गुप्त-दान और प्राथना
1 तब येशू असिके कतिरलाँ, "हौश्यार बैठो! तुहुरे मनैनहे देखाइक लग मजा काम ना करो, नै ते अपन स्वर्गमे रहुइया बाबासे तुहुरे कुछु ईनाम नै भेटैबो।"
2 "तबेकमारे जब तुहुरे दान देबो, तब् औरे जहनहे देखाइक लग ना करो, जसिके कपटीन यहूदी बैठक भवनमे और डगरमे करथाँ, ताकि मनै ओइन्के प्रशंसा करिँत। जात्तिके, मै तुहुरिन्हे कहतुँ, मनैनके प्रशंसक रुपमे ओइने अपन ईनाम भेटासेकल बताँ। 3 पर जब तुँ गरिब मनैनहे दान कर्बो कलेसे असिके करहो कि ओकर बारेमे दोसुर मनै पता ना पाइँत। 4 तोहाँरिक दान गुप्तमे देजाए, और स्वर्गमे रहुइया तोहाँरिक बाबा, जे वहे गुप्त ठाउँमे फेन बा, और वहे तुहिन्हे ईनाम दि।"
प्राथनक बारेमे
5 येशू कलाँ, "जब तुँ प्राथना करबो, तब् कपटीनके हस ना होऊ। काकरेकी ओइने यहूदी बैठक भवनमे और डगरके चौराहामे ठरह्याके प्राथना करथाँ, ताकि मनै ओइन्हे देखिँत, और ओइन्के प्रशंसा करिँत। जात्तिके, मै तुहुरिन्हे कहतुँ, मनैनके प्रशंसक रुपमे ओइने अपन ईनाम भेटासेकल बताँ। 6 पर जब तुँ प्राथना करबो, अपन भितरका कोन्तीमे जाऊ, और दवार लगाके अपन स्वर्गमे रहुइया बाबाहे प्राथना करो, जोन बाबाहे केऊ फेन देखे नै सेकत। तब तोहाँर बाबा जे गुप्तमे कर्लक काम देखत, ऊ तुहिन्हे ईनाम दि।
उपवास
16 "जब तुहुरे उपवास बैठ्बो, तब् कपटीनके हस उदासी मुहार ना देखाऊ। काकरेकी मनैनसे प्रशंसा पाइक लग ओइने उदास देखैथाँ। जात्तिके, मै तुहुरिन्हे कहतुँ, मनैनके प्रशंसक रुपमे ओइने अपन ईनाम भेटासेकल बताँ। 17 पर तुँ भर उपवास बैठ्बो ते अपन कपारीम तेल लगाऊ और अपन मुह धोऊ। 18 और तोहाँर उपवास मनैनके नै देख्के स्वर्गमे रहुइया बाबा देखी, जे गुप्तमे देखत और जोन बाबाहे केऊ फेन देखे नै सेकत। तब तोहाँर बाबा जे गुप्तमे कर्लक काम देखत, ऊ तुहिन्हे ईनाम दि।"
स्वर्गक सम्पति
(लूक. १२:३३-३४; १६:१३)