1 हरेक मनै शासन करुइया अधिकारीनके अधिनमे बैठिँत; काकरेकी सक्कु अधिकार परमेश्वरके थेनसे आइत; और जोन अधिकार बताँ, उ परमेश्वरेके देलक हुइतिन। 2 तबेकमारे जेने असिन मनैनके विरोध करथाँ, जेनके थेन शासन करना अधिकार बतिन, कलेसे ओइने परमेश्वरके देहल नियम कानुनके विरोध करथाँ, और असिके विरोध करुइयन दण्ड भेटैहीँ।

3 काकरेकी यदि केऊ मजा काम करता कलेसे उहिहे शासन करुइयनसे डराई परना जरुरी नै हुइतिस। और मजा काम करता कलेसे उहिहे ओइने सम्मान फेन दिहिस। पर यदि ऊ खराब काम करता कलेसे ते उहिहे डराई परना जरुरी बतिस। 4 काकरेकी उ अधिकारी मनै तोहाँर सहयोगके काम करक लग ओइने परमेश्वरके सेबक हुइताँ। पर यदि तुँ खराब काम करतो कलेसे तुहिन्हे डराई परना जरुरी बा। काकरेकी उ अधिकारीनके थेन तुहिन्हे सजाय देहक लग अधिकार बतिन। और ओइने खराब काम करुइयनहे परमेश्वरके देना सजाय देहक लग ओइन्हे परमेश्वर नियुक्त कर्ले बतिन। 5 तबेकमारे परमेश्वरके दण्डसे बँचक लग किल नै होके तुहुरिन्के सोँचहे फेन शुद्ध धारक लग तुहुरिन्हे ओइन्के अधिनमे बैठे परत।

6 तबेकमारे तुहुरे ओइन्हे कर फेन देहे परत, काकरेकी शासन करुइयन परमेश्वरके सेबक हुइँत। और ओइने अपन जिम्मेवारी निभाइक लग अपनहे समर्पित कर्ले रथाँ। 7 तबेकमारे जिहिहे ज्या देहे परना बा उहिहे वहे देऊ। जिहिहे कर देहे परना हो, उहिहे कर देऊ; जिहिहे महसूल देहे परना हो, उहिहे महसूल देऊ; और जिहिहे आदर और सम्मान देहे परना हो, उहिहे आदर और सम्मान देऊ।

8 तुहुरिन्के सक्कु जहनके एक्केथो किल ऋणी हुई परत, और उ यी हो कि तुहुरे सक्कु जाने एकदोसर जहनसे प्रेम करो; काकरेकी जे दोसुर जहनहे प्रेम करत, वहे मनैया मोशक नियम कानुनहे पूरा करत। 9 काकरेकी मोशक नियम कानुनमे बहुत्ते आज्ञा बताँ जसिके कि, "व्यभिचार ना कर। हत्या ना कर। चोरी ना कर। लालच ना कर।" और यी आज्ञा बाहेक बाँकी औरे सक्कु आज्ञक सारांश यहे आज्ञामे मिलत कि, "तैँ अपन परोसीहे अपने हस प्रेम कर।" 10 प्रेम परोसीक कुछु खराबी नै करत, तबेकमारे जे प्रेम करत, ऊ परमेश्वरके देहल मोशक नियम कानुनहे पूरा करत।

11 तुहुरे सक्कु जाने एकदोसर जहनहे प्रेम कर्ती रहे परत, काकरेकी उ समय लग्गेहेँ बा, जब परमेश्वर हम्रिहिन्हे यी खराब संसारमेसे बँचैहीँ। जब हम्रे सुरुमे ख्रीष्टहे विश्वास कर्ले रही, उ समयसे अब्बेक समय लग्गे बा। यहे जानके तुहुरिन्हे अपन निंदमेसे जागे परत, और सावधान हुई परना हो। 12 असिन लागत कि जसिके एकथो रात रहत, ओस्तेहेँके यी खराब संसारमे हमार रना समय फेन लगभग ओरासेकल बा, और ख्रीष्टके अइना समय फेन लग्गेहेँ बा। तबेकमारे हम्रे अंधारमे मनैनके करना खराब कामहे छोरदी, और हम्रे उ हँथियार प्रयोग करी, जेनहे दिनके ओजरारमे सैनिकहुँक्रे प्रयोग करथाँ।

13 आऊ, हम्रे अपन व्यवहारहे उ मनैनके हस ठिक करना सुरु करदी, जेने अंधारमे नै रहिके ओजरारमे रथाँ। मोजमज्जा करना, जाँर-दारु पिना, व्यभिचार करना, भ्रष्टाचार करना, झगरा करना और एकदोसर जहनके हिस्का मुना जसिन सक्कु खराब काम छोरदी। 14 बेन प्रभु येशू ख्रीष्टहे अपन हँथियार बनालेऊ, और अपन पापी स्वभावके अभिलाषा पूरा करना बातमे ध्यान ना देऊ।