ዬ ማጻፋ 53

ዳዊቲ ዛማሬታ ካቦስ ሃሳኣን ሺሺዳ ጊንጾ

1 ኤያቲ ባንታ ዎዚናን፥

«ጾሲ ባዋ» ጌቴስ፤

ኢስቲ ሞሬቲዳይታ፤

ኢስታ ኦሶይካ ሃራሲዛዛ፤

ኢስታ ጋርሳፌ

ሎኦ ኦዛይ ዴና።

2 ጾሳ ኮይዛይቲኔ ኣኬኪዛይቲ

ዴኢዛኮ ቤኣናዉ

ጾሲ ሳሎፔ ዱጌ

ኣሳ ናይታ ጼሌስ።

3 ኢስቲ ኡባይካ ጾሳፌ ሃኪዳ፤

ኡባይካ ኢሲፌ ቱኒዳ፤

ሎኦ ኦዛ ኣሲ ዴና፤

ሃራይ ኣቶ ኢሳዴይካ ባዋ።✝53፡1-3 ኦሮ 3፡10-12

4 ጾሲ፥ «ኣሲ ካ ሚዛ ማላ

ታ ዴራ ቦንቂ ሚዛይቲ፥

ጾስ ዎሲ ኤሮንታይቲ፥

ሄይቲ ኢታ ኦዛይቲ

ዩሺ ቆፔቴኔ?» ጌስ።

5 ጾሲ ባ ኣሳ ሞርኪዛይታ

ሜቄ ላላና፤

ኢስቲ ካሴ ዳጋሚ ኤሮንታ

ዳጋማ ዳጋማና።

ጾሲ ኢስታ ካዳ ጊሻስ

ኢስቲ ዬላታና፤

6 ኢስራኤሌስ ኣቶቴ

ጺዮኔፔ ዪዳኮ!

ጾሲ ባ ዴራፔ ዲኤቲዳይሳ

ዛሪዛ ዎዴ

ያቆቤ ዛሬቲ ኡፋዬታና፤

ኢስራኤሌ ኣሳይ ኡፋዬታና።