1 Takada mu Butu dege anya tolense,

Te nja iwa gizi de Mirikisi zabi nja yaya yi, worede mma so su ni gaskye. Ba Eni dandaa na ba, sede ari guru worede su shina gaskye du, 2 sobon gaskye ni Mirikisi, de ma a siki amu nja yaa ma nja mu ari gbogbo:

3 Aniyeri, toseyi nja selema ni Mirikisi Adaa dege anya Yesu Kiristi, Yaa ni Adaa, yaa ma nja mu a siki gaskye nja so.

4 Ni yi peri siki soseyi de ni san worosu su a siki yaya aku sua yi tepiya a siki gaskye, yiride Adaa ba mu doka. 5 Kuzukam, nsubiya Yesu, ba ni ma rubuta ku takada mu nkye e ma sabuwa doka na ba, sede mbode mu zi butu a pari. Ni gye ku nkye ku so nkiya ku. 6 Nsum na e ma so: mu biya doka Mirikisi. Yiri de ku zi butu a pari, doka yi nama yi tepiya a siki so.

7 Nsu shirigye ntani nyowa worede su ki yeda nkye Yesu Kiristi zo a siki nki, su butu zo a siki durinya. Yiri asu su ma nsu shishirigye ntani na nja oboki geba ni Kiristi. 8 Ku kone nkyawu kede ku lesa mbode ku yi ANKI a kiya e yi, sede de ku keleba nani wuta aku kyakya. 9 Du nsude sakisi a siki kokoyi ni Kiristi ba e ma ni Mirikisi ba; nsu de e sigeba a siki kokoyi Kiristi e mani Adaa nja Yaa. 10 Nde nseda zo anya ke nja kokoyi mu ba, kede ki leyi bise a siki gizi ke ko ki yi nnaba. 11 Du nsude yi nnaba e ma lobo a siki mungu mbode yaa yi.

12 Ni mani mbo nyowa de Na gye ku nshi, sede Na so de ni rubuta ku nshi a takada ni mbo rubutu ba, Ni ma sa dishiya de ni zo anya ku de ni yi beta nja ku pisika nja pisika, de perisiki amu e sika.

13 Yaya ni yayiwa ke ni mase nsubiya Yesu de Mirikisi zabi sua geshe ke.