ኡባስ ዲዛ ዉርሴ ቃዳ
1 ሄሳ ጊሻስ ሃ ኡባ ዮኦታ ታ ዎዚናን ቆፓዳ ኣ ኤራንቻቲኔ ጺሎቲ ኦዛ ኦሶይ ጾሳ ኩሼና፤ ጊዶ ኣቲን ኣሲ ሲንፌ ባና ናጊዛይሲ ሲቆ ጊዲን ዎይኮ ኢጾ ጊዲን ኤሬና። 2 ጺሎታ ዎይኮ ናጋራንቻታ ጊዲን፥ ሱሬታ ዎይኮ ኢታታ ጊዲን፥ ጌሻታ ዎይኮ ቱናታ ጊዲን፥ ያርሾ ሺሺዛይታ ዎይኮ ያርሾ ሺሾንታይታ ጊዲን ኡባታሲካ ዉርሴ ቃዳይ ኢሲኖ።
ሎኦ ኣሳስ ሃኒዛይሳ ማላ
ናጋራንቻስካ ሃኔስ፤
ጫቂዛይሳስ
ሃኒዛይሳ ማላካ
ጫቆስ ባቢዛይታስ ሃኔስ።
3 ሳሎ ጉፋንን ኡባ ቦላ ጋኪዛ ኢታቴ ሃይሳ፤ ኡባስ ዉርሴ ቃዳይ ኢሲኖ፤ ሄሳፌ ቦላራካ ኣሳ ዎዚናይ ኢታቴን ኩሚዴሲኔ ጎዪዴስ፤ ዉርሴንካ ሃይቂዳ ኣሳን ጋይቴስ። 4 ሃይቂዳ ጋሞፌ ፓጻ ዲዛ ካናይ ኪያ፤ ሄሳካ ሼምፖራ ፓጻ ዲዛይታ ጊዶን ዲዛ ኣሳስ ሂዶታይ ዴስ።
5 ሼምፖራ ፓጻ ዲዛ ኣሲ
ባ ሃይቃናይሳ ኤሬስ፤
ጊዶ ኣቲን ሃይቂዳይቲ
ኣይኮካ ኤሬቴና፤
ኢስታ ቆፍሲዛ ሚሺ
ኡባይ ዶጌቴስ፤
ኢስቲ ጎኤታና ሚሺካ ዴና።
6 ኢስታ ሲቆይ፥ ኢጾይኔ
ቃናቴይ ኡባይ
ኢስታራ ኢሲፌ ይዴስ።
ሄሳ ጊሻስ ሳሎ ጉፋንን
ሃኒዛ ሚሽ ኡባን
ኣይኮ ቃዳይካ ኢስታስ ዴና።
7 ባዳ ኔ ካ ኡፋይሳን ማ፤ ኔ ዎይኔ ኡሻካ ኔ ዎዚናይ ኡፋዬቲሺን ኡያ፤ ኣይስ ጊኮ ጾሲ ኔ ኦዳ ኦሶን ኡፋዬቴስ። 8 ኡባ ዎዴ ኔ ማይኦይ ቦ ጊዶ፤ ኔ ሁኤይካ ዛይቴን ቲዬቶ። 9 ሳሎ ጉፋንን ጾሲ ኔስ ኢሚዳ ጉ ጊዲዳ ኔ ዴኦ ላይታ ኡባን ኔ ሲቂዛ ኔ ማቼይራ ኡፋይሳን ዴኣ፤ ኣይስ ጊኮ ሳሎ ጉፋንን ኔ ዴኦኒኔ ኔ ዳቡርዳ ዳቡራ ኡባን ሃይሲ ኔስ ቃዳ። 10 ኔ ኩሼይ ኦናስ ዴሚዳይሳ ኡባ ኔ ኩሜ ዎልቃን ኦ፤ ኣይስ ጊኮ ኔኒ ባና ዱፎን ኦሶይ፥ ሃልቾይ፥ ኤራቴኔ ኣ ኤራቴ ዴና።
11 ታኒ ሳሎ ጉፋንን
ሃራ ሚሽ ቤኣዲስ፤
ዎን ጾኖይ ፒላታታስ
ኦላን ጾኖይ ዎልቃማታስ ጊዴና፤
ካ ኣ ኤራንቻታስ፥
ዱሬቴ ኪጳታንቻታስ፥
ሳባይ ኤራንቻታስ ጊዴና፤
ጊዶ ኣቲን ኡባቲካ ዎዴይኔ
ቃዳይ ጋዳ ማላ ሃኔቴስ።
12 ቃሴካ ባ ዎዴ ኤሪዛ ኣሲ ዴና፤
ካፎይ ያርዴን ጌሊዛ ማላ፥
ሞሌይ ጊቴን ኦይኬቲዛ ማላ፥
ኣሲካ ቆፖንታ ዲሺን ዪዛ
ኢታ ዎዴታን ኦይኬቴስ።
ኣ ኤራቴኔ ኤያቴ
13 ሄሳካ ታና ኬሂ ማላሊሲዳ ሃይሳ ኣ ሌሚሶ ሳሎ ጉፋንን ቤኣዲስ። 14 ሄሲካ ኢሲ ቢታን ኣማርዳ ኣሳቲ ዴኢዛ ቄሪ ካታማይ ዳዉስ፤ ሄ ካታማዮ ኦላናስ ኢሲ ዎልቃማ ካዎይ ዎራጂ ዶዲዴስ፤ ኢዚ ዩሾን ሚጻ ጊግሲዴስ። 15 ሄ ካታማይን ኣ ኤራንቻ ጊዲዳ ኢሲ ማንቆ ኣሲ ዴስ፤ ኢዚ ባ ኣ ኤራቴን ሄ ካታማዮ ኣሺዴስ። ጊዶ ኣቲን ሄ ማንቆዛስ ኦኒካ ቆፒቤና። 16 ሄሳ ጊሻስ ታኒ፥ «ኣ ኤራቴ ዎልቃፌ ኣስ» ጋዲስ። ጊዲኮካ ሄ ማንቆዛስ ዲዛ ኣ ኤራቴዚ ካቲዴስ፤ ኢዛ ቃላይካ ሲዬቲቤና።
17 ኤያታ ኣይሲዛ ዳና ዋሶፔ
ኣ ኤራንቻይ
ሊቆን ሃሳይዛ
ቃላይ ሴቴቴስ።
18 ኣ ኤራቴ
ኦላ ሚሻፌ ኣስ፤
ጊዶ ኣቲን ኢሲ ናጋራንቻይ
ዳሮ ሎኦ ሚሽ ይሴስ።