ዬ ማጻፋ 11

ዳዊቲ ዛማሬታ ካቦስ ዬጺዳ ማዛሙሬ

1 ጎዳይ ታኒ ባቃታ ኣቲዛሶ፤

ሂስቲን ኢንቴ ታና ኣይስ፥

«ኔኒ ካፎ ማላ

ፑዴ ዙማ ቦላ ባቃታ» ጌቲ?

2 ናጋራንቻቲ ዎዚና ጌሻታ

ማን ጫዳናስ

ባንታ ዎንዳፌ

ዳፊ ኦይኪዳ።

3 ዮቻ ሹቺ*11፡3 ዮቻ ሹች፡ ዮቻ ሹች ጊዛይሳ ኢሲ ኢሲ ባጋ ጋሞ ቃላን ማጋላ ሹች፥ ሃራቲ ቃሴ ባሳ ጊሺን ሄሲካ ኣማራ ቃላራ ማሳራቴ ጌቴቴስ። ዎዲዛ ዎዴ፥

ጺሎይ ኣይ ኦናዉ

ዳንዳይዜ?

4 ጎዳይ ባ ጌሻ

ኬን ዴስ፤

ሳሎን ባ ኣራታን ኡቲዲ

ኣሳ ቤኤስ፤

ኢዛ ኣይፌቲ

ኣሳ ፒልጊ ጼሌቴስ።

5 ጎዳይ ጺሎታኔ

ናጋራንቻታ ፒልጊ ጼሌስ።

ጊዶ ኣቲን ጌላቴኔ

ማካላቴ ሲቂዛይታ

ኢዚ ኬሂፔ ኢጼስ።

6 ጎዳይ ኢታታ ቦላ

ኤጺዛ ታማ ቦንቆኔ

ዲኔ ታማ ቡኪሳና።

ይሲዛ ጎቴ ጫርኮን

ኢስታ ቃጻያና።

7 ጎዳይ ጺሎ ጊዲዳ ጊሻስ

ጺሎቴ ኦሶ ዶሴስ።

ሱሬ ኣሳቲ ኢዛ ሲን ቤያና።