1 ሎኦ ሺቶፌ

ሎኦ ሱን ኣስ፤

ዬሌታ ጋላሳፌ

ሃይቆ ጋላሲ ሎኦ።✝

2 ጊቢራ ኬ ቡሳፌ

ዬሆ ኬ ቡሲ ሎኦ፤

ጋሶይካ ሃይቆይ

ኣስ ኡባስ ዉርሴ፤

ሼምፖራ ፓጻ ዲዛ

ኣሲ ኡባይ

ሄሳ ባ ዎዚናን

ዎናስ ቤሴስ።

3 ሚቻፌ ካዮይ ኪያ፤

ጋሶይካ ካዮይ

ሲን ካሬኮካ

ዎዚና ፖኢሴስ።

4 ኣ ኤራንቻ ዎዚናይ

ካዮ ኬን ዴስ፤

ኤያታ ዎዚናይ ጊዲኮ

ኡፋይሳ ኬን ዴስ።

5 ኤያቲ ሳቢሼ ዬጺዛ

ዬ ሲያናፔ

ኣ ኤራንቻይ ሴሪዛ

ሴራ ኤዝጎይ ሎኦ።

6 ኤያታ ሚቺ

ኦቶ ጋርሳን ኤጺሼ

ቄቲዛ ኣጉን ማላ፤

ሄሲካ ሃዳ።

7 ጌኔ ኦሶይ ኣ ኤራንቻ

ኤያ ኬሴስ፤

ማጋንጾይ ኣሳስ ዎዚና ሞሬስ።

8 ኢሲ ሚሻስ ዶሜፌ

ዉርሴ ኪያ፤

ቃሴ ኦቶራንቻፌ

ዳንዳያንቻይ ኪያ።

9 ኤያታ ሃንቆይ

ኢስታ ኪኦ ጋርሳን ዲዛ ጊሻስ

ኔኒ ሃንቆስ ኤሶቶፓ።✝

10 ኔኒ፥ «ሃ ዎዴይ

ካሴ ኣዳ ዎዴታፔ

ኣይስ ሎኢዴ?» ጋ ኦይቾፋ፤

ሄይታንታ ማላ ኦይሻታ ኦይሾይ

ኣ ኤራቴ ጊዴና።

11 ኣ ኤራቴ

ሎኦ ጺንጾ ማላ፤

ኢዛ ጎኣይ

ፖኦ ቤኢዛ ኣስ ኡባሳ።

12 ሚሺ ኣስ ኢታፔ

ካሚ ኣሺዛ ማላ

ኣ ኤራቴ ኣሼስ።

ሄሳፌ ቦላራካ

ኣ ኤራቴ

ኬ ኣዋ ሼምፖ ናጌስ።

13 ኣኔ ጾሳይ ኦዳይሳ

ዎዚናን ዎ!

ኢዚ ቦካሲዳይሳ

ኦኒ ሉሊሳና ዳንዳይዜ?

14 ኔስ ዎዴይ ሎኢሺን ኡፋዬታ፤

ጊዶ ኣቲን ዎዴይ ኢቲሺን

ሃይሳ ዎዚናን ዎ፤

ጾሲ ኢሳ ኦዳ ማላ

ሃራካ ኦዴስ፤

ሄሳ ጊሻስ ኣሲ

ሲንፌ ሃናና ሚሽ

ኣይኮካ ፒልጊዲ

ኤራና ዳንዳዬና።

15 ናጋራንቻይ ባ ናጋራራ

ኣዱሳ ላይ ዴኢሺን፥

ጺሎይ ባ ጺሎቴራ

ኤሶን ሃይቂሺን

ሃዳ ጊዲዳ ታ ዴኦ ላይታን

ሃይታ ቤኣዲስ።

16 ሄሳ ጊሻስ ኔ ዮንታ ማላ

ኬሃ ጺሎ፥

ዎይኮ ኬሃ

ኣ ኤራንቻ ጊዶፓ።

17 ቃሴ ኬሃ ኢታ ኣስ፥

ዎይኮ ኡባ ኤያ ኣስ ጊዶፓ፤

ኔ ኣይስ ዎዴይ ባይንዳ ሃይቃይ?

18 ኢሳ ኦይኪዲ ሃንኮይሳካ

ዬዶንታ ኣጎይ ሎኦ፤

ጾሳስ ያዪዛ ኣሲ

ሺካላቴ ኢጼስ።

19 ኣ ኤራቴ ኣ ኤራንቻስ

ኢሚዛ ዎልቃይ

ኢሲ ካታማን ዴሬ ሃሪዛ

ታማታፔ ኣስ።

20 ናጋራ ኦንታ

ሙሌራ ሱሬ ኦሶኒኔ

ጺሎቴን ጻላ ካንዛ ኣሲ

ቢታ ቦላ ዴና።

21 ሃሳዬቲዛ ቃላ ኡባ ሃይ

ዬጋ ሲዮፓ፤

ኔ ሂስቶንታ ኣጊኮ

ኔ ኣሽካራይ ኔና ቃንጊሺን

ኔ ሲያንዳሳ።

22 ቃሴ ኔኒካ ኔ ሁኤን

ሃራታ ቃንጎይሳ

ኔ ዎዚናይ ኤሬስ።

23 ሃይሳ ኡባ ታኒ

ኣ ኤራቴን

ፒልጋ ጼላዳ፥

«ታኒካ ኣ ኤራንቻ

ጊዳናስ ቃቻዲስ» ጋዲስ።

ጊዶ ኣቲን ታኒ

ጊዳ ማላ ሃኒቤና።

24 ኣ ኤራቴ ኣይ ጊዲኮካ

ኬሂ ጪማኔ ሃኮ፤

ሂስቲን ኦኒ ጋኪ

ኤራና ዳንዳይዜ?

25 ሄሳ ጊሻስ ኣ ኤራቴኔ

ዮኦቲ ሃኒዛይሳ ፒልጋ ኤራናስ፥

ጻናኣናስ ናጋራ

ኢታቴኔ

ኤያቴ ጎሻቴ

ጊዲዳይሳ

ኣኬካናስ ታ ዎዚናን

ዩሻ ቆፓዲስ።

26 ኢዚስ ዎዚናይ ዎጺማዴ ማላ፥

ኢዚ ኩሼቲ ኣግሪሞቄ ማላኔ

ያርዴ ማላ ጊዲዳ

ሃይቆፔ ኢታ

ማጫስ ቤኣዲስ፤

ኢዚፔ ኬሲ ኤካናይ

ጾሳስ ያዪዛ ኣስ ጻላ፤

ናጋራንቻ ኣስ ጊዲኮ

ያርዴን ኦይካዉስ።

27 ኣ ኤራንቻዚ፥

«ታኒ ካላ ፒልጋ

ጼላዳ ዴሚዳ

ሃራ ሚሺ

ሃይሳፌ ካሊዛይሳ።

ዮኦቲ ሃኒዛይሳ

ሂላቴን ፒልጊዲ

ዴማናስ

ኢሳ ኢሳ ቦላ ጉጆ፤

28 ሄሲካ ታኒ ሃች ጋካናስ

ፒልጋሼ ይዳይሳ

ሺ ኣቱማሳፔ

ኢሲ ሱሬ ኣስ ዴማዲስ።

ጊዶ ኣቲን ሃይታንታ ጊዶፌ

ኢሲ ሱሬ ማጫስ ዴማቤኬ።

29 ታኒ ሃይሳ ኡባፌ

ኢሲ ሚሽ ታማራዲስ፤

ጾሲ ኣስ ሱሬ

ሂስቲ ሜዴስ፤

ጊዶ ኣቲን ኣሲ

ዳሮ ጊቴቲዳዝ ጊግሲዴስ» ጊዴስ።