1 E ni Yaaya tolense ni nsubiya Yesu Ni rubuta ku takada mu,

Te anya ni oboki na Gayusu, nsude ni ma so ni gaskye.

2 Oboki na de mma so, Mma yi lepa de ki mani selema a kowoni turiki nja lapiya nkyake yiride leyi ke e mani lapiya. 3 Ni yi peri siki de worosu su yayuwa zo beyi sheeda a kiya yiride ki sakisi nsori a siki gaskye nja yiride ki meyi tepiya a siki gaskye. 4 Mbode yaa pi sa ni perisiki e shiya de ni zi nkye yaya na su ma yi tepiya a siki gaskye.

5 Oboki na de na so, ki mani gaskye a siki guru mbode ki meyi sobon yayuwa nsubiya Yesu, kode su ma bakwe na anya ake. 6 Ntani de ki sua gye nsubiya Yesu yiri so de ki ma nshi. Sigeba ni sua su nto a siki tepiya su de su meyi a turiki de yaa jima Mirikisi. 7 Ntani worosu mu su butu awuje sobon manki seni Kiristi, su ma keleba kyawuta ni mbodaa anya nsubiya boka ba. 8 Nkayomu e kamata de mu sua yiri ntani worosu mu nto de nana nkye mua yi ANKI yere a kiya gaskye.

9 Ni rubuta takada mu te nja nsubiya Yesu, sede Diyotaripis, de so e ma tolense a siki asu, ki de zi beta amu. 10 Nde ni te zo anya ku, Na pelesa mbode e yi a boyi: yaa yi yowa beta a kiya mu! E dete yi ba; e ki yi yayuwa nnaba, ari e nana nsubiya Yesu de sua bila yi su nnaba, e kula su butu bila siki nsubiya Yesu.

11 E ke oboki na, kede ki biya mbo mumungu sede mbode ma kyakyawu. Du nsude yi mbo kyakyawu e mani Mirikisi la. Du nsude yi mbo mumungu e shina Mirikisi ba kpataka. 12 Dimitiriyus konwawa meyi beta kyakyawu a kiya e yi ari gaskye nkiya yi meyi beta a kiya yi du. Omu ma mu beyi sheeda a kiya e yi, ki shina nkye sheeda mu ma gaskye la.

13 Ni mani mbo nyowa de na rubuta ke nshi, na bila de ni rubuta su a takada nja mbo rubutu ba. 14 Ni ma sadishiya de ngeni ke ndede ba, de mu gomu pisika npisika.

15 Selema ma nja ke. Nsu oboki ake sua geshe ke. Geshe nsu oboki amu anya ni guru.