Lucas 7

Ana Jisos limi nlokeltum a nne a Rom, á nob

1 Eji Jisos ma bung nsol nyia kpee mal, tong ane bao, á kehm tahme go Kapenium.

2 Ntubesi a nsoja awohng jolo o, no bele nlokeltum no jo sahb kor-e kor. Nlokeltum ewe noo jo yame, are á bahke kpoko. 3 Eji ntubesi a nsoja noo wuku bada Jisos, á kehm tumu anebkul Jus bandiki re bo song gboong-e, á ba lim nlokeltum ewe nob.

4 Eji bo ba rehng goji Jisos, bo kehm sahb gboong-e gboongo re, "Ntubesi noo, fꞌfuumu re wo kak-e ebo. 5 Tibre ejahbe ejahre kpo kor-e sehng. Yebsi etahk ero ka-r."*7:5 Elt 10:1-2

6 Owo Jisos kehm tahme toono bo. Eji á ma kabbe etahk jio, ntubesi a nsoja noo kehm tumu ate ebe tv-e.

Bo kehm-e song tong re, "Ntubesi re, wo kꞌkpe gbiingi elna mbol mbol, are ye fuumem re wo song yel ege ekpꞌkpa. 7 Jol á fuumem re á ba go ega.*7:7 Luk 5:8 Are, wo lub bung ellum ellum, nlokeltum ewe bahke nobo. 8 Ntubesi re, á li nne no wob go elwo nne. Á tob kpi nsoja nyi tob wob-e go elwo. Á lꞌtong nne noko re, ‘Song!’ Tahm. Á lꞌtong nne noka re, ‘Ba!’ Á ba. Á lꞌtong nlokeltum ewe re, ‘Lim ejum jia!’ Á lim na lim."

9 Jisos, esi kehm-e kpoko, eji á wuku ano. Á kehm keebe, kehm bungu tong ellong ane ba jo toon-e re, "N kp-n tongo re, Jol go Israel n ka tiki nyehn nne no kpi elkohn egburu eltaame ana nia."

10 Eji ane ba ntubesi a nsoja noo tumu bo feere no, ba rehng ege etahk, bo ba nyehne nlokeltum noo ma lohko nob.*7:10 Jon 4:47-54