Matuš 3

O Jan Krsťiťeľ

1 Andre ola dživesa avľa o Jan Krsťiťeľ a kazinelas pre judsko pušťa 2 a phenelas: „Visaren tumen le binendar! Bo pašes hin le ňeboskro kraľišagos!" 3 O Jan hin oda, pal savo imar anglal phenďa o prorokos Izajaš:

„O hangos vičinel pre pušťa:

‚Pripravinen o drom le Rajeske,

rovňinen prekal leste avri o chodňiki!‘ "

4 Ov sas urdo andro gada la ťavakra srsťatar, pašal o per les sas cipuno sirimos a chalas kobilki the maľakro medos. 5 Akor avenas ke leste o manuša andral o Jeruzalem, caľi Judsko the caľi phuv pašal o paňi Jordan 6 a phenenas avri peskre bini a ov len bolelas andro paňi Jordan.