ሜስጴጾሚያኒኔ ኣራሜን ዲዛ ዴራራ ኦሌቲ ሲሚዲ ኢዮኣቤይ ማጺኔ ዙሌን ታማኔ ናምኡ ሺ ኤዶሜ ኣሳ ዎዳ ዎዴ ቲሚርቴስ ዳዊቲ ዛማሬታ ካቦስ፥ «ጪሻ» ጌቴቲዛ ዲ ጊጊሶን ሺሺዳ ማርካቴ ዎሳ

1 ኣቤት ጾሳዉ!

ኔኒ ኑና ኣጋዳሳ፤

ኑና ሜንሬ ዬጋዳሳ፤

ኔኒ ኑና ሃንቄታዳሳ፤

ሃኢ ጊዲኮ ሲማዳ

ኑና ጊጊሳ።

2 ኔኒ ቢታዮ ቃዳ ዛኢሳዳሳ፤

ኢዛ ኮኮሪዛ ጊሻስ

ኔኒ ኢዚ ዛኣ ኩን።

3 ኔኒ ኔ ኣሳ ሜቶ ቤሳዳሳ፤

ኔኒ ኑና ማሲዛ

ዎይኔ ኡሹ ኡሻዳሳ።

4 ኔስ ያዪዛይቲ ባንታ ሞርኬታ

ዎንዳፌፔ ኣታና ማላ

ማላታ ኢማዳሳ።

5 ኔኒ ሲቂዛይቲ ኣታና ማላ

ኔ ዎልቃን ኑና ኣሻ፤

ኔኒ ኑኮ ኣላ።

6 ጾሲ ባ ኬን ዲሼ፥

«ታኒ ጾናዳ ሴኬሜ

ቢታ ሻካና፤

ቃሴ ሱኮቴ ሾባ ጊሻና።

7 ጋላኣዴይኔ ሚናሴይ ታይታ፤

ኤፍሬሜይ ታስ ሁኤ ቆቤ፤

ዩሁዳይ ታስ ካዎቴ ጉፌ።

8 ሞኣቤይ ታ ሜጬቲዛሶ፤

ኤዶሜይ ታስ ጫማ

ዎዛሶ፤

ታኒ ፊሊስጼሜ

ጾናዳ ጌሬራና» ጊዴስ።

9 ጊምቤቲዳ ካታማኮ

ታና ኦኔ ኤፋናይ?

ኤዶሜ ጋካናስ

ታና ኦኔ ካሌናይ?

10 ኣቤት ጾሳዉ!

ኑና ኣጊዳይ ኔና ጊዲኪ?

«ኔኒ ኑ ቶራንቻታራ

ኦላስ ኬዚኬ» ጋዳሳ።

11 ኣሳፔ ጊዲዳ ማዶይ ሃዳ፤

ሄሳ ጊሻስ ኑ ሞርኬታ ቦላ

ኑስ ጾኖ ኢማ።

12 ጾሳ ዎልቃን ኑ ሞርኬታ

ኑኒ ጾናና፤

ኢዚ ኑ ሞርኬታ ዬታና።✝