै हो? 9 का तुहुरे नै जन्थो और अभिन फेन नै बुझ्लो? पाँच हजार जहनके लग पाँचथो रोटीक बात तुहुरिन्हे अभिन याद नै हो? तुहुरे कै छिट्वा बितोरल रहो? 10 और चार हजार जहनके लग सातथो रोटी, और कै छिट्वा तुहुरे बितोरल रहो? 11 मै तुहुरिन्हे रोटीक बारेमे नै कनु कहिके तुहुरे काकरे नै बुझ्थो? पर फरिसी और सदुकीनके खमीरसे हौश्यार रहहो।" 12 तब् ओइने बुझगिलाँ, कि ऊ रोटीक खमीरसे नै होके पर फरिसी और सदुकीनके झूँटा शिक्षासे हौश्यार रहहो कहिके कहल रहिँत।