Nekšukareder giľi 6

O džuvľa

1 Kaj geľa oda murš, saves kames,

tu nekšukareder maškar o džuvľija?

Pre savo drom visaľiľa oda, kas kames?

Odphen amenge, hoj les te džas tuha te rodel.

E džuvľi

2 Miri laska geľa tele andre peskri zahrada,

kaj barol o koreňja,

hoj peske te radisaľol andre zahrada

a te kidel o ľaľije.

3 Me som oleskri, ko man kamel, a ov hino miro,

čaľarel pes maškar o ľaľije.

O murš

4 Šukar sal, lasko miri, sar e Tirca,

ajsi šukar sar o Jeruzalem,

užasno sar o čercheňa pro ňebos*6,4 Na džanel pes, so phenel e hebrejiko čhib. .

5 Tire jakha man igen pricirden,

ma dikh pre ma!

Tire bala hine kale sar o stados le kozengro,

so avel tele pal o verchi andro Gilead.

6 Tire danda hine sar o bakrano stados,

so sas akana ča žužarde andro paňi.

Savoren hin peskri dvojička,

aňi jekh lendar na chibaľinel.

7 Tire čhama pal o zavojis

hine ajse lole sar e jepaš granatoskri phabaj.

8 Šaj el le kraľis šovardeš kraľovni,

ochtovardeš romňija-služobňički

a pačivale čhaja buter, sar pes del te zrachinel,

9 ale miri holubica hiňi jekhori,

nane pre late ňisavi chiba,

jekhori čhaj peskra dakri,

nekšukareder olake, ko la anďa pro svetos.

Dikhle la o terne čhaja a phende lake: „Požehňimen sal!"

O kraľovni the o romňija-služobňički la lašarenas.

10 „Ko hin odi, so dikhel uprunestar sar e tosarutňi čercheň,

šukar sar o čhonoro, švicinel sar o kham,

užasno sar o čercheňa pro ňebos*6,10 Na džanel pes, so phenel e hebrejiko čhib. ."

11 Geľom tele andro zahradi, kaj baron o pendecha,

te dikhel o neve konarica andre dolina.

Kamľom te dikhel, či imar o viňičis mukľa o pučiki

a či imar kvitňisaľon o granatoskre phaba.

12 Zaiľa man o radišagos,

izdravas avke, sar te geľomas pro kraľiko verdan*6,12 Na džanel pes, so phenel e hebrejiko čhib..