1 मै पावल, तिमोथीक संग, ख्रीष्ट येशूक दासके रुपमे यी चिट्ठी फिलिप्पी शहरके मण्डलीक अगुवनहे, मण्डलीक सेबकनहे और परमेश्वरके सक्कु पवित्र मनैनहे लिखतुँ, जेनके सम्बन्ध येशू ख्रीष्टसे बतिन। 2 मै प्राथना करतुँ कि हमार बाबा परमेश्वर और प्रभु येशू ख्रीष्टके ओहोँरसे तुहुरिन्हे अनुग्रह और शान्ति मिल्ती रहे।

3-5 सुरुक दिनसे तुहुरे येशू ख्रीष्टके बारेमे यी खुशीक खबरमे विश्वास करलो, यिहिहे फैलैनामे तुहुरे महिन्हे साथ देले बतो। तबेकमारे जब-जब मै तुहुरिन्के बारेमे सोच्थुँ, तब-तब मै परमेश्वरहे धन्यवाद देथुँ। और मै आनन्दसे प्राथना करथुँ कि परमेश्वर तुहुरिन्हे सहायता करिँत। 6 महिन्हे यी बातके पक्का विश्वास बा, कि परमेश्वर जे तुहुरिन्केमेसे कौनो मजा काम सुरु करल बताँ, वहे उ कामहे उ दिन पूरा करहीँ, जोन दिन येशू ख्रीष्ट फिर्ता अइहीँ। 7 यी ठिक बा कि मै तुहुरिन् सक्कुहुनके लग असिन सोँचुँ। काकरेकी मै तुहुरिन्हे बहुत माया करथुँ। और मै झेलमे बतुँ तभुन फेन खुशीक खबरके रक्षा करनामे और उहिहे साबित करनामे तुहुरे सक्कु जाने मोरिक संग परमेश्वरके अनुग्रहमे शामिल बतो। 8 यम्ने परमेश्वर जन्थाँ कि मै तुहुरिन्से कतरा भेँटा करे चहथुँ। और परमेश्वर जन्थाँ कि मै तुहुरिन्के वास्ता ओस्तेहेँके करथुँ, जसिके येशू ख्रीष्ट करथाँ। 9 मै प्राथना करतुँ कि एकदोसुर जहनकेमे तुहुरिन्के प्रेम, सच्चाइक ज्ञान और सक्कु न्यायक संग आकुर बहरती जाए। 10 तबेकमारे तुहुरे चुने सेको कि कोन काम करना ठिक बा। और ख्रीष्ट फिर्ता नै आइतसम तुहुरे शुद्ध और दोषरहित पलिरहो। 11 अपन जीवनहे धार्मिक तरिकासे जिओ, जोन येशू ख्रीष्टके ओहोँरसे आइत, और जिहिसे परमेश्वरके महिमा और प्रशंसा हुइती रहे।

12 हे मोरिक विश्वासी भैयो, मै चहथुँ कि तुहुरे यी जानलेऊ कि मोरिक संग ज्या हुइल बा उहिसे खुशीक खबरहे फैलैनामे बहुत सहयोग मिलल बा। 13 यहाँसम कि महाराजक महलके सारा पल्टन और बाँकी रहल सक्कु मनैनके बिच्चेम यी पता चलगिलिन कि ख्रीष्टके सेबक हुइलक कारण मै झेलमे बतुँ। 14 और मै झेलमे हुइलक कारण प्रभुमे बहुत्ते विश्वासी संघरियनहे अतरा हिम्मत आगिल बतिन कि ओइने बिना डरैले परमेश्वरके वचन बोले सेक्थाँ। 15 कौनो-कौनो झग्राहा मनै बिह्रे मुती ख्रीष्टके प्रचार करिँत। पर कौनो मनै ईमानदारीसे खुशीक खबर प्रचार करनामे मोरिक सहायता करक लग प्रचार करिँत। 16 जोन मनै खुशीक खबरहे ईमानदारीसे प्रचार करथाँ, ओइने प्रेमके कारण असिके करथाँ। काकरेकी ओइने जन्थाँ कि ख्रीष्टके बारेमे खुशीक खबरके रक्षा कर्लक कारण मै झेलमे परल बतुँ। 17 पर उ मनै जेने बिह्रे मुथाँ, ओइने स्वार्थी इच्छासे ख्रीष्टके प्रचार करथाँ। और ओइने यहाँ झेलमे मोरिक समस्या आकुर बह्राई चहथाँ। 18 यिहिसे कौनो फरक नै परी! खास बात यी हो कि चाहे उ मजा इच्छासे होए, चाहे गलत इच्छासे होए जसिके हुइलेसे फेन ख्रीष्टके बारेमे खुशीक खबरके प्रचार हुइता। तबेकमारे यक्रेहे कारण मै खुशी बतुँ और खुशी पलिरहम। 19 काकरेकी मै जन्थुँ कि तुहुरिन्के प्राथनासे और येशू ख्रीष्टके ओहोँरसे पठागिलक पवित्र आत्मक सहायतासे मै झेलमेसे मुक्त हुइम। 20 मोरिक मनके इच्छा और आशा यी हो कि मोरिक लाज ना होए। बेन मोरिकमे ख्रीष्टके बारेमे बोल्ना हिम्मत होए, जसिके मै बितल समयमे करल रहुँ। चाहे मै जित्ती रहुँ चाहे मै मुजाऊँ, मै अपन पूरा जीवनसे ख्रीष्टके आदर कर्ती रबुँ। 21 काकरेकी यदि मै जित्ती रहम कलेसे यी ख्रीष्टके लग हुई। और जब मै मुजिम कलेसे यी मोरिक लग आकुर फेन मजा हुई। काकरेकी तब मै ख्रीष्टके संग रहम। 22 पर यदि शरीरमे जित्ती होके मै ख्रीष्टके लग आकुर फलदायी काम करे सेकम। ते मै नै जन्थुँ कि यम्नेमेसे कोन मजा हो। 23 काकरेकी मै ते दोधारमे परल बतुँ। मन ते कहत कि मुजाऊँ और जाके ख्रीष्टके संग रहुँ। काकरेकी यी गजब मजा बा। 24 पर मोरिक जित्ती रना जरुरी बा। काकरेकी तुहुरिन्हे मोरिक सहायतक जरुरी बा। 25 तबेकमारे महिन्हे भरोसा बा और मै जन्थुँ कि मै जित्ती रहम। और मै तुहुरे सक्कु जहनके संग रहम, जिहिसे मै तुहुरिन्हे तुहुरिन्के विश्वासमे बल्गर हुइक लग और ओम्ने खुशी रहक लग सहायता करम। 26 ताकि जब मै फेनदोस्रे तुहुरिन्के संग रहम तब तुहुरे मोरिक कारण येशू ख्रीष्टके बारेमे आकुर धेउर घमण्ड करे सेको।

27 ध्यान धारो, कि तुहुरिन्के चालचलन ख्रीष्टके खुशीक खबरके अनुसार किल होए। चाहे मै आके तुहुरिन्हे भेँटा करुँ या ना करुँ, मै तुहुरिन्के बारेमे यहे सुनु कि तुहुरे एक्के उद्देश्यक लग स्थिर होके एक्के संग मिलके खुशीक खबरमे आधारित विश्वासके लग लरतो। 28 और कौनो बातमे फेन विरोधीनसे नै डरैथो। तुहुरिन्के हिम्मत ओइन्के विनाशके लग फरछ्वार चिन्हा हो। पर तुहुरिन्के लग मुक्तिक सबुत हो, और यी परमेश्वरके ओहोँरसे हो। 29 काकरेकी परमेश्वर तुहुरिन्हे ख्रीष्टमे विश्वास करना किल नै हो, पर तुहुरिन्हे दुःख सहना फेन सौभाग्य देले बताँ। काकरेकी तुहुरे परमेश्वरकेमे विश्वास करथो। 30 और तुहुरिन्हे ओस्तेहेँ संघर्ष करना बा जसिके तुहुरे महिन्हे संघर्ष करत देख्लो जब मै फिलिप्पी शहरमे रहुँ। और जोन संघर्षक बारेमे तुहुरे सुन्थो, उ संघर्ष अभिन फेन महिन्हे झेलमे करे परता।