2ካዎታ ማጻፋ 19

ካዎ ሂዝቂያሲ ናቤ ኢሳያሳ ኦይቺዳ ዞሬ

1 ካዎ ሂዝቂያሲ ሄሳ ሲዪዲ ባ ማይኦ ዳኪዴስ፤ ማቃ ማይኢዲ ጾሳ ኬ ጌሊዴስ። 2 ሄሳፌካ ካዎቴ ኬን ኣዛዚዛ ኤልያቄሜይ፥ ጻፌ ሼቢናይኔ ዋና ቄሴቲ ማቃ ማይኢዲ ኣሞጼ ና ናቤ ኢሳያሳኮ ባና ማላ ኡባ ኪቲ ዬዲዴስ። 3 ኢስቲካ ኢዛስ፥ «ሂዝቂያሲ፥ ‹ሃና ጋላሳያ ሜቶ፥ ሚሬኔ ካዉሻቴ ጋላስ፤ ሃና ጋላሳያ ናይ ዬሌታናስ ኣያ ኬሃ ሚጻታሼ ዬላ ዬጋናስ ዎልቃ ይዳ ጋላሳ። 4 ዴኦ ጾሳ ካዉሻናስ ባ ጎዳ ኣሶሬ ካዎይ ዬዲዳ ጋዳዋ ቃላ ኡባካ ጎዳ ኔ ጾሳይ ሲዪዳ ጊዳና፤ ኢዚ ሲዪዳ ቃላ ጊሻስ ጎዳ ኔ ጾሳይ ኢዛ ሃንቃና ማላ ኔኒ ሼምፖራ ፓጻ ዲዛ ኣሳስ ጾሳ ዎሳርኪ!› ጊዴስ» ጊዳ።

5 ካዎ ሂዝቂያሳ ሹሜቲ ኢሳያሳኮ ዪዳ ዎዴ፥ 6 ኢሳያሲ ኢስታስ፥ «ኢንቴ ኢንቴ ጎዳስ፥ ‹ጎዳይ ኔስ ኣሶሬ ካዎ ኦሳንቻቲ ታ ቦላ ጫሻ ቃላ ሃሳይዳይሳ ሲያዳ ባቦፋ፤ 7 ታኒ ኢዛ ቦላ ሄሳ ማላ ኣያና ዬዳና፤ ኢዚካ ዎሬ ሲዪዲ ጉዬ ባ ዴሬ ሲሚ ባና፤ ኢዚ ሄን ማሻን ሃይቃና ማላ ታ ኢዛ ኦና› ጊ ዮቲቴ» ጊዴስ።

8 ኦላንቻታ ጋዳዋዚካ ኣሶሬ ካዎይ ላኪሼፔ ዴንዲ ቢዳይሳ ሲዪዲ ጉዬ ሲሚዴስ፤ ካዎዚ ሊቢናራ ኦሌቲሺን ዴሚዴስ።

9 ሄ ዎዴ ቶጵያ ዴሬ ዬሌታ ጊዲዳ ጊብጼ ካዎ ቲራቄይ ኢዛ ኦላናስ ዩሳ ቦላ ዲዛይሳ ሴናኪሬሜይ ሲዪዴስ፤ ሄሳ ጊሻስ ዛሬዲ ሂዝቂያሳኮ ቃስታኔታ ቦላ ዳብዳቤ፥ 10 «ኢንቴ ቢዲ ዩሁዳ ካዎ ሂዝቂያሳስ፥ ‹ኔ ኢዛን ኣማኔቲዛ ጾሳይ ዬሩሳላሜይ ኣሶሬ ኩሼን ኩንዱኩ› ጊዲ ኔና ባሌፎ። 11 ሃይሳፌ ካሴ ኣይዴካ ኣሶሬ ካዎቲ ዴሬ ኡባ ቦላ ኣይ ኦዳኮ ኔ ሲያዳሳ፤ ኢዚ ኢስታ ሙሌራ ይሲዴስ፤ ሂስቲን ኔኒ ኬሳ ኤካዳ ኣታናዝ ኔስ ሚሳቲዜ? 12 ካሴ ታ ኣዋቲ ይሲዳ ካዎቴታ ጎዛኔን፥ ካራኔን፥ ኤራፋሴን ሄሳካ ታላሳሬን ዲዛ ኤዴኔ ኣሳታ ኢስታ ኤቃ ጾሳቲ ኢስታ ኣሺዶ? 13 ሃማቴ ካዎቲኔ ኣርፋዴ ካዎቲ ሃኢ ኣዋን ዲዞ? ሴፋርዋይሜ ካታማ ካዎዚ ኣዋን ዲዜ? ቃሴካ ሄና ካዎይኔ ኢዋ ካዎቲ ሃኢ ኣዋን ዲዞ?» ጊ ኪቲዴስ።

ሂዝቂያሳ ዎሳ

14 ሂዝቂያሲ ዳብዳቤዛ ቃስታኔታ ኩሼፔ ኤኪ ናባቢዴስ፤ ሄሳፌ ጉዬ ፑዴ ጎዳ ኬ ኬዚዲ ዳብዳቤዛ ጎዳ ሲንን ሚጪዴስ። 15 ሄሳፌ ጉዬ ሂዝቂያሲ ጎዳኮ፥ «ኪሩቤ ቦላ ኔ ኣራታን ኡቲዳ ጎዳ ኢስራኤሌ ጾሶ! ቢታ ቦላ ዲዛ ኡባ ቦላ ጾሲ ኔና፤ ሳሎኔ ሳኣ ሜዳይ ኔና።✝19፡15 ኬሳ 25፡22 16 ጎዳዉ! ሃኢ ኔኒ ኔ ሃይ ዬጋዳ ሃይሳ ሲያ፤ ኔኒ ኔ ኣይፌታካ ዶያዳ ጼላ፤ ሴናኪሬሜይ ዴኦ ጾሳ ጫያናስ ኪቲዳ ቃላ ኤዝጋ።

17 «ኣቤት ጎዳዉ፤ ኣሶሬ ካዎቲ ሃይታ ካዎቴታኔ ኢስቲ ቢታ ቱሙካ ይሲዳ፤ 18 ኢስታ ኤቃ ጾሳታካ ታማን ዬጊ ጹጊ ይሲዳ፤ ኢስቲካ ኣሳ ኩሼን ሚፌኔ ሹቻፌ ኦሴቲዳይታ ኣቲን ጾስ ጊዴቴና። 19 ሃኢካ ጎዳዉ ኑ ጾሳዉ! ኔኒ ጻላ ጾሳ ጊዲዳይሳ ሃ ቢታ ቦላ ዲዛ ካዎቴቲ ኤራና ማላ ኢዛ ኩሼፔ ኑና ኣሻ» ጊ ዎሲዴስ።

ኢሳያሲ ሴናኪሬሜ ጊሻስ ዮቲዳ ቲንቢቴ

20 ሄሳፌ ጉዬ ኣሞጼ ና ኢሳያሲ ካዎ ሂዝቂያሳስ ሃይሳፌ ካሊ ዲዛ ኪታ ዬዲዴስ። «ጎዳ ኢስራኤሌ ጾሳይ፥ ‹ኣሶሬ ካዎ ሴናኪሬሜ ቦላ ኔ ዎሲዳ ዎሳ ታኒ ሲያዲስ› ጊዴስ። 21 ሄሳ ጊሻስ ጎዳይ ኢዛ ቦላ ዮቲዳ ቃላይ ሃይሳ።

«ጌላኦ ጺዮኔ ናያ

ኔና ካዱሲኔ

ካዉሻዱስ፤

ዬሩሳላሜ ናያ ኔ ኢዚ ቦላራ

ፒራ ቢሺን

ባ ቆ ኔ ቦላ ቃዉስ።

22 ሂስቲን ኔ ጫዪዳይኔ

ካዉሺዳይ ኦኔ?

ኔኒ ኔ ቃላ ቁ ሂስቲዳይ

ኦና ቦላ?

ኔ ኦቶሬቴን ዴሬቃ ጼሊዛይ

ኦና ቦላ?

ኢስራኤሌ ጌሻዛ ቦላዬ!

23 ኔኒ ቃስታኒዳይታ ባጋራ

ጎዳ ቦላ ጫሽ ኮራዳሳ።

ኔኒ፥ ‹ታኒ ታስ ዲዛ ዳሮ

ፓራ-ጋሬታን

ፑዴ ቃ

ዙማታ ቦላ ኬዛዲስ፤

ሊባኖሴ ዙማስ ጼራ ጋካዲስ፤

ሄፔ ኣዱሳ ዚጋ ሚታኔ

ዶሬቲዳ ጺዳ

ሚታካ ቃንጻዳሳ፤

ታኒ ኢዛስ ዉርሴ ዛዋኔ

ፒ ጊዳ ዎራን ጋካዲስ።

24 « ‹ታኒ ሃራ ዴሬታንካ

ሃ ኦላ ቦካዲስ፤

ኢስታፌ ሃ ኡያዲስ፤

ታኒ ታ ቶሆ

ጫማታን ዬዳ

ጊብጼ ቢታ ፑልቶታ

ሜሊሳዲስ› ጋዳሳ።

25 «ዳሮ ዎዴፔ ሲንን

ኔኒ ጊምቤቲዳ

ካታማታ ቆቆፋዳ፥

ሹቻ ኬላ ኬሳና ማላ፥

ታኒ ቆፋ ቃቻ

ዎዳይሳ ሲያቤኪ?

ቤኒ ሃልቻ

ዎዳይሳ ሃኢ ፖላይስ።

26 ሄን ዲዛ ኣሳ ዎልቃይካ

ጪንጊ ዉሪዴስ፤

ኢስቲ ዳጋሚዲ ዬላ ማይኢዳ፤

ጮ ሜላ ዴምባን ሞኪዳ

ኣታኪልቴ ማላ፥

ቡሮ ጻጶ ዬዶንታ

ጫሬቻ ማላ፥

ኬ ቦላ ሞኪዲ

ቡሮ ዲጮንታ ሹሊዳ

ማታ ማላ ጊዲዳ።

27 «ኔ ኣዋን ኡቲዛኮ፥

ኔ ኣይዴ ያዳ ኣይዴ ቢዛኮ

ኔ ታ ቦላ ሃንቄቲዳይሳ

ታ ኤራይስ።

28 ኔ ታ ቦላ ሃንቄቲዳ ጊሻሲኔ

ኔ ካይ ታ ሃይን

ዎዳ ጊሻስ

ታኒ ኔ ሲን ዳፎ ዬጋና፤

ታኒ ኔና ቢጻላ ባርሳና፤

ኔ ዪዳ ኦጌራ ኔና ጉዬ ዛራና።

29 «ሂዝቂያሳ! ሄሳስ ማላታይ ሃይሳፌ ካሊዛይሳ፤

« ‹ሃ ላይ ዎ

ማዳይሳ፤

ዪዛ ላይ ኣዛባ ማንዴታ፤

ሄን ላይን

ዜሪዳይሳ ማጻንዴታ፤

ዎይኔ ቱራ ቶኪዲ

ኢዛ ኣይፌ ማንዴታ።

30 ሃኢካ ዳዊቴ ኬፌ

ጫሻ ኣቲዳይቲ

ባንታ ጻጶ ዱጌ ዬዳና፤

ቦላራካ ኣይፌ ኢማና።

31 ዬሩሳላሜን ሼምፖራ

ፓጻ ኣቲዳይቲ፥

ጺዮኔ ዙማን ሃይቆፔ

ኣቲዳይቲ ኢስቲ ኬዛና።

ጎዳ ኡባፌ ዎልቃማ

ጾሳ ዚልኤቴ

ሄሳ ኦና።›

32 «ጎዳይ ኣሶሬ ካዎ ጊሻስ፥

« ‹ኢዚ ሃኖ ሃ ካታማዮ

ሙሌካ ጌሌና፤

ኢሲ ቶራካ ጾንጌና፤

ጎንዳሌ ኦይኪዲ ኢዚኮ ሺቄና፤

ኢዞ ቢታ ዶሬን ጊዶና።

33 ኢዚ ባ ዪዳ ኦጌራ ሲሚ ባና፤

ሃ ካታማዮ ሙሌራ

ሲሚ ጌሌና።

34 ታ ጊሻሲኔ ታ ኣይሌ

ዳዊቴ ጊሻስ ጋዳ

ሃኖ ካታማዮ

ታኒ ጎንዳላ ኣሻና› ጌስ።»

35 ሄ ጋላሳ ኦማርስ ጎዳ ኪታንቻይ ኬዚዲ ኣሶሬ ኣሳይ ዱንካኒ ኡቲዳሶሆን 185,000 ኣስ ዎዴስ፤ ዎንቴ ጋላስ ኣሳይ ዴንዲሺን ሄራ ኡባን ኣሃይ ኩሚዴስ። 36 ኣሶሬ ካዎ ሴናኪሬሜይ ሄፔ ዴንዲ ቢዴስ፤ ጉዬ ናናዌ ሲሚ ቢዲ ሄን ኡቲዴስ።

37 ኢሲ ጋላስ ኒስራኬ ጌቴቲዛ ባ ኤቃ ጾሳ ኬ ጌሊዲ ኢዚ ሄን ጎይኒሺን ኢዛ ናይቲ ኣዲራሜሌኬይኔ ሳርሳሬይ ኢዛ ማሻን ሲፊ ዎዳ፤ ሄፔ ኬሲ ኤኪዲ ኣራራቴ ጋካናስ ባቃቲዳ፤ ኢዛ ና ኣሴራዶኔይ ኢዛሶሆን ካዎቲዴስ።