ዬ ማጻፋ 98

ማዛሙሬ

1 ጎዳስ ኦራ

ማዛሙሬ ዬጺቴ፤

ጋሶይካ ኢዚ ማላሊሲዛ

ሚሽ ኦዴስ፤

ኢዛ ኡሻቻ ኩሼይኔ

ኢዛ ጌሻ ቄሴይ

ኢዛስ ጾኖ ኢሚዴስ።

2 ጎዳይ ባ ኣሺዛይሳ ኤሪሲዴስ፤

ኢዚ ባ ጺሎቴካ

ካዎቴስ ቆንጪሲዴስ።

3 ኢዚ ኢስራኤሌታ ሲቂዛይሳኔ

ኢስታስ ኣማኔቲዛይሳ

ሃሳኢዴስ፤

ሳኣ ጋጻ ጋካናስ ዲዛ

ኣሳይ ኡባይ

ኑ ጾሳይ ኣሺዛይሳ ቤኢዴስ።

4 ሳኣ ቦላን ዲዛ ኣስ ኡባይ

ጎዳስ ኡፋይሳን ዬጺቴ፤

ቃላ ቁ ኦዲ

ኡፋይሳ ዬን ጋላቲቴ።

5 ባጋና ዲጺሼ

ማዛሙሬን ጎዳ ጋላቲቴ፤

6 ዲንኬኔ ዛዬ ፑኒሼ

ኑ ካዋ ጎዳ ሲንን

ኡፋይሳን ኢሊሊቴ።

7 ኣባይኔ ኣባ ጊዶን ኩሚዳ

ኡባይ ጉሞ!

ሳኣይኔ ሳኣ ቦላን ዲዛ

ኡባይ ዬጾ!

8 ሻፋቲ ኢሲፌ

ባንታ ኩሼ ባቄቶ!

ዙማቲ ጎዳ ሲንን

ኢሲፌ ኡፋይሳን ዬጼቶ!

9 ጎዳይ ሳኣ ቦላን ፒርዳናስ ያና፤

ኢዚ ሃ ሳኣ ቦላ ጺሎቴን

ኣሳ ቦላካ

ሱሬቴን ፒርዳና።