ዬ ማጻፋ 44

ዛማሬታ ካቦስ ቆሬ ናይቲ ሃሳኣን ሺሺዳ ጊንጾ

1 ኣቤት ጾሳዉ!

ቤኒ ኣዳ ዎዴ

ኔ ኦዳ ጊታ ሚሻ

ኑኒ ሲዪዶስ፤

ኑ ኣዋታ ዎዴካ

ኔ ኦዳይሳ

ኢስቲ ኑስ ዮቲዳ።

2 ካዎቴታ ኔኒ ኔ ኩሼን

ጎዳ ኬሳዳሳ፤

ኑ ኣዋታ

ኢስታ ቢታን ቶካዳሳ፤

ዴራ ሊቂሳዳሳ፤

ጊዶ ኣቲን

ኔ ካዎቴታ ኣሳዳሳ።

3 ኢስቲ ባንታ ማሻን ኦሊዲ

ሄ ቢታ ኦይኪቤቴና፤

ኢስቲ ጾኒዳይ

ባ ቄሴ ሚኖቴን ጊዴና።

ጊዶ ኣቲን ኔኒ

ኢስታን ኡፋዬቲዳ ጊሻስ

ኔ ኡሻቻ ኩሼይ፥

ኔ ቄሴይኔ

ኔ ሲን ፖኦ ዎልቃይ

ሄሳ ኦዴስ።

4 ታ ጾሳዉ ታ ካዎይ ኔና፤

ያቆቤ ዜሬስ

ጾኖ ኢሚዳይ

ጾሶ ኔና።

5 ኔናን ጊዲዲ ኑ ሞርኬታ

ኑ ኦሊ ጾናና፤

ኔ ሱንን ኑናራ ኤቄቲዛይታ

ኑኒ ዬና።

6 ታኒ ታ ቶራን ኣማኔቲኬ፤

ታ ጊ ማሻይካ

ታና ኣሼና።

7 ጊዶ ኣቲን ኔኒ ኑና

ኑ ሞርኬታፔ ኣሻሳ፤

ቃሴ ኑና ኢጺዛይታ

ኔኒ ካዉሻሳ።

8 ኑኒ ኡባ ዎዴ

ጾሳን ጬቄቶስ፤

ኔ ሱንካ ሜርናስ ሳቦስ።

9 ሃኢ ጊዲኮ ኔ ኑና ኣጋዳሳ፤

ቃሴካ ካዉሻዳሳ፤

ኔኒ ኑ ኦላንቻታራ

ኢሲፌ ኬዚዛይሳ ኣጋዳሳ።

10 ኑ ሞርኬታ ሲንፌ

ኑና ባቃቲሳዳሳ፤

ኑናራ ኤቄቲዛይቲ

ኑ ኣቆታ ቦንቂዳ።

11 ኔኒ ኑና ዶርሳታ ማላ ሹካስ

ኣ ኢማዳሳ፤

ቃሴ ካዎቴታ ጊዶን

ኑና ላላዳሳ።

12 ኔኒ ኔ ኣሳ ሂራይሶን ባይዛዳሳ፤

ጊዶ ኣቲን ዎ ዴማቤካ።

13 ኔኒ ኑና ኑ ሾሮታስ ጫሻስ፥

ቃሴ ኑ ሄራን ዲዛይታስ ቂሲኔ

ሚቻስ ኬሳዳሳ።

14 ኔኒ ኑና ካዎቴታ ጊዶን

ሃይሲኤስ ኬሳዳሳ፤

ኢስቲ ባንታ ሁኤ ኑ ቦላ

ቃ ቃ

ቂና ማላ ኦዳሳ።

15 ታ ኡባ ዎዴ ካዉያዲስ፤

ታ ሲን ዬላ ማይኢዴስ።

16 ሄ ኡባይ ታና ጋኪዳይ

ታ ሞርኬቲ ታ ቦላ

ሃሎ ኬሲሺን

ሃራቲ ካዲ ሚጪዳ ጊሻሳ።

17 ኑኒ ኔና ዶጎንታ ዲሺን

ዎይኮ ኔ ጫቆ ቃላ

ፓጪንቾንታ ዲሺን

ሃይሲ ኡባይ ኑ ቦላን ጋኪዴስ።

18 ኑ ዎዚናይ ኔፔ

ጉዬ ኡንዱዲቤና፤

ኑ ቶሆይ ኔ ኦጌፔ

ጋጻ ኬዚቤና።

19 ጊዶ ኣቲን ኔኒ ኑና

ሜንሬዳ

ዶኣ ኦጌን ዬጋዳሳ፤

ጊርዲ ጊዳ ማንካ ኦላዳሳ።

20 ኑ ጾሳ ሱን

ኑኒ ባሊዳ ጊዲኮ

ኑ ኩሼካ ኤቃ ጾሳታ

ዎሳናስ ሚጪዳኮ፥

21 ሃይሳ ኤሮይ ጾስ ጾናኔ?

ኢዚ ዎዚናን ጌሚ ዲዛ

ጹራ ኡባ ኤሬስ

22 ጊዶ ኣቲን ኡባ ጋላስ

ኔ ጊሻስ

ሃይቆስ ኣ ኢሜቲዶስ፤

ሹካስ ኤፊዛ ዶርሳታ ማላካ

ቆዴቲዶስ።✝44፡22 ኦሮ 8፡36

23 ኣቤት ጎዳዉ ቤጋ!

ኣይስ ስካይ?

ዴንዳ! ሜርናስ ኑና ኣጎፋ።

24 ኔ ሲን ኑፔ ኣይስ ጌንይ?

ኑ ቆሄቴኔ

ኑ ኡንኤቴ ኣይስ ዶጋይ?

25 ኑኒ ዱጌ ጉዱላን ዬጌቲዶስ፤

ቢታ ቦላካ ፖርጩ ጊዶስ።

26 ኣቤት ጎዳዉ፥

ኑና ማዳናስ ዴንዳ!

ኔ ሜርና ሲቆን ኑና ዎዛ።