1 ታኒ ቃሴካ ሳሎ ጉፋንን ዲዛ

ቆሆ ኡባ

ቤኣዲሲኔ ኣኬካዲስ፤

ቆሄቲዳይታ ኣፉን ቤኣዲስ፤

ኢስታ ሚንዛ

ኣሲካ ዴና፤

ዎልቃይ ኢስታ ቆሂዛ ኣሳታ

ኩሼን ዴስ፤

ኢስታ ሚንዛ

ኣሲካ ዴና።

2 ሄሳ ጊሻስ ታኒ፥

«ሃኢ ሼምፖራ

ፓጻ ዲዛይታፔ

ካሴ ሃይቂዳይቲ ኪያ» ጋዲስ።

3 ጊዶ ኣቲን ሃ ናምኣታፔካ ቦላራ

ሙሌካ ዬሌቶንታይታ

ቃዳይ ሎኦ፤

ጋሶይካ ኢስቲ ሳሎ ጉፋንን

ኦሴቲዛ ቆሆዛ

ሙሌካ ቤኢቤቴና።

4 ሄሳካ ኣሳይ

ባ ኣሞቲዳይሳ ዴማናስ

ኬሂ ዳቡርዲ ኦስ፤

ጊዶ ኣቲን ሄ ዳቡራይ

ባ ላጌ ቦላ

ቃናቴቴን ዴንዶን

ጊዲዳይሳ ታኒ ኣኬካዲስ።

ሄሲካ ሃዳ፤

ጫርኮ ኦይካናስ

ዬዴዛ ማላ።

5 ኣዛላይ ባ ኩሼ ኢዲሚ ኡቴስ፤

ባርካ ባና ዎስ።

6 ጮ ዳቡራኒኔ ጫርኮ ካሎን

ናምኡ ኩሼ ዴማናፔ

ዎፓን ቤቲዛ

ኢሲ ኩጳይ ኪዬስ።

7 ቃሴካ ታኒ ሳሎ ጉፋንን ዲዛ

ሚሺ ሃዳ ጊዲዳይሳ ቤኣዲስ።

8 ዬሎይ ዎይኮ ኢሻይ ባይንዳ

ቢዛ ኣሲ ዴስ፤

ኢዛ ዳፌቴስ ዛዋይ ዴና፤

ኢዛ ኣይፌይ ኢዛስ ዲዛ

ኣቆታ ካሊቤና፤

ኢዚካ፥ «ታኒ ሃይሳ

ኦሲ ዳቡራዚና?

ታኒ ታ ሁኤ ኡፋይሳናይሳ

ኣይስ ኡዜታዚና?» ጊዴስ።

ሄሲካ ሃዳኔ ቱጋ ዴኦ።

9 ኢስታ ኦሶይ ሎኦ ኣይፌ ኢማናስ

ዳንዳይዛ ጊሻስ

ኢሲኖ ጊዳናፔ

ናምኡ ጊዴ ሎኦ።

10 ቃሴ ናምኣፌ ኢሶይ ኩንዲኮ

ኢሶይ ዴንስ፤

ጊዶ ኣቲን ኩንዲኮ ዴንዛ

ላጌይ ባይንዳዴይ

ኣይ ማላ ቃዜ!

11 ናምኣይ ኢሲፌ ኢቺኮ ሆኤስ፤

ጊዶ ኣቲን ባርካ ኢቺዳዴ

ዋኒ ሆኣና ዳንዳይዜ?

12 ኣሲ ቢዛ ቆሃና ዳንዳዬስ፤

ናምኡ ጊዲኮ

ኢዛራ ኤቄታና ዳንዳዬቴስ፤

ሄን ዶቄቲዳ ዎዶሮይ

ኤሌ ዱጼና።

13 ዞሬ ኤኮንታ ኤያኔ ጪማ ካዎ ጊዳናፔ ኣ ኤራቴ ዲዛ ናቴ ማንቆይ ሎኦ። 14 ኣይስ ጊኮ ኢዚ ሄ ሂዬሳ ጊዲዳ ሶሆፔ ዴንዲዲ ዎይኮ ቃሾ ኬፌ ኬዚዲ ባ ቢታን ካዎታናስ ዳንዳዬስ። 15 ታኒ ሳሎ ጉፋንን ዲዛይቲኔ ሲሜሬቲዛይቲ ኡባይ ካዎ ኣራታ ላቲዛ ዬላጋ ካሊዛይሳ ቤኣዲስ። 16 ኢዛ ሲንን ቆዳይ ባይንዳ ዴሬይ ዴስ፤ ካዎቴፌ ኢዚ ኪቺዛ ዎዴ ኢዚ ኦዳይሳስ ኦኒካ ኢዛ ጋላቴና። ሄሲካ ሃዳ፤ ጫርኮ ኦይካናስ ዬዴዛ ማላ።