1 Phralale, jilestar kamav a mangav le Devles, hoj o Izrael te avel zachraňimen. 2 Šaj phenav, hoj labon pal o Del, ale nane len spravno prindžaripen. 3 Bo na prindžaren le Devleskro spravodľišagos a kamen te presikavel peskro spravodľišagos, na poddine pes le Devleskre spravodľišagoske. 4 Se o Kristus hin o koňec le zakonoskro, hoj sako, ko pačala, te avel spravodľivo anglo Del.

5 Bo o Mojžiš pisinel pal o spravodľišagos andral o zakonos: „Oda manuš, ko doľikerela leskre prikazaňja, dživela lendar." 6 Ale o spravodľišagos prekal o pačaben, phenel kada: „Ma phen tuke andro jilo: ‚Ko džala upre andro ňebos?‘ (Oda hin te anel le Kristus tele.) 7 Abo: ‚Ko džala tele andro svetos le mulengro?‘ (Oda hin te anel le Kristus upre andral o meriben.)" 8 Ale sar phenel? „Oda lav hino igen pašes, hino andre tiro muj the andre tiro jilo" – oda hin oda lav pal o pačaben, so vakeras. 9 Bo te viznavineha le Ježiš sar Rajes a pačaha andre tiro jilo, hoj les o Del uštaďa andral o meriben, aveha zachraňimen. 10 Se le jileha pes pačal, hoj te avas čačipnaskre, ale le mujeha pes viznavinel, hoj te avas zachraňimen. 11 Bo hin pisimen: „Sako, ko andre leste pačala, na ladžala pes." 12 Oda hin jekh, či oda hin Židos vaj Grekos, bo oda jekh Raj hino Raj savorenge – barvalo ke sakoneste, ko les mangel. 13 Bo sako, ko vičinel pro nav le Rajeskro, ela zachraňimen.

14 Ale sar šaj pre leste vičinena, te andre leste na pačanďile? A sar šaj pačana andre oda, pal kaste na šunde? A sar šaj šunena, te ňiko lenge o lav na vakerela? 15 A sar šaj vakerena, te na ena bičhade? Avke sar hin pisimen: „Save šukar hine o pindre olengre, save aven te vakerel o lačho hiros pal o lačhe veci."

16 Ale na savore priile o evaňjelium, bo o Izajaš phenel: „Rajeja, ko pačanďiľa amare lavenge?" 17 O pačaben avel akor, sar šunas, a šunas akor, sar pes vakerel o lav le Kristoskro.

18 Ale phučav: So, čačes na šunde? Sar hoj na? Šunde! Avke sar hin pisimen:

„Lengro hangos pes rozľigenďa pal caľi phuv

a lengre lava dži pro agor le svetoske."

19 Pale phučav: Či oda o Izrael na achaľiľa? O Mojžiš ešebno pre oda odphenďa:

„Me kerava, hoj o manuša andral o Izrael te žjarlinen

pro manuša, save aňi nane narodos.

Kerava, hoj te chan choľi

pro narodos, savo nane goďaver."

20 O Izajaš pes na daralas te phenel:

„Diňom man te arakhel olenge, ko man na rodenas,

sikaďom man olenge, ko pal ma na phučenas."

21 Ale pal o Izrael phenel:

„Calo džives nacirdavas mire vasta

ko manuša, save na kamenas te šunel

a ačhenas mange pre čhib."