1 ኣቤት ጾሳዉ!

ጺዮኔን ኔስ ጋላታይ ቤሴስ፤

ኑኒ ኔስ ኣዲኔቲዳይሳ

ጋና።

2 ኣቤት ዎሳ ሲዪዛይሶ!

ኣሳይ ኡባይ ኔኮ ያና።

3 ኑ ናጋራይ ኑና ሚቲዴስ፤

ኔኒ ጊዲኮ ኑ ባላ

ኣቶ ጋ ዉርሳዳሳ።

4 ኔኒ ዶሪዳዴይኔ

ኔናራ ዳና ማላ

ኔ ዱቡሻኮ ሺሻ

ኤኪዳዴይ ኣንጄቲዳዴ፤

ኔ ጌሻሶዛፔኔ

ኔ ዱንካኔ ኣንጆዛፔ

ኑ ካላና።

5 ኣቤት ኑና ኣሺዛ ጾሳዉ

ኔ ጺሎ ኦሶን ማላሊሲዛ ሚሽ

ኑስ ኦ፤

ሳኣ ጋጻፔ ጋጻ ጋካናስ፥

ሃሆ ኣባታፔካ

ሄ ፒንን ዲዛ

ኣሳ ኡባስ ሂዶታይ ኔና።

6 ኔኒ ኔ ዎልቃ ጊጼታዳሳ፤

ዙማታካ ኔ ሚን ኤሳዳሳ።

7 ኔኒ ኣባ ጊሪሳኔ

ዳምባላ ጉን

ሲርጲ ኦሳ፤

ቃሴ ዴሬይ

ዴንዲዛ ዴን ኢርጺሳሳ።

8 ሄሳ ኔኒ ኦዳ

ማላታ ጊሻስ፥

ሳኣ ጋጻ ጋካናስ

ዴኢዛ ኣሳይ

ኡባይ ኔስ፥

«ሆላ!» ጌስ።

ኣርሼይ ሞኪዛሶፔ

ዉሊዛሶ ጋካናስ

ዲዛ ኣሳ ኡባ ኡፋይሳን

ኢሊሊ ጊሳዳሳ።

9 ኔኒ ቢታ ናጋዳ ሃ ኡሻሳ፤

ሂስታዳ ዳሮ ዱሬሳሳ፤

ኣሳስ ካይ ሞካና ማላ

ጾሳ ሻፋይ

ሃን ኩሚዴስ፤

ሄሳ ኦዳ

ኔኒ ጊጊሳዳሳ።

10 ጎሻ ጋዴታስ ጊዲዛ

ኢራ ኢማሳ፤

ጳሼታ ሊቂሳሳ፤

ቢታካ ፑሴ ኢራን ሹጊሳሳ፤

ጫሬቻቲ ዶሊ

ዲጫና ማላ ኣንጃሳ።

11 ላይ ካሎ ላይ ኦሳ፤

ኔኒ ኣዳሶ ኡባይ

ካ ጻላ ጊዴስ።

12 ሜሄ ሄሚዛሶሆን

ጪሊላ ማታይ ኩሚዴስ፤

ዙምቡላቲ ኡፋይሳን ኩሚዳ።

13 ዴምባታን ዉዴ ሜሄይ ኩሚዴስ፤

ሾባታን ካ ኩሚዴስ፤

ኡባቲካ ኡፋይሳን

ኢሊሊሼ ዬጼቴስ።