16 ओइन्के कामसे तुहुरे ओइन्हे चिहिन्जिबो। झर्कत्तीमेसे अंगुर नै फरत और सेहुँरमेसे अञ्जीर नै फरत। 17 ओस्तेहेँके हर मजा रुख्वा मजा फारा फराइत। पर खराब रुख्वा खराब फारा फराइत। 18 मजा रुख्वा खराब फारा फराई नै सेकत। ना ते खराब रुख्वा मजा फारा फराई सेकत। 19 मजा फारा नै फरैना हर रुख्वा काटके और ढलाके आगीमे फेँकाइल हस झूँटा अगमवक्तनहे फेन अस्तेके दण्ड देजाई।"
सच्चा चेला और झूँटा चेला
20 "असिके तुहुरे उ झूँटा अगमवक्तनहे ओइन्के कामसे चिहिन्बो।"