1 Vigos olenge, ko gondoľinen avri o nalačhipen

a pre peskre hadži plaňinen o nalačho!

Sar vidňisaľol, keren oda,

bo hin oda andre lengri zor te kerel.

2 Žadinen peske avrengre maľi a zalen len,

kamen o khera a len peske len;

klamišagoha dochuden o khera

a len le manušenge o ďeďictvos.

3 Vašoda phenel o RAJ kada:

„Me gondoľinav te mukel pre kala manuša o nalačhipen,

andral savo pes na dochudena avri;

imar na phirena barikanes,

bo oda ela igen nalačho časos.

4 Andre oda džives peske tumendar kerena pheras

a asana tumendar kala žaľakra giľaha:

‚Sam calkom zňičimen.

Mire manušengro ďeďictvos hino rozďelimen,

o RAJ amenge les iľa het.

Amare maľi diňa olenge, ko amen zaile.‘ "

5 Vašoda tut na ela ňiko andro zhromažďeňje le RAJESKRO,

ko tuke merinďahas avri tiri phuv le lanoha

a diňahas pale sakoneske leskro phuvakro kotor.

6 On prorokinen: „Ma prorokin!

Pal kajse veci na kampel te prorokinel.

Pre amende kajsi ladž na avela!"

7 Sar šaj phučen, tumen manušale andral o Izrael:

„Šaj našavel o RAJ peskri trpezľivosť?

Či kerel ov kajse veci?"

Mire lava anen o lačhipen oleske,

ko dživel spravodľivones?

8 No tumen ušťen upre

pre mire manuša sar o ňeprijaťeľis.

Cirden tele o plašťos pal ola,

ko predžan pašal tumende andro smirom;

pal ola, ko aven pale andral o mariben.

9 Traden avri mire manušengre džuvľijen

andral lengre šukar khera

a lengre čhavendar len het

miro požehnaňje pro furt.

10 Ušťen a džan het!

Kade tumenge na odpočovinena!

Tumare bini meľarde andre kada than,

vašoda hino odsudzimen pre zahuba.

11 Te avľahas varesavo klamaris a phenďahas:

„Prorokinava tumenge but mol the pijiben,"

ov uľahas lačho prorokos kale manušenge!

12 Ale me skidava upre savoren tumendar, Jakobona,

skidava upre savore Izraeliten, so ačhile.

Skidava len sar le bakroren andre ohrada,

sar o stados, so pes pašinel;

pre oda than ela pherdo manuša.

13 O Del, savo premarel o drom, džala anglal lende;

predemena e brana a avena avri.

Lengro Kraľis džala anglal lende,

o RAJ len ľidžala.