1 ख्रीष्टमे बती कहिके तुहुरे हौसल बतो। काकरेकी तुहुरे अपनमे ख्रीष्टके प्रेमसे सान्त्वना भेटाइल बतो। काकरेकी तुहुरिन्के सहभागिता पवित्र आत्मक संग बा। और काकरेकी ख्रीष्ट तुहुरिन्केमे करुणा और दया देखैले बताँ। 2 कलेसे तुहुरे एक्के संग रहिके, एकदोसुर जहनहे प्रेम करके और एक्के उद्देश्यक लग एक्के मन होके तुहुरे मोरिक आनन्दहे पूरा करो। 3 स्वार्थ या घमण्डसे कुछु ना करो, पर जतरा आदर तुहुरे अपनहे करथो, उहिसे धेउर आदर तुहुरे दोसुर जहनहे करो। 4 तुहुरे हरेक जाने अपन किल भलाई ना खोजो, पर दोसुर जहनके भलाईमे फेन ध्यान देऊ।

5 जसिन येशू ख्रीष्टके स्वभाव रहिन, ओस्तेहेँ स्वभाव तुहुरिन्केमे रहे परत। 6 ऊ परमेश्वर रहिँत, तभुन फेन ऊ परमेश्वरके बराबरी हुइना बातहे एकथो पकरले रना चिज हस नै सोच्लाँ। 7 पर येशू सक्कु चिज छोरदेलाँ, और नोकरके रुप धारण करलाँ, और ऊ एकथो मनैया बनगिलाँ। 8 और मनैयक रुपमे देखा परके अपनहे नम्र बनैलाँ। और परमेश्वरके आज्ञा मानके ऊ मुअक लग फेन तयार रहिँत। और एकथो अपराधीक हस क्रूसके मृत्यु फेन सहलेलाँ। 9 तबेकमारे परमेश्वर हुँकिन्हे सक्कुहुनसे ऊँच पद देलिन। और हुँकिन्हे उ नाउँ देलिन, जोन नाउँ सक्कु नाउँसे भारी बा। 10 ताकि जेने स्वर्गमे और पृथ्वीमे और पृथ्वीक तरे बताँ, उ सक्कु जाने येशूहे आदर देहक लग ठेहुनी टेकिँत। 11 और परमेश्वर बाबक महिमक लग सक्कु जाने स्वीकार करलिँत कि ख्रीष्ट येशूए प्रभु हुइँत।

12 तबेकमारे हे मोरिक प्रिय संघरियन, जसिके तुहुरे पैलेहेँसे मोरिक आज्ञा मन्ती आइल बतो। ओस्तेहेँके अब्बे मोरिक संग रहलमे किल नै होके विशेष करके महिन्से दूर रहलमे फेन तुहुरे हरेक जाने डरैती और लग्लगैती उ सक्कु कामहे करे परना हो। जोन काम उ मनैनके लग ठिक बतिन, जेनहे परमेश्वर मुक्ति देले बताँ। 13 काकरेकी परमेश्वर तुहुरिन्केमे काम करतताँ। तबेकमारे तुहुरिन्हे उ सक्कु करना इच्छा और शक्ति देहतताँ जोन कामसे ऊ खुशी हुइथाँ। 14 सक्कु काम बिना गन्गनैले और वाद-विवाद बिना कर्ले करो; 15 ताकि तुहुरे निर्दोष और चोखा होके खराब और भ्रष्ट पुस्तक मनैनके बिच्चेम परमेश्वरके कलंक बिनक सन्तान बनल पलिरहो। यी संसारके मनैनके बिच्चेम तुहुरे आकाशमे रहल तोरैयँन हस चम्के परत। 16 ताकि जब ख्रीष्ट फिर्ता अइहीँ तब मोरिक कोशिस और मोरिक मेहनत बेकारमे नै रहे कहिके महिन्हे घमण्ड करना कारण मिले। 17 जब मै तुहुरिन्हे खुशीक खबर सुनैनु ते तुहुरे प्रभु येशूकमे विश्वास कर्लो, और हुँकार सेवक लग अपन जीवनहे बलिदान करक लग देलो। तबेकमारे खुशीक खबर सुनैलक ओहोँरसे यदि महिन्हे मुवादेजाई कलेसे फेन मै तुहुरिन्के संग आनन्दित और खुशी रहम। 18 ओस्तेहेँके तुहुरे खुशी हुई परना हो और मोरिक संग आनन्द करे परना हो।

19 महिन्हे प्रभु येशूकमे आशा बा कि मै तिमोथीहे तुहुरिन्के थेन झत्तेहेँ पठैम, ताकि तुहुरिन्के हालखबर सुनके महिन्हे उत्साहा मिले। 20 काकरेकी मोरिक थेन असिन स्वभाव रहल केऊ नै हो, जे चोखा मनसे तुहुरिन्के चिन्ता करे। 21 काकरेकी सक्कु जाने अपन स्वार्थक बारेमे सोँच्थाँ। और येशू ख्रीष्टसे सम्बन्धित बातके बारेमे ओइने नै सोँच्थाँ। 22 पर तुहुरे जन्थो कि तिमोथी कसिके साबित करल कि ऊ बफादार बा कि जसिके छावा बाबक संग मेहनत करत, ओस्तेके खुशीक खबर फैलैनामे मोरिक संग ऊ महान काम कर्ले बा। 23 तबेकमारे महिन्हे आशा बा, कि मोरिक संग का हुइक लग बा कहिके महिन्हे पता चल्तिकी मै तिमोथीहे तुहुरिन्के थेन पठादेहम। 24 और महिन्हे प्रभुकमे भरोसा बा कि मै फेन झत्तेहेँ अइबुँ।

25 मै इपाफ्रोडिटसहे तुहुरिन्के थेन पठैना जरुरी सम्झनु। जे मोरिक भैया और सहकर्मी और सिपाही-संघरिया और तुहुरिन्के पठाइल हुलाकी और जरुरी बातमे मोरिक सेवा करुइया मनैया हो। 26 मै उहिहे यी कारणसे फेन पठाइतुँ। काकरेकी तुहुरे सक्कुहुनसे भेँटा करक लग उहिहे गजब मन लागल रहिस। और ऊ बेमार बा कना बात तुहुरे सुनलेले बतो कहिके ऊ चिन्ता करतेहे। 27 और ऊ जात्तिके बेमार होगिल रहे, यहाँसम कि ऊ मुना हस फेन होगिल रहे। पर परमेश्वर उहिहे चोख्वैलाँ; ओकरमे किल नै, पर महिन्हे फेन परमेश्वर दया देखैलाँ ताकि मै उहिसे धेउर आकुर दुःख ना उठाऊँ, जत्रा दुःख मै पैलेहेँसे उठाइतुँ। 28 तबेकमारे उहिहे तुहुरिन्के थेन पठाइक लग मै आकुर धेउर कोशिस कर्नु ताकि उहिसे भेँटा करके तुहुरे खुशी होजाऊ, और मोरिक मन फेन शान्त होजाए। 29 तबेकमारे तुहुरे प्रभुमे उहिसे खुशीसे भेँटा करहो, और तुहुरिन्हे ओकर और ओकर हस मनैनके सम्मान करे परत। 30 काकरेकी ऊ ख्रीष्टके कामके लग अपन प्राणहे जोखिममे दारल, यहाँसम कि मुचुकल रहे। ताकि ऊ मोरिक सहायता करे सेके, जोन सहायता तुहुरे करे नै सेकथुइतो, काकरेकी तुहुरे गजब दूर बतो।