1 विश्वासीनहे याद देहवाऊ कि ओइने हाकिम और अधिकारीनके आदर करिँत। ओइन्के आज्ञा मानिँत, और दोसुर जहनके लग मजा काम करक लग तयार रहिँत। 2 ओइने केक्रो फेन बदनाम ना करिँत्। झगरा ना करिँत। और दोसुर जहनहे दया देखाइँत। और सक्कु मनैनके संग नम्रतासे रहिँत। 3 काकरेकी विश्वासी बन्नासे आघे हम्रे फेन मूर्ख रही। और परमेश्वरके आज्ञा नै मन्नाहाँ रही। और हम्रे मनैनसे धोखा खैली। और जोन खराब कामहे हम्रे करे चाहतिही। और जोन कामहे करके हम्रिहिन्हे आनन्द मिले, ओसिन हर मेरिक खराब कामहे करना हम्रे छोरे नै सेकतिही। और हम्रे अपन जीवनहे महा घिनाहुन तरिकासे जिअतिही। और हम्रे दोसुर जहनसे बिह्रे मुअतिही। और हम्रे घृणित रही, और सक्कु जाने हम्रिहिन्हे घृणा करिँत। और हम्रे फेन ओइन्हे घृणा करी। 4 पर तभुन फेन हमार मुक्तिदाता परमेश्वर हमारमे अपन दया और प्रेम देखैलाँ। 5 ऊ हम्रिहिन्हे पापके दण्डसे बँचैलाँ, ऊ हमार अपने धार्मिक कामके कारण असिके नै करलाँ। पर ऊ हमारमे दया कर्लक कारण ऊ हम्रिहिन्हे पवित्र आत्मा देके हम्रिहिन्हे बँचालेलाँ। ऊ हमार पापहे धुइलाँ और हम्रिहिन्हे एकथो लावा जीवन जिअक लग और लावा तरिकासे व्यवहार करक लग हम्रिहिन्हे एकथो तरिका देलाँ। 6 परमेश्वर हम्रिहिन्हे प्रशस्त मात्रामे पवित्र आत्मा देले बताँ, ताकि उ पवित्र आत्मा हमार भित्तर शक्तिशाली रुपमे काम करे। काकरेकी येशू ख्रीष्ट हमार पापके लग मुलाँ ताकि ऊ हमार मुक्तिदाता बने सेकिँत। 7 ताकि हम्रे उ सदाकालके जीवन भेटैना आशा करे सेकी, जोन जीवन परमेश्वर हम्रिहिन्हे देना वाचा कर्ले बताँ। काकरेकी हम्रे हुँकार सन्तान हुइती। और हम्रे यी विषयमे पक्का हुई सेक्थी, काकरेकी परमेश्वर अपन अनुग्रहसे हम्रिहिन्हे अपन संग सही ठहरैले बताँ। 8 जोन बात मै अब्बे तुहुरिन्हे बतैनु यी बात विश्वास करना योग्यक बा। और मै चहथुँ कि तुँ यी बातके बारेमे विश्वासीनहे बल्गरसे सिखाऊ, ताकि जेने परमेश्वरकेमे विश्वास कर्ले बताँ, ओइने मजा काम करक लग अपन दिमागहे हरदम व्यस्त कर्ले रहिँत। यी शिक्षा सक्कु जहनके लग मजा और फाइदाजनक बा। 9 पर मूर्खता और अज्ञानता भरल वाद-विवादसे, पुर्खनके नम्मा सूचिसे, बिनाकामक बात और मुद्दक बारेमे वाद-विवाद और झगरासे और मोशक नियम कानुनके बारेम रहल सक्कु बातसे तुँ दूरे रहहो। काकरेकी यी बात बेफाइदा और बेकारके हुइँत। 10 मण्डलीमे फुट दरना काम करुइया मनैनहे ओइने असिक करना बन्द करदिँत कहिके तुँ ओइन्हे कमसे कम एकदुईचो चेतावनी देहो। ओकर पाछे ओइन्केमे तुँ अपन समय बर्बाद ना करहो। 11 और तुँ पक्का रुपमे जानलेबो कि असिन मनैया जनजन्ति पाप करता। और उ मनैया पापी हो और ओकर खराब काम उहिहे साबित कर्थिस कि ऊ दोषी बा।

12 मै अर्तिमास या तुखिकसमेसे एक जहनहे क्रेट टापुमे तोहाँर थेन पठैम। और जब ऊ वहाँ पुगी कलेसे झत्तेहेँ निकोपोलिस शहरमे तुँ महिन्से भेँटा करना कोशिस करहो। मै जार छेँक निकोपोलिस शहरमे बितैना निर्णय लेले बतुँ। 13 जब जेनास नाउँ रहल यहूदी कानुनके गुरु और अपोल्लोस नाउँ रहल एकथो दोसुर मनैया यात्राके लग निक्रिहीँ। तब तुँ ओइन्हे सहायता करक लग ज्या करे सेक्बो उ करहो। और ओइन्हे जरुरी परना चिज हेरके तुँ ओइन्हे दैदेहो, ताकि यात्रा करेबेर ओइन्हे कुछु फेन चिजके कमि ना हुइन। 14 अतरा किल नै हो, पर तुँ विश्वासीनहे सिखैती रहहो कि मजा काम करक लग हरदम मेहनत करे परत। ताकि यने उ मनैनके जरुरीहे पूरा करे सेकिँत, जेनके थेन ओइन्के जरुरीक चिज नै हुइतिन। और असिक कर्लेसे विश्वासीन एकथो लक्ष्यक संग अपन जीवन जिए सेक्हीँ। 15 मोरिक थेन रहल यहाँक सक्कु विश्वासीन तुहिन्हे अभिवादन करतताँ। और क्रेट टापुमे रहल हमार विश्वासी संघरियनहे जेने हम्रिहिन्हे प्रेम करथाँ, ओइन्हे फेन हमार ओहोँरसे अभिवादन करदेहो। मै प्राथना करतुँ कि प्रभु तुहुरिन्केमे अनुग्रह करिँत।