1 ኣቤት ጎዳዉ!

ታኒ ታ ኩሜ ዎዚናፔ

ኔና ጋላታይስ፤

ጾሳታ ሲንን ኔና ሳባይስ።

2 ኔ ጌሻ ኬኮ ሲማዳ

ኔና ጎይናይስ፤

ኔ ሲቆ ጊሻሲኔ

ኔ ኣማኔቴ ጊሻስ

ታኒ ኔ ሱን ሳባይስ፤

ኔኒ ኔ ሱንኔ ኔ ቃላ

ኡባፌ ኣዳ

ቁ ሂስታዳሳ።

3 ታኒ ጼይጊዳ ጋላስ ታስ ኮያዳሳ፤

ኔ ሚኖቴን

ታና ሚን።

4 ኣቤት ጎዳዉ!

ሳኣን ዲዛ ካዎቲ ኡባይ

ኔ ዶናፔ ኬኢዳ ቃላ ሲዪዲ

ኔና ጋላቴቶ!

5 ጎዳ ቦንቾይ

ጊታ ጊዲዳ ጊሻስ

ኢስቲ ኢዚ ኦዳ

ኦሶ ጊሻስ ዬጼቶ።

6 ጎዳይ ቦላ ቃን ዲኮካ

ሂዬሳታ ሎኦ ኣይፌን ጼሌስ፤

ጊዶ ኣቲን ኦቶራንቻታ

ኢዚ ሃሆፔ ኤሬስ።

7 ታኒ ሜቶ ጊዶን ዲኮካ

ኔኒ ታና ናጋሳ፤

ታ ሞርኬታ ሃንቆ ቦላ

ኔ ቄሴ ዴንሳ፤

ኔ ኡሻቻ ኩሼን

ታና ኣሻሳ።

8 ጎዳይ ታስ ቆፒዳይሳ ፖላና፤

ኣቤት ጎዳዉ!

ኔ ሲቆይ ሜርናሳ፤

ኔ ኩሼ ኦሶ ዬጋ ኣጎፋ።