1 हे मोरिक विश्वासी भैयो, मोरिक अपन मनके इच्छा और इजरायलके मनैनके लग परमेश्वरसे मोरिक प्राथना यहे बा, कि परमेश्वर ओइन्हे बँचाइन। 2 काकरेकी मै ओइन्के गवाही देहतुँ कि परमेश्वरके लग ओइने हौसल ते बताँ, पर परमेश्वरके सेवा कसिके करे परत कहिके ओइन्के थेन ज्ञान नै हुइतिन। 3 काकरेकी परमेश्वर मनैनहे धर्मी बनैथाँ कना बात बुझे नै सेकके ओइने अपने तरिकासे धर्मी बन्ना कोशिस करतिहिँत। और ओइने परमेश्वरके संग धर्मी हुई नै सेक्लाँ।

4 मोशक नियम कानुनके उद्देश्य आब पूरा होगिल बा, काकरेकी ख्रीष्ट आगिल बताँ। तबेकमारे जे फेन ख्रीष्टहे विश्वास करत, उ सक्कु जहनहे परमेश्वर धर्मी बनैथाँ। 5 काकरेकी मोशा परमेश्वरके संग कसिके धर्मी बने सेकजाइत कहिके पवित्र शास्त्रमे असिके लिखल बा: "जोन मनै नियम कानुन पालन करथाँ, ओइने ओम्नेहेँसे जित्ती रहिहीँ।"

6 पर मनै परमेश्वरहे विश्वास करके किल धर्मी बने सेक्थाँ, यकर बारेमे पवित्र शास्त्रमे असिके लिखल बा, "तुहुरे अपन मन-मने असिके ना कहहो, कि ख्रीष्टहे तरे नानक लग स्वर्गसम उप्पर के लेहे जाई?" 7 अथवा अपन मन-मने असिक फेन ना कहहो, "पातालमे के उत्री?" अथवा "ख्रीष्टहे मुअलमेसे जिवाके उप्पर नानक लग!"

8 पर यी यहे कहे खोजता, कि

तुहुरे अपन मुहेँलेके और अपन मनमे यहे सन्देशहे स्वीकार करे सेक्थो, (जोन सन्देश हम्रे प्रचार कर्थी।)

9 यदि तुँ येशूहे प्रभु हो कहिके मनैनके आघे स्वीकार कर्बो, और परमेश्वर येशूहे मुअलमेसे जित्ती करैलाँ कहिके अपन भित्री मनसे विश्वास कर्बो कलेसे पक्कै फेन परमेश्वर तुहिन्हे मुक्ति दिहीँ। 10 हम्रे अपन भित्री मनसे विश्वास कर्थी, तबेकमारे परमेश्वर हम्रिहिन्हे धर्मी ठहरैथाँ। और हम्रे विश्वास कर्थी कहिके कहक लग हम्रे अपन मुहँक प्रयोग कर्थी, यहे कारणसे हम्रे बँचजैथी।

11 काकरेकी यशैया अगमवक्ता ख्रीष्टके बारेमे पवित्र शास्त्रमे असिके लिखल रहे, "जे हुँकारमे विश्वास करी, ऊ निराश नै हुई।" 12 काकरेकी यहूदी और गैर-यहूदिनमे कुछु विभेद नै हो। काकरेकी परमेश्वर सक्कुहुनके प्रभु हुइँत; और हुँकिन्हे गोहरुइयनहे ऊ बँचैथाँ। 13 काकरेकी पवित्र शास्त्रमे असिके लिखल बा, "प्रभु उ सक्कुहुन्हे बँचैहीँ, जे-जे हुँकार नाउँ गोहरैहीँ।"

14 पर मनैनहे परमेश्वरसे सहयोग मंग्नासे पहिले हुँकारमे विश्वास करे परत। और हुँकारमे विश्वास करनासे पहिले हुँकार बारेमे सुने परल। और यदि मनै येशू प्रभुहे विश्वास करना बारेमे नै सुनल हुइँत कलेसे सुनक लग केऊ ओइन्हे हुँकार बारेमे बताई परल। 15 और ओइन्हे जाके बतैनासे पहिले बताइक लग केऊ उहिहे पठाई परल। जसिके पवित्र शास्त्रमे लिखल बा, "खुशीक खबर प्रचार करुइयनके गोरा कतरा सुग्घुर बतिन!"

16 पर सक्कु जाने उ खुशीक खबरहे स्वीकार नै करलाँ। जसिके यशैया अगमवक्ता कहत, "हे प्रभु, बहुत कम मनै हमार सुनैलक खुशीक खबरमे विश्वास करलाँ।" 17 तबेकमारे जब तुहुरे खुशीक खबर सुन्थो, तब तुहुरे विश्वास करथो। और यी खुशीक खबर ख्रीष्टके वचन हो।

18 पर मै तुहुरिन्हे कहतुँ, "मै कहतुँ कि यहूदिनके पक्कै फेन ख्रीष्टके बारेमे खुशीक खबर सुनल बताँ। काकरेकी पवित्र शास्त्रमे असिके लिखल बा,

‘हुँकार सन्देश पूरा पृथ्वीमे,

और हुँकार वचन संसारके हरेक ठाउँमे पुगल बतिन।’"

19 मै फेनदोस्रे तुहुरिन्हे कहतुँ, "हाँ, यी जात्तिक हो कि इजरायलके मनै ख्रीष्टके सन्देशहे नै बुझ्लाँ। आघे ते परमेश्वर मोशा अगमवक्तक माध्यमसे असिके कलाँ,

‘जब तुहुरे गैर-यहूदिनकेमे मोरिक प्रेम देख्बो, तब तुहुरे बिह्रे मुए लग्बो,

मै तुहुरिन्हे एकथो मूर्ख जातिसे रिस लग्वैम।’"

20 तब् यशैया अगमवक्तक माध्यमसे परमेश्वर कलाँ,

"जेने महिन्हे नै खोजिँत, ओइने महिन्हे भेटालेलाँ;

और जेने महिन्हे पुँछिँत फेन नै, ओइन्केमे मै प्रकट होगिनु।"

21 पर इजरायलके मनैनके बारेमे परमेश्वर यशैया अगमवक्तक माध्यमसे कलाँ, "दिनभर मै एकथो आज्ञा नै मनुइया और विवाद करुइया मनैनहे मोरिक थेन घुमके आइँत कहिके मै अपन हाँथ पसर्ले रहुँ।"