1 ኢንቴ ጋርሳን ዬላቺዛ ላይማይ ዲዛይሲ ዎሬቴስ፤ ሄሳ ማላ ቱናቴ ኣማኖንታ ዴሬታ ኣቻንካ ዴና፤ ባ ኣዋ ማቾ ኤኪዳ ኣሲ ኢንቴኮን ዴስ።✝ 2 ሂስቲን ሄሳ ማላ ዬላቺዛ ሚሺ ኢንቴ ጊዶን ዲሺን ኣዛስ ኦቶሬቴቲ? ሄሳፌ ሄ ዮኦዛን ኢንቴ ሙዞታናስ ኢንቴስ ቤሴኔ? ሄሳ ማላ ኦዳዴ ኢንቴ ጋርሳፌ ዲጊቴ።

3 ታ ኢንቴናራ ኣሾን ኢሲፌ ዶንታ ኣጊኮካ ኣያናን ቃሴ ኢንቴናራ ዳይስ፤ ታ ሃኢ ኢንቴናራ ዲዛ ማላ ሄሳ ኦዳዴ ቦላ ፒርዳዲስ። 4,5 ኢንቴ ሺቂዛሶን ታ ኢንቴናራ ዲዛ ጊሻስ ጎዳ ዬሱሳ ሱንኒኔ ኢንቴ ጊዶን ዲዛ ኑ ጎዳ ዬሱሳ ዎልቃን ሄ ሞራንቻዛ ኣሾይ ዪን ኢዛ ሼምፖይ ጎዳ ጋላሳን ኣታና ማላ ሄሳ ማላ ኣሲ ጻላኤስ ኣ ኢሜቶ።

6 ኢንቴ ጬቄቲዛይሲ ሎኦስ ጊዴና፤ ጉ ኢርሾይ ዳሮ ቡኬሶ ዴንዛ ኤሬኬቲ?✝ 7 ኢንቴ ሃኢ ኢርሾይ ባይንዳ ኦራ ቡኬሶ ጊዳና ማላ ካሴ ጫላ ኢርሾዛ ኢንቴ ጊዶፌ ዲጊቴ፤ ኑ ፓዚጋ ዶርስ ጊዲዳ ኪርስቶሲ ኑስ ያርሼቲዴስ።*✝ 8 ሄሳ ጊሻስ ኣኔ ኑኒ ፓዚጋ ባኣሌዛ ቆሆይኔ ኢታቴ ኢዛን ኩሚዳ ካሴ ጫላ ኢርሾ ቦላ ጊዶንታ ኢርሾይ ባይንዳ ኡኬን ሱሬቴኒኔ ቱማን ቦንቾስ።✝

9 ኢንቴስ ላይማቲዛ ኣሳታራ ኢሲፌቴ ዶንታ ማላ ታ ኢንቴስ ካሴ ዳብዳቤ ጻፋዲስኮሺን። 10,11 ኢንቴ ኣማኖስ ጊሼ ላይማቲዛ ኣሳራ ጊዶንታ ዎይኮ ጮ ጋጲጋጲዛይታራ፥ ካይሶቲዛይታራ፥ ኤቃስ ጎይኒዛይታራ ጋጎፍቴ ጉስ ጊዶንታ ዲሺን ሃኢ ታ ጻፊዳይ ኣማናይስ ጊሼ ላይማቲዛይታራ ዎይኮ ማቲዛይታራ፥ ጋጲጋጲዛይታራ፥ ኤቃስ ጎይኒዛይታራ፥ ኣሳ ሱን ሞሪዛይታራ ዎይኮ ጫዪዛይታራ፥ ኣሳ ሚሽ ቦንቂዛዴንታራ ኢንቴስ ኢሲፌቴ ዶፖ፤ ሄይታንታ ማላራ ሃራይ ኣቶሺን ካካ ኢሲፌ ሞፒቴ።

12 ሃንኮ ኣማኖንታ ኣሳ ቦላ ፒርዳናስ ታና ኣዚ ጋዜ? ዎሳ ኬን ዲዛይታ ቦላ ኢንቴ ፒርዴኬቲ? 13 ዎሳ ኬፌ ካሬራ ዲዛይታ ቦላ ጊዲኮ ጾሲ ፒርዳና፥ «ኢንቴ ኢንቴ ጊዶፌ ኢታ ኣስ ዲጊቴ» ጌቴቲ ጌሻ ማጻፋን ጻፌቲዴስ።