2ሳሜላ ማጻፋ 1

ዳዊቲ ሳኦሌ ሃይቆ ሲስ

1 ሳኦሊ ሃይቂዳፔ ጉዬ ዳዊቲ ኣማሌቄ ኣሳ ኦሊ ጾኒዲ ሲሚዴስ፤ ጺጊላጌንካ ናምኡ ጋላስ ጋምኢዴስ። 2 ሄን ጋላስ ዳኬቲዳ ማይኦ ማይኢዲ ባ ሁኤ ቦላ ጉዱላ ላሊዲ ኢሲ ናቴ ና ዳይሲ ሳኦሌ ጉታፔ ዪዴስ። ዳዊቴኮ ጋኪዳ ማላ ዛቁል ዚርጺ ጊዲ ቦንቾስ ኩሼ ዴንዴስ።

3 ዳዊቲካ ኢዛ፥ «ኔ ኣዋፔ ያዲ?» ጊዲ ኦይቺዴስ።

ኢዚ ቃሴ፥ «ታኒ ኢስራኤሌ ኣሳይ ዲዛሶፔ ኬሳ ኤካ ያዲስ» ጊዴስ።

4 ዳዊቲ ቃሴ ኢዛ፥ «ኣዜ ዋኒዳይ ኣኔ ታስ ኡባ ዮታ» ጊዲ ኦይቺዴስ።

ኢዚካ ዳዊቴስ፥ «ኣሳዚ ኦላሶፔ ባቃቲዴስ፤ ዳሮይ ኩንዲዴስ፤ ሳኦሊኔ ኢዛ ና ዮናታኔይ ሃይቂዳ» ጊዴስ።

5 ሄሳፌ ጉዬ ዳዊቲ ዎሬዛ ኢዛስ ዮቲዳ ናዛ፥ «ሳኦሊኔ ኢዛ ና ዮናታኔይ ሃይቂዳይሳ ኣዛን ኤራዲ?» ጊ ኦይቺዴስ።

6 ዎሬዛ ኢዛስ ዮቲዳ ናቴ ናዚ ኢዛስ ዛሪዲ፥ «ቶሮንታ ዳሼ ታኒ ፑዴ ጊልቦኣ ዙማ ቦላ ኬዛዲስ፤ ሳኦሊ ሄን ባ ቶራ ቦላ ዜምፒ ዲሺን ፓራ-ጋሬቲኔ ቶጋ ኣሳይ ጎዴሬሼ ኢዛ ቦላ ጋኪ ዎዳ። 7 ኢዚካ ጉዬ ሲሚ ጼሊዲ ታና ቤኢዲ ጼይጊዴስ፤ ታኒካ፥ ‹ታ ኔስ ኣይ ኦ?› ጋዲስ።

8 «ኢዚካ ታና፥ ‹ኔ ኦኔ?› ጊ ኦይቺዴስ። ታኒካ ኢዛስ፥ ‹ታኒ ኣማሌቄ ኣሳ› ጋዳ ዮታዲስ።

9 «ኢዚካ ታስ፥ ‹ታ ሃይቃናስ ቶቃይስ፤ ጊዶ ኣቲን ታስ ሼምፖይ ኬዞንታ ኢጺዴስ፤ ዛይ ሃ ያ፤ ታና ሼምፒሳ› ጊዴስ። 10 ሂስቲን ታኒ ኢዚ ኩንዲቺዳፔ ጉዬ ኣቶንታይሳ ኤራዳ ታ ኢዛኮ ሺቃዳ ኢዛ ዎዲስ። ኢዛ ሁኤ ቦላ ዲዛ ካላቻዛኔ ኢዛ ቄሴ ሳጋዮዛ ኤካዳ ሄኮ ታ ጎዳስ ኤሃዲስ» ጊዴስ።✝1፡6-10 1ሳሜ 31፡1-6፤ 1ታሪ 10፡1-6

11 ሄሳፌ ጉዬ ዳዊቲኔ ኢዛራ ዲዛ ኣሳይ ኡባይ ባንታ ማይኦ ዳኪዳ። 12 ኢስቲ ማሻን ሲፌቲዳ ጊሻስ ሳኦሌሲኔ ኢዛ ና ዮናታኔስ፥ ጎዳ ኦላንቻታሲኔ ኩሜ ኢስራኤሌ ኣሳስ ካዮቲዳ፥ ዬኪዳኔ ኦማርስ ጋካናስ ጾሚዳ።

13 ዳዊቲ ቃሴ ሄ ዎሬዛ ኢዛስ ኤሂዳ ናቴዛ፥ «ኔ ኣዋፔ ያዲ?» ጊ ኦይቺዴስ። ናዚካ፥ «ታኒ ኔ ዴሬን ቤቲ ዲዛ ኣማሌቄ ኣሳ ና» ጊዴስ።

14 ዳዊቲ ቃሴ፥ «ሂስቲን ኔኒ ጎዳይ ቲይዳይሳ ይሳናስ ኔ ኩሼ ዋና ጻላ ዴንዲ?» ጊ ኦይቺዴስ።

15 ሄሳፌ ጉዬ ዳዊቲ ናቴታፔ ኢሳ ጼይጊዲ፥ «ኔኒ ኢዛኮ ሺቃዳ ኢዛ ዎ» ጊዴስ። ሄ ናቴዚ ኣማሌቄዛ ጫዲ ዎዴስ። 16 ዳዊቲካ ኣማሌቄዛ፥ « ‹ጎዳይ ቲይዳይሳ ታኒ ዎዲስ› ጋዳ ኔ ቦላ ኔርካ ኔ ማርካቲዳ ጊሻስ ኔ ሱ ጎሜይ ኔ ቦላ ጊዶ!» ጊዴስ።

ሳኦሌ ጊሻሲኔ ዮናታኔ ጊሻስ ሺቂዳ ዚላሳ ጊንጾ

17 ዳዊቲ ሳኦሌ ጊሻሲኔ ዮናታኔ ሃይቆ ጊሻስ ዚላሊሼ ዬኪዴስ። 18 ቃሴካ፥ «ዎንዳፌ ሚላስ» ጌቴቲዛ ዚላሳ ዩሁዳ ዴራ ታማርሳና ማላ ኣዛዚዴስ። ሄሲ ያሻሬ ማጻፋን ጻፌቲ ኡቲዴስ።✝1፡18 ኢያ 10፡13

19 «ሃይሶ ኢስራኤሌ!

ኔ ቦንቾይ ዙምቡላታ ቦላ

ጫዴቲ ሃይቂዴስ፤

ኦላ ቃራቲ ዋኒ

ሃይሳ ኩንዲዶ!

20 «ፊሊስጼሜ ማጫ ናይቲ

ኡፋዬቶንታ ማላ፥

ቃጻሬቶንታ ኣሳ ማጫ ናይቲ

ኢሊሎንታ ማላ፥

ሃይሳ ጌቴን ዎሬሶፒቴ፤

ኣስቄሎናንካ ኣዋጆፍቴ።

21 «ኢንቴኖ ጊልቦኣ ዙማቶ!

ኢንቴ ቦላ ኢራይ ቡኮፎ፤

ጻዛይካ ኢንቴ ቦላ ዶፖ፤

ያርሾስ ጊዲዛ ካ

ኢንቴ ጎሻ ቢታን ሞኮፎ።

ሄን ኦላ ቃራዛ

ጎንዳሌይ ቱኒዴስ፤

ሳኦሌ ጎንዳሌይ

ሃይሳፌ ጉዬን

ዛይቴን ቁጬቴና።

22 ዮናታኔ ዎንዳፌይ

ዎንታ ሲሚ ኤሬና፤

ሳኦሌ ማሻይካ

ሞርኬ ቃንጼሬ ዬጌስ፤

ዎልቃማታካ

ሜንሬ ዬጌስ፤

ኢዛ ሞርኬታካ ዎዴስ።

23 «ሳኦሊኔ ዮናታኔይ

ሼምፖራ ፓጻ ዲሼ

ሲቄቲዛይታኔ ቆፋን ጋይቲዛይታ።

ሃይቂሼካ ሻኬቶንታይታ፤

ጎሌ ካፎፔ ፒላቲዛይታ፤

ጋሞፌካ ሚኒዛይታ።

24 «ኢንቴኖ ኢስራኤሌ ማጫሳቶ!

ኦቻ ቴራ ሚሳቲዛ ኣልኦ

ቃሚሳ ኢንቴና ማይዚዳ፤

ኢንቴ ማይኦዛ ዎርቃ

ጺባቤን ኣሌቂሲዳ፤

ሳኦሌስ ዬኪቴ።

25 «ኦላ ቃራቲ

ዋኒ ሃይሳ ማላ ኦላሶን ኩንዲዶ!

ዮናታኔይ ኔ ዙምቡላታ ቦላ

ጫዴቲ ሃይቂዴስ።

26 ታ ኢሻ ዮናታኔ!

ታኒ ኔ ጊሻስ ካዮታዲስ፤

ኔ ታስ ኬሃ ኣልኦኮሺን፤

ኔ ሲቆይ ታና

ማላሊሲዛዛኮሺን

ማጫ ሲቆፔካ ኬሂ

ኣስኮሺን።

27 «ኦላ ቃራቲ ዋኒ ኩንዲዶ!

ኦላ ማሳራቲካ ዋኒ

ሃዳ ጊዳኔ!»