1ሳሜላ ማጻፋ 8

ኢስራኤሌ ኣሳይ ካዎ ካዎናስ ሺሺዳ ኦይሻ

1 ሳሜሊ ጪሚዳ ዎዴ ባ ናይታ ናምኣታ ኢስራኤሌ ቦላ ፒርዳና ማላ ሹሚዴስ። 2 ኢዛስ ባይራ ናዚ ኢዩኤሌ ጌቴቴስ፤ ካሎዚ ኣቢያ ጌቴቴስ፤ ኢስቲ ቤርሳቤሄን ፒርዴቴስ። 3 ጊዶ ኣቲን ናይቲ ባንታ ኣዋ ኦጌ ካሊቤቴና፤ ቤሶንታ ጎኣ ዴማናስ ጊሼ ኦጌፔ ኬዚዳ፤ ማጋንጾ ኤኪዲ ፒርዳ ጌላሲዳ።

4 ሄሳ ጊሻስ ኢስራኤሌ ጪማቲ ዉሪ ኢሲ ቦላ ሺቂዲ ሳሜሊ ዲዛሶ ኤራማ ዪዳ። 5 ኢስቲካ ሳሜላስ፥ «ኔኒ ጪማዳሳ፤ ኔ ናይቲ ኔ ሎሴ ካሌቴና፤ ሄሳ ጊሻስ ሃራ ካዎቴቲ ኦዛ ማላ ኑና ካሌዛ ካዎ ኑስ ካዎ» ጊዳ።✝8፡5 ዛሬ 17፡14

6 ጊዶ ኣቲን፥ «ኑና ካሌዛ ካዎ ኑስ ካዎ» ጊዳይሲ ሳሜላ ሚሺሲዳ ጊሻስ ሳሜሊ ጎዳ ዎሲዴስ። 7 ጎዳይካ ሳሜላስ ዛሪዲ፥ «ታ ኢስታስ ካዎ ጊዶንታ ማላ ኢስቲ ካዳይ ታና ኣቲን ኔና ጊዶንታ ጊሻስ ዴሬዚ ጊዛይሳ ኡባ ሲያ። 8 ታ ኢስታ ጊብጼ ቢታፌ ኬሶሶፌ ሃኖ ጋካናስ ታና ኣጊዲ ሃራ ኤቃ ጾሳታስ ጎይኒሼ ኦዳ ማላ ኔ ቦላካ ኦቴስ። 9 ኔኒ ጊዲኮ ኢስቲ ኔና ጊዛይሳ ሲያ፤ ኢስታ ቦላ ካዎቲዳይሲ ኢስታ ቦላ ኣይ ኦናኮ ኢስታ ኤሪሳ ቤሲዛ ማላ ኢስታስ ሚን ዮታ» ጊዴስ።

10 ሳሜሊካ ካዎ ካዎናስ ኦይቺዳ ዴራስ ጎዳ ቃላ ኡባ ዮቲዴስ። 11 ኢስታስ፥ «ኢንቴ ቦላ ካዎታና ካዎዚ ኢንቴ ቦላ ኦናይሲ ኢንቴ ኣቱማ ናይታ ኡባ ኤኪዲ ፓራ-ጋሬ ላጊዛይታኔ ቶጋንቻታ ኬሳና፤ ኢስቲ ፓራ-ጋሬታ ሲንን ዎጻና። 12 ኢስታ ጊዶፌ ኢሶታ ኢሶታ ሻላቃታ፥ ማቶ ሃላቃታ፥ ሃምሳ ሃላቃታ ሂስታና፤ ባጋታ ኢዛ ጋዴ ጎያና ማላኔ ኢዛ ካ ሺሻና ማላ፥ ኦላ ማሳራታኔ ፓራ-ጋሬስ ጊዲዛ ሚሻታ ኦዛይታ ሂስታና። 13 ኢንቴ ማጫ ናይታ ኤኪዲ ሺቶ ኬሲሳና፤ ዎጼ ካሳናኔ ሶሎ ኡኪሳና። 14 ኢንቴ ጋዴፔ፥ ዎይኔ ጋዴፔኔ ዎጋራ ቶኪዛ ጋዴፔ ሎኦሶ ሎኦሶ ኤኪዲ ባ ሹሜታስ ኢማና። 15 ኢዚ ኢንቴ ካፌኔ ኢንቴ ዎይኔ ሚፌ ታማፌ ኢሳ ባ ካዎቴን ዲዛ ባ ኦሳንቻታሲኔ ባ ሹሜታስ ኢማና። 16 ኣቱማኔ ማጫ ኢንቴ ኣይሌታ፥ ኢንቴ ሜሄፔ ዶሬቲዳ ሎኦታ ሎኦታ ባስ ሂስታና። 17 ዶርሳ ዉዴፔኔ ዴይሻ ዉዴፔ ታማፌ ኢሲ ኩሼዛ ባስ ኤካና፤ ኢንቴ ኢንቴ ሁኤራ ኢዛ ኣይሌታ ጊዳና። 18 ሄሲ ኢንቴ ቦላ ጋኪዳ ዎዴ ኢንቴ ዶሲዲ ዶሪዳ ካዎዛፔ ዴንዲዳይሳን ዋሳና። ጊዶ ኣቲን ጎዳይ ሄ ጋላስ ኢንቴ ዋሶ ሲዬና» ጊዴስ።

19 ዴሬይ ጊዲኮ ሳሜሊ ሃሳይዛ ቃላዛ ዉዳን ዬጎንታ ኢጺዲ፥ «ጊዴና፤ ኑስ ካዎይ ካዎታና ማላ ኮዮስ። 20 ሃራ ዴሬታ ማላ ኑኒካ ኑና ካሌዛዴ፥ ኑ ሲንራ ቢዛዴኔ ኑስ ኦሌቲዛ ካዎይ ዲዛ ካዎቴ ጊዳና» ጊዳ።

21 ሳሜሊካ ዴሬዚ ጊዛይሳ ኡባ ሲዪዴስ፤ ሄሳ ዛሪዲ ጎዳስ ዮቲዴስ። 22 ጎዳይካ፥ «ኢስቲ ጊዛይሳ ሲያ፤ ካዎካ ኢስታስ ካዎ» ጊዴስ፤ ሄሳፌ ጉዬ ሳሜሊ ኢስራኤሌ ኣሳ፥ «ኢሶይ ኢሶይ ኢንቴ ዪዳ ካታማ ካታማ ሲሚ ቢቴ» ጊዴስ።