ኢብራዌ ኣሳስ 8

6 ጊዶ ኣቲን ዬሱሲ ጊዶ ጌሊ ጋናቲዛይ ጫቆ ቃላይ ካሴይሳፌ ኣዛይሳ ማላ ኢዚ ኤኪዳ ኦሶይካ ካሴይታ ኦሶፔ ኣስ፤ ሄሲካ ካሴይሳፌ ሎኢዛ ሂዶታ ቃላና።

7 ካሴ ጫቆ ቃላን ፓጬይ ባይንዳኮ ናምኣን ሃራ ጫቃናስ ኮሼና። 8 ጊዶ ኣቲን ጾሲ ዴሬዛ ቦላ ፓጬይ ዲዛይሳ ዴሚዳ ጊሻስ፥ «ኢስራኤሌ ኣሳራኔ ዩሁዳ ኣሳራ ታኒ ኦራ ጫቆ ጫቄታና ዎዴይ ያና።✝8፡8-12 ኤር 31፡31-34 9 ሄሲካ ታ ኢስታ ጊብጼፔ ኬሳናስ ኢስታ ኩሼ ኦይካዳ ካሴ ኢስታ ኣዋታራ ጫቄቲዳ ቃላ ማላ ጊዴና፤ ጋሶይካ ኢስቲ ካሴ ታ ጫቆ ቃላን ኤቂቤቴና፤ ታኒካ ኢስታ ዬዳ ቤሳዲስ።

10 «ሄሳፌ ጉዬ

ኢስራኤሌ ኣሳራ

ታ ጫቄታና ቃላይ

ሃይሳ ማላ ጌስ ጎዳይ።

ታኒ ታ ዎጋ

ኢስታ ዎዚናን ዎና፤

ኢስታ ዎዚና ቦላካ ጻፋና።

ታ ኢስታ ጾስ ጊዳና፤

ኢስቲካ ታ ዴሬ ጊዳና።

11 ሃይሳፌ ጉዬ ኣሲ

ባ ጉታ ኣሳ ዎይኮ

ባ ኢሻ፥ ‹ኔ ጎዳ ኤራ›

ጊ ታማርሴና።

ጋሶይካ ኣሲ ጉፌ

ጊታታ ጋካናስ

ዉሪካ ታና ኤራና።

12 ኢስታ ቆሆዛ ታ ማራና።

ሃይሳፌ ሲንን ታ ኣሳ ናጋራ

ናምኣን ዛራ

ቆፒኬ» ጌስ።

13 ሃይሳ ሃ ጫቆዛ ኢዚ፥ «ኦራ ጫቆ» ጊዲ ካሴ ጫቆዛ ጋልኣ ኬሲዴስ፤ ሄሳ ጊሻስ ጋልኢዲ ዉሪዳይሲ ያና ዎዴይ ማቲዴስ።